15-րդ Պատգամաւորական ժողովի ընտրութիւններին մասնակցող թեկնածուների քարոզարշաւի նախավերջին օրն էր ապրում նաեւ Սասուն քաղաքամասը: 13 պատգամաւորներ ներկայացնող այս ընտրատարածքում «Սիփան» միութեան յարկի տակ էր համախմբւել քաղաքամասից մի ստւար բազմութիւն, որտեղ ներկայ էին նաեւ իրենք՝ «Նոր հայեացք, կայուն համայնք» կարգախօսի շուրջ համախմբւած 13 թեկնածուները: Կազմակերպւած հանրահաւաքին ներկայ էին նաեւ «Ալիք» հաստատութեան ներկայացուցիչները, ինչպէս նաեւ Իսլ. խորհրդարանում Թեհրանի եւ հիւսիսային իրանահայութեան իրաւունքները 7-րդ եւ 8-րդ գումարման շրջաններում պաշտպանած Գէորգ Վարդանեանը: Միջոցառումը մեկնարկեց «Սիփան» միութեան ժայռամագլցման խմբից Յովնան Այդազի մագլցման ելոյթով: Ապա բացման խօսքով հանդէս եկաւ Զօրիկ Շահբազեանը: Երեկոյի գեղարւեստական հատւածը վստահւած էր նոյն միութեան Կարինէ Պետրոսեանի գլխաւորած «Գարուն» պարախմբի սաներին, որից յետոյ խօսափողին մօտեցաւ օրւայ բանախօս Գէորգ Վարդանեանը, ով, ի դէպ, Սասուն քաղաքամասից բացի՝ վայելում է նաեւ Կենտրոն համայնքի համակրանքը, որտեղ եւ առաջադրւել է որպէս 15-րդ ՊԺ-ի ընտրութիւնների թեկնածու: Գէորգ Վարդանեանը իր խօսքն կառուցեց ՊԺ-ի կարեւորութեան տրամաբանութեամբ: Պրն. Վարդանեանը իր խօսքն սկսեց «Սիրելի սասունցիներ»-ով եւ անդրադարձ կատարելով համայնքային խնդիրների լուծմանն ուղղւած կարեւորութեան փաստին՝ մատնանշեց, որ այս բոլորի լուծման կողքին՝ կարեւոր է նաեւ ժողովրդի մասնակցութիւնը, որով Պատգամաւորական ժողովը վայելելով իր ժողովրդի վստահութիւնը՝ նոյն հզօրութեամբ ի զօրու կը լինի զբաղւել՝ առկայ խնդիրներով եւ որպէս ժողովրդի ամուր ձայն իր կշիռը ունենալ բոլոր պաշտօնական ատեաններում... Նախընտրական այս հանրահաւաքը յաջորդ փուլ տեղափոխւեց «31»-ի տղաների ելոյթներով՝ գլխաւորութեամբ Սեթօ-ի (Սեդրակ Գոջամանեան): «31»-ի այս շրջանի ելոյթները առանձին անդրադարձի առիթ կարող են լինել, իսկ որպէս կարեւոր յատկանիշ՝ կարելի է ընդգծել ՊԺ-ի ընտրութիւններին ուղղւած համարները կամ կատակները: Համահաւաքի աւարտին բեմ հրաւիրւեցին Սասուն քաղաքամասի Փերիոյ Կրթասիրաց, «Հայ կին» միութեան կից «Արմենուհի» եւ «Սիփան» միութիւնների հովանաւորութիւնը վայելող 13 թեկնածուները, որոնց բարձր տրամադրութեամբ դիմաւորեց լեփ-լեցուն դահլիճը: Հարկ է նշել նաեւ, որ այսօր՝ չորեքշաբթի երեկոյեան ժամը 7:30-ին, նոյն՝ «Սիփան» միութեան դահլիճում տեղի կունենայ քարոզարշաւի վերջին հանրահաւաքը, որտեղ նախատեսւած է նաեւ Ռայիսա Աւանէսեանի ելոյթը: «Ալիք»

---