Նոյեմբերի 16-ին` հանդուրժողականութեան միջազգային օրուայ կապակցութեամբ «Հանրային տեղեկատուութիւն եւ գիտելիքի կ'արիք» ՀԿ-ն կազմակերպել էր քննարկում ՀՀ-ում հակախտրական օրէնսդրութեան նախաձեռնման, մշակման եւ ջատագովութեան շուրջ: «Անվիճելի է, որ իւրաքանչիւրը պէտք է իրական հնարաւորութիւն ունենա օրինական միջոցներով պաշտպանելու սեփական իրաւունքները` իր անձի հանդէպ խտրականութեան պարագայում: Հայաստանը միացել եւ/կամ վաւերացրել է խտրականութեան վերացմանն ուղղուած բոլոր միջազգային հիմնական իրաւական գործիքները: Այդուհանդերձ Հայաստանում խտրականութեան խնդիրը երբեւէ հետեւողականօրէն չի քննարկուել եւ անձի նկատմամբ խտրականութեան կիրառման կանխման եւ պատժման արդիւնաւէտ իրաւական մեխանիզմներ չկան: Այս համատեքստում յարկ է ձեւաւորել խտրականութեան, անհանդուրժողականութեան եւ այլատեացութեան կանխման, դրանց դրսեւորումներին պատշաճ արձագանքնման գործուն մեխանիզմներ»,- նշեց կազմակերպութեան ղեկավար Մամիկոն Յովսէփեանը: Կազմակերպութեան իրաւաբան Լուսինէ Ղազարեանը ՀՀ-ում հակախտրական օրեսնդրութիւն ունենալու անհրաժեշտութիւնը հիմնաւորեց Հայաստանում գործող օրէնքներում առկայ բացերով, ինչպէս նաեւ միջազգային ստորագրուած եւ/կամ վաւերացուած կոնուենցիաներով եւ յանձնարարականներով: Այնուհետ ՀՀ մարդու իրաւունքների պաշտպանի աշխատակազմի հաշմանդամների եւ փոքրամասնութիւնների իրաւապաշտպան Տաթեւիկ Խաչատրեանն ու իրաւական վերլուծութեան վարչութեան պետի ժամանակաւոր պաշտօնակատար Արամ Վարդեւանեանը նշեցին, որ ՄԻՊ գրասենեակի կողմից արդէն իսկ մշակուել է հակախտրական օրէնքի նախագծի նախնական տարբերակը, ինչպէս նաեւ ներկայացրին ՄԻՊ գրասենեակի դիրքորոշումը այս օրէնսդրութեան անհրաժեշտութեան եւ կարեւորութեան վերաբերեալ: Իրաւապաշտպան կազմակերպութիւնների ներկայացուցիչները քննարկման ընթացքում իրենց մտահոգութիւնը յայտնեցին այն փաստի շուրջ, որ ՄԻՊ աշխատակազմի կողմից մշակուած հակախտրական օրէնքի նախագծի մշակումը տեղի չի ունեցել թափանցիկ պայմաններում եւ հանրութեան մասնակցութեամբ: Հանդիպմանը ներկայ կազմակերպութիւնները նշեցին նաեւ, որ տարիներ շարունակ իրենք իրենց գործութիւնէութիւնը ծաւալել են մարդու իրաւունքների պաշտպանութեան ոլորտում եւ պայքարել խտրականութեան տարատեսակ դրսեւորումների դէմ, սակայն նրանց հնարաւորութիւն չի տրուել իրենց փորձառութիւնը եւ խտրականութեանը առնչուող ոլորտներում իրենց գիտելիքները կիրառել օրէնքի նախագծի նախաձեռնման եւ նախնական մշակման փուլում: Հանդիպման աւարտին քննարկմանը ներկայ կազմակերպութիւնները վերահաստատեցին անհրաժշետութիւնը` առաւել անմիջական եւ ակտիւ ներգրաւուածութիւն ունենալու այդ օրինագծի մշակման յետագայ փուլերում, ինչի համար ՄԻՊ-ի գրասենեակին պահանջ ներկայացուեց` երաշխաւորելու նրանց գործունէութեան թափանցիկութիւնն ու հանրայնացումը, ինչպէս նաեւ ՀԿ-ներին կոչ արուեց համախմբել ջանքերը առաւել համընդգրկուն հակախտրական օրէնսդրութեան նախագիծ ունենալու եւ դրա ադուոկացիան իրականացնելու համար: «Իրական աշխարհ, իրական մարդիկ» ՀԿ ներկայացուցիչ Յովհաննէս Մադոյեանը նշեց, որ քաղաքացիական հասարակութեան կազմակերպութիւնները ՄԻՊ գրասենեակի հետ համատեղ կը մասնակցեն օրէնքի նախագծի մշակման գործընթացին, որպէսզի երաշխաւօրէն ոլորտում առկայ հիմնախնդիրներին արձագանքող համապարփակ օրէնսդրական նախագծի առկայութիւն: Ինչպէս նաեւ յաւելեց, որ եթէ չապահովուի այս նախագիծի մշակման գործընթացի թափանցիկութիւնը, չերաշխաւորուի հանրային մասնակցութիւնը եւ համակողմանիութիւնը, ապա քաղաքացիական հասարակութեան կազմակերպութիւնները ստիպուած կը լինեն հանդէս գալ իրենց կողմից մշակուած օրէնսդրական նախագծով: Միւս քննարկումը ՄԻՊ աշխատակազմը նախատեսել է ս.թ. նոյեմբերի 23-ին, ժամը 11:00-ին, Մարդու իրաւունքների պաշտպանի գրասենեակում:

---