Մարմարա Ամերիկեան հեղինակաւոր »Ֆորպս« ամսագիրը հրապարակեց աշխարհի ամենահարուստ այրերու ցանկը, որ երկու պատմական ցուցանիշներ սահմանեց. միլիառատէրերու թիւը հասած է 1210ի, իսկ անոնց ընդհանուր ունեցուածքը՝ 4.5 եռիլիոն տոլարի )4500 միլիառ_։ Ամէնէն մեծ բարգաւաճումը ապահոված են Պրազիլ, Ռուսաստան, Հնդկաստան ու Չինաստան, որոնց բաժին կ’իյնայ նորայայտ 214 միլիառատէրերէն՝ 108ը։ Գրեթէ բոլոր զարգացող երկիրներու մէջ բարձրացած է միլիառատէրերու թիւը, սակայն ամէնէն արագ կերպով կը հարստանան Ասիական-Խաղաղ Ովկիանոսեան շրջանի երկիրները։ Հոն կ’ապրին 332 միլիառատէրեր, այսինքն աշխարհի միլիառատէրերու ընդհանուր թիւի քառորդէն աւելին։ Իսկ իբրեւ առաջատար երկիր հանդէս կուգայ Ամերիկա, որ սակայն աստիճանաբար կը կորսնցնէ իր դիրքերը։ Աշխարհի ամենահարուստ հայը կը շարունակէ մնալ Գիրգ Գրիգորեան։ 93ամեայ հայ գործարարի կարողութիւնը կը գնահատուի 3.5 միլիառ տոլար։ Աղիւսակին վրայ տեղ գտած են չորս հայ անուններ եւս, որոնք բոլորն ալ կը ներկայացնեն Ռուսաստանը։ 1.5ական միլիառով աշխարհի մէջ 833րդ, իսկ Ռուսաստանի մէջ 65րդ տեղը կը գրաւեն »Ռէսօ Կարանթիա« ընկերութեան համասեփականատէրեր Սէրկէյ եւ Նիքոլայ Սարգիսով եղբայրները եւ »Ռուսկոսսթրախ« ընկերութեան ղեկավար եւ հիմնական բաժնետէր Դանիէլ Խաչատուրով։ Աշխարհի մէջ 879րդ, իսկ Ռուսաստանի մէջ 72րդ կարգի վրայ է »Տաշիր« խումբի հիմնադիր Սամուէլ Կարապետեան։ Ռուսաստանի ամենահարուստ մարդն է »Նովոլիփէցքի մէթալուրկիական ընկերութիւն«ի սեփականատէր Վլատիմիր Լիսին, որ իր 15.8 միլիառ հարստութեամբ 14րդն է »Ֆորպս«ի ցանկի մէջ։

---