Եւրամիութեան պաշտօնեաները չափազանց կարեւորել էն Լեռնային Ղարաբաղի հակամարտութեան խաղաղ կարգաւորումը
11-03-2011 14:23:14 | | Քաղաքական
ՀՀ պաշտպանութեան նախարար Սեյրան Օհանեանը Բրիւսէլ կատարած այցի շրջանակներում մարտի 10-ին հանդիպել է Եւրամիութեան արտաքին գործողութիւնների ծառայութեան Եւրոպայի եւ Կենտրոնական Ասիայի համար պատասխանատու ստորաբաժանման կառավարիչ-տնօրէն Միրոսլաւ Լայչակին եւ տնօրէն Գունար Վիգանդին:
Ինչպէս «ՆՏ»-ին յայտնեցին ՀՀ Պաշտպանութեան նախարարութեան Մամուլի ծառայութիւնից, հանդիպման ընթացքում քննարկուել էն տարածաշրջանային անվտանգութեան եւ Լեռնային Ղարաբաղի հակամարտութեան խաղաղ կարգաւորմանն առնչուող հարցեր, երկուստէք կարեւորուել է փոխվստահութեան ամրապնդման միջոցառումների լիարժէք կիրառման անհրաժեշտութիւնը:
Մասնաւորապէս, պաշտպանութեան նախարարը անթոյլատրելի է համարել մարտի 5-ին Հայաստանի եւ Ադրբեջանի նախագահների միջեւ ձեռքբերուած պայմանաւորուածութիւններից յետոյ շփման գծում Ադրբեջանի կողմից վարուող դիպուկահար եւ անկանոն կրակը: Նախարարը նշել է, որ Ադրբեջանի կողմից անպատասխանատու յայտարարութիւնների եւ շահարկումների արդիւնքում հրահրուած միջադէպերի պատճառով աճում է զոհերի թիւը:
Եւրամիութեան պաշտօնեաները չափազանց կարեւորել էն Լեռնային Ղարաբաղի հակամարտութեան խաղաղ կարգաւորումը` պատրաստակամութիւն յայտնելով գործնական աջակցութիւն ցուցաբերել փոխվստահութեան մթնոլորտի բարելաւման ուղղութեամբ: