Փետրուարի 27-ին Ֆրանսիայի մայրաքաղաք Փարիզի Յովհաննէս-մկրտիչ Հայ առաքելական Մայր եկեղեցում եւ Ֆրանսիայի հայաշատ քաղաքներում գործող եկեղեցիներում պատարագներ մատուցուեցին Սումգայիթի ողբերգութեան զոհերի յիշատակին: Փարիզում, պատարագի աւարտին, ծիսակատութեան մասնակիցների թափօրը շարժուեց դէպի Սենայի ափով ձգուող Երեւանեան պարտէզին հարող հրապարակ, ուր ծաղկեպսակ դրուեց Կոմիտասի յուշարձանին` ի յիշատակ եւ ի ոգեկոչում սումգայիթեան սպանդի անմեղ զոհերի: Փետրուարի 28-ի երեկոյեան, Ֆրանսիայի մայրաքաղաք Փարիզի 9-րդ քաղաքապետարանի հանդիսութիւնների լեփ-լեցուն սրահում տեղի ունեցաւ Ֆրանսահայկական կազմակերպութիւնների համակարգող խորհրդի /ՖԿՀԽ/ նախաձեռնած հանրահաւաքը` նուիրուած Ադրբեջանի Սումգայիթ քաղաքում իրագործուած հայկական ջարդերի 23-ամեայ տարելիցին: Հանրահաւաք-համաժողովի ընդհանուր խորագիրն էր` «Ի զօրակցութիւն Լեռնային Ղարաբաղի Հանրապետութեան», բուն առիթը` սումգայիթեան ողբերգութեան 23-ամեայ տարելիցը: Ինչպէս «ՆՏ»-ին յայտնեցին ՀՀ ԱԳՆ Մամուլի եւ տեղեկատուութեան վարչութիւնից, միջոցառման գերակայ նպատակ էր յայտարարուած` սումգայիթեան ջարդերի զոհերի յիշատակի ոգեկոչումը, ադրբեջանական ռազմաշունչ ճարտասանութեան եւ ստայօդ քարոզչութեան հակադարձումը, ֆրանսահայութեան զօրակցութիւնը Լեռնային Ղարաբաղի Հանրապետութեանը եւ համախմբումը արցախահայութեան շուրջ` ԼՂՀ անկախութեան 20-ամեայ տարելիցին ընդառաջ: Միջոցառմանը ելոյթներով հանդէս եկան Ֆրանսահայ ազգային խորհրդի եւ ՀԲԸՄ Եւրոպայի մասնաճիւղի նախագահ, Իլ-դը Ֆրանս դէպարտամենտի ռեգիոնալ խորհրդի անդամ Ալեքսի Գովչեանը, Ֆրանսահայկական կազմակերպութիւնների համակարգող խորհրդի համանախագահներ Արա Թորանեանը եւ Մուրադ Փափազեանը, Հայ Դատի Ֆրանսիայի գրասենեակի տնօրէն Հրաչ Վարժապետեանը, Ֆրանսիայում Լեռնային Ղարաբաղի Հանրապետութեան ներկայացուցիչ Յովհաննէս Գէորգեանը, Ֆրանսիայի Ազգային Ժողովի պատգամաւորներ: Պաշտօնական ելոյթների շարքը եզրափակեց եւ սգոյ յոբելեանի առթիւ ամփոփիչ խօսք ասաց Ֆրանսիայում Հայաստանի Հանրապետութեան դեսպան Վիգէն Չիտեչեանը: Հանրահաւաքի ընթացքում ցուցադրուեց Սումգայիթի ողբերգութեան մասին պատմող փաստավաւերագրական տեսաֆիլմը, որին յաջորդեց սումգայիթեան ջարդերից հրաշքով ողջ մնացած, ողբերգութեան ականատես-վկայ Վիտալի Դանիէլեանը, ով միջոցառմանն էր հրաւիրուած ՖԿՀԽ կողմից: Տեսաֆիլմից բացի` դահլիճում տեղադրուած էկրանին ցուցադրուեցին ադրբեջանական խոշտանգումների ու վայրագութիւնների զոհ դարձած անձանց պատկերող վաւերագրական կադրեր: Միջոցառման ողջ ընթացքում էկրանին ներկայացւում էին սումգայիթեան իրադարձութիւնների առթիւ ֆրանսիական, եւրոպական եւ ամերիկեան մամուլում տպագրուած ողբերգութիւնը լուսաբանող տեղեկատուական նիւթեր, քաղուածքներ ժամանակին ջարդերի առիթով միջազգային ատեանների կայացրած դատապարտողական որոշումներից: Համաժողովի մասնակիցները հանդէս եկան Ադրբեջանի քաղաքական ղեկավարութեան ռազմաշունչ յայտարարութիւնների դէմ ուղղուած դատապարտողական ելոյթներով, ֆրանսիական իշխանութիւններին կոչ անելով սատարելու արցախահայութեան ինքնորոշման եւ Լեռնային Ղարաբաղի Հանրապետութեան անկախութեան իրաւունքը` որպէս Արցախի հայ ազգաբնակչութեան անվտանգութեան միակ գրաւականի: Միջոցառման վերջում Ֆրանսահայ կազմակերպութիւնների համակարգող խորհրդի անունից ընդունուեց ֆրանսիական իշխանութիւններին եւ երկրի բոլոր ժողովրդավարական ուժերին ուղղուած կոչ-յայտարարութիւն` ի զօրակցութիւն արցախահայութեան ինքնորոշման օրինական պահանջի եւ ի համերաշխութիւն Լեռնային Ղարաբաղի Հանրապետութեան կողմից սեփական ազգաբնակչութեանը եւ խաղաղութիւնը պաշտպանելու կոչուած ջանքերի: Համաժողովի մասնակիցները նաեւ իրենց պատրաստակամութիւնն արտայայտեցին ԼՂՀ եւ Հայաստանի Հանրապետութեան 20-ամեայ յոբելեանական տարուայ շրջանակներում ողջ Ֆրանսիայով մէկ հուժկու միջոցառումներ կազմակերպելու` ի նշանաւորում այդ զոյգ իրադարձութիւնների, ինչպէս նաեւ իրենց վճռականութիւնը յայտնեցին անհաշտ պայքար մղելու ադրբեջանական զեղծարարութիւնների դէմ, ակտիւ եւ համախմբուած աշխատանք տանելու ղարաբաղեան հակամարտութեան իրական պատճառների եւ հետեւանքների վերաբերեալ ֆրանսիական իշխանութիւններին ու հասարակութեանը ճշմարտութիւնը իրազեկելու գործում:

---