Մայր Աթոռը թեմերի ունեցուածքի ֆինանսական վերահսկողութեան
նպատակ չի հետապնդում
14-02-2011 21:02:00 | Հայաստան | Հասարակութիւն
ԵՐԵՎԱՆ, 14 ՓԵՏՐՈՒԱՐԻ, ՆՈՅԵԱՆ ՏԱՊԱՆ: Ֆրանսիայի Նիսս քաղաքի
հայ համանքն ի վերջոյ ստորագրել է Մայր Աթոռ Սբ. Էջմիածնում
2009թ.-ին մշակուած Հայ Առաքելական եկեղեցու թեմերի եւ ծուխերի
կանոնադրութիւնը, որին սկզբնապէս դէմ էր ծխական խորհրդի
կազմաւորմանը վերաբերող կէտերը չընդունելու պատճառով: Այս մասին
փետրուարի 14-ի ասուլիսում յայտնեց Մայր Աթոռ Սբ. Էջմիածնի
փոխդիվանապետ եւ Եկեղեցի-պետութիւն յարաբերութիւնների գրասենեակի
պատասխանատու Մեսրոպ աբեղայ Պարսամեանը: Նրա շոսքերով, «կան
համայնքներ, որտեղ ընտրութիւնը խիստ վերահսկւում է, որպէսզի ծուխի
ղեկավարութիւնը փոխանցվի ժառանգաբար»:
Այս խնդրին Մայր Աթոռ Սբ Էջմիածնի ներկայացուցիչը անդրադարձաւ
մամուլում յայտնուած հրապարակումների պատճառով, ներկայացնելով Հայ
Առաքելական եկեղեցու Ֆրանսիայի թեմի պաշտօնական հերքումը: Այդ
հրապարակումների համաձայն, Ֆրանսիայի հայկական եկեղեցիների
հոգաբարձուների խորհուրդների անդամները բաց նամակով դիմել էին
Ֆրանսիայի հայոց թեմի առաջնորդ Նորվան արքեպիսկոպոս Զաքարյանին եւ
մտահոգութիվւն յայտնել Ֆրանսիայի թեմում ստեղծուած իրավիճակի առթիւ:
Ըստ նրանց, Էջմիածինը փորձում է մինչեւ այժմ գործող կարգը փոխել եւ
ստանձնել եկեղեցիների կառավարումը` տեղական համայնքների
խորհուրդների փոխարէն:
Մայր Աթոռ Սբ Էջմիածնի փոխդիվանապետը հերքեց լուրերը, թէ այդ
կանոնադրութեամբ, որը դարձել է Հայ Առաքելական եկեղեցու
սահմանադրութեան մի մասը, Էջմիածինը փորձում է սահմանել ֆինանսական
վերահսկողութիւն թեմերի ունեցուածքի վրայ: «Ֆինանսական ոչ մի խնդիր
չկայ, քանզի կանոնադրութեան մէջ ասւում է, որ իւրաքանչիւր
համայնքի գոյքը պատկանում է համայնքին, թեմինը` թեմին: Միայն եթէ
տեղում այլեւս հայ չկայ, եւ ծուխը լուծարւում է, այդ ժամանակ միայն
ունեցուածքն անցնում է թեմին, իսկ եթէ թեմն է լուծարւում, ապա` Մայր
Աթոռ Սուրբ Էջմիածնին»,- պարզաբանեց Մեսրոպ աբեղայ Պարսամեանը: