Հայաստանի եւ Գերմանիայի ոստիկանները կհամագործակցեն մի շարք
հանցատեսակների դէմ պայքարում
14-02-2011 18:18:00 | | Հասարակութիւն
ԲԵՌԼԻՆ, 14 ՓԵՏՐՈՒԱՐԻ, ՆՈՅԵԱՆ ՏԱՊԱՆ: Այցով Գերմանիայի
Դաշնային Հանրապետութիւն գտնուող ՀՀ ոստիկանութեան պետ Ալիկ
Սարգսեանը եւ ԳԴՀ ներքին գործերի նախարարութեան խորհրդարանական
պետքարտուղար դոկտոր Օլե Շրյոդերը փետրուարի 14-ին ստորագրեցին
«Հայաստանի Հանրապետութեան ոստիկանութեան եւ Գերմանիայի Դաշնային
Հանրապետութեան ներքին գործերի նախարարութեան միջեւ համատեղ
գործողութիւնների հռչակագիրը»:
Համագործակցութիւնն ընդգրկելու է կազմակերպուած
յանցաւորութեան, թմրամիջոցների եւ հոգեներգործուն նիւթերի ապօրինի
շրջանառութեան, անօրինական միգրացիայի եւ մարդկանց առեւտրի դէմ
պայքարի ոլորտները:
Հռչակագիրը նախատեսում է նաեւ ոստիկանական կադրերի
վերապատրաստում, փորձագէտների փոխանակում, ինչպէս եւ փորձի
փոխանակում` յատկապէս ոստիկանների նախնական պատրաստման եւ
որակաւորման բարձրացման, ինչպէս եւ համազօրային մարտավարութեան
բնագաւառում:
Հռչակագրի ստորագրմանը նախորդել էր ՀՀ ոստիկանութեան եւ ԳԴՀ
ՆԳՆ պատուիրակութիւնների աշխատանքային հանդիպումը, որի ընթացքում
քննարկվեցին փաստաթղթի արդիւնաւէտ իրականացման
հնարաւորութիւններն ու համագործակցութեան հեռանկարները, իսկ
ստորագրման արարողութիւնից յետոյ ի պատիւ ՀՀ ոստիկանութեան պետ
Ալիկ Սարգսեյանի տրուեց ճաշ` ԳԴՀ ՆԳՆ խորհրդարանական պետքարտուղար
դոկտոր Օլե Շրեոդերի անունից:
Ըստ ՀՀ Ոստիկանութեան ՀԿԼ վարչութեան հաղորդագրութեան, օրուայ
երկրորդ կէսին Ա.Սարգսեյանի գլխաւորած պատուիրակութիւնն այցելեց ԳԴՀ
ՆԳՆ օպերատիւ կառավարման կենտրոն, ապա` Բեռլինի թիւ 34 ոստիկանական
բաժանմունք: Այցելութիւնների ընթացքում պատուիրակութեան անդամները
ծանոթացան այդ կառոյցների աշխատանքին, ինչպէս եւ քննարկվեցին
յետագայ համագործակցութեան եւ փորձի փոխանակման
հնարաւորութիւնները: