«Ամերիաբանկ»-ն ընդլայնում է համագործակցութիւնը օտարերկրեայ
խոշորագոյն բանկերի հետ
14-02-2011 14:06:00 | Հայաստան | Տնտեսութիւն
ԵՐԵՎԱՆ, 14 ՓԵՏՐՈՒԱՐԻ, ՆՈՅԵԱՆ ՏԱՊԱՆ: «Ամերիաբանկ»-ը, շնորհիւ
ֆինանսական շուկայում որպէս յուսալի եւ կայուն գործընկերոջ ձեռք
բերած ճանաչման, շարունակում է ակտիւ համագործակցութիւնը
միջազգային կառոյցների եւ օտարարերկրյա հեղինակաւոր բանկերի հետ`
առեւտրի ֆինանսաւորման գործարքների ընդլայնման ուղղութեամբ: Այդ
նպատակով բանկը հաստատել է ընդհանուր գումարով շուրջ 40 մլն ԱՄՆ
դոլարի սահմանաչափ` համագործակցելով Համաշխարհային բանկի խմբի
անդամ IFC-ի, Վերակառուցման եւ Զարգացման Եւրոպական բանկի եւ
օտարերկրեայ առաջատար բանկերի հետ, ներառեալ «Citibank-ը, «BNP
Paribas»-ը, «Commerzbank»- եւ այլն:
Ինչպէս «ՆՏ»-ին յայտնեցին «Ամերիաբանկ»-ի մամլոյ
ծառայութիւնից, վերջերս բանկն ամերիկեան «Citibank»-ից եւ
եւրոպական խոշորագոյն «BNP Paribas» բանկից ստացել է ընդհանուր
գումարով 8 մլն ԱՄՆ դոլարի վարկային գիծ` առեւտրի ֆինանսաւորման
գործարքների իրականացման համար, ինչը մեծապէս կընդլայնի
յաճախորդների օտարերկրեայ առեւտրային գործարքների ֆինանսաւորման
հնարաւորութիւնները: Իսկ «Citibank»-ը օրական կանխիկ դրամական
հոսքերի կառավարման նպատակով «Ամերիաբանկ»-ին տրամադրել է 5 մլն
ԱՄՆ դոլարի չափով վարկային գիծ:
«Ամերիաբանկ»-ը 2011թ.-ին միջազգային կառոյցների եւ
օտարերկրեայ խոշորագոյն բանկերի հետ համագործակցութեան ընդլայնման
միջոցով նպատակ ունի յաճախորդներին առաջարկել ֆինանսաւորման եւ
գործարքների հաստատման առաւել բարենպաստ պայմաններ:
Տեղեկանք. «Ամերիաբանկ» ՓԲԸ-ն կորպորատիվ, ներդրումային բանկ
է, որն իրականացնում է կորպորատիվ եւ սահմանափակ մանրածախ բանկային
ծառայութիւններ` տրամադրելով բանկային լուծումների ամբողջական
փաթեթ: «Ամերիաբանկ»-ի Տնօրէնների խորհրդի նախագահն է Ռուբէն
Վարդանեանը, Տնօրինության նախագահ-Գլխաւոր տնօրէնը` Արտակ
Հանեսյանը: «Ամերիաբանկ»-ի ռազմավարական գործընկերն է Ռուսաստանի
Դաշնութեան ամենամեծ ներդրումային ընկերութիւններից մէկը` «Տրոյկա
Դիալոգ» խումբը: