«ԱԼԻՔ» օրաթերթ 10 փետրւարի 2011 թ. Թեհրանի հայոց թեմի առաջնորդ Տ. Սեպուհ արք. Սարգսեանի ուղերձը՝ 22 Բահմանի առիթով Ահա, մէկ անգամ եւս կանգնած ենք 22 Բահմանի՝ Իրանի Իսլ. Հանրապետութեան վերջին շրջանի պատմութեան մէջ անկիւնադարձային ու ճակատագրական արժէք եւ իմաստ ունեցող թւականի առաջ: Մի թւական, որ ահա երեսուներկու տարիներից ի վեր եղել է խորհրդանիշ ժողովրդավարութեան եւ մարտնչող ժողովրդի իրաւունքների հաստատման: Երեսուներկու տարի առաջ Իրանի ազատատենչ, հայրենասէր, բարեպաշտ ու քաջարի ժողովուրդը ներշնչւած Իսլ. յեղափոխութեան ռահվիրայ ու առաջնորդ հանգուցեալ Էմամ Խոմէյնիի կրօնական ու բարոյական ճշմարտութիւններով յագեցած յորդորներից, պատգամներից ու ժողովրդանւէր եւ ժողովրդամէտ կոչերից՝ մէկ մարդու նման ոտքի կանգնեց ու փորձեց վերականգնել իր արժանապատւութիւնն ու կրօնական եւ ազգային ինքնուրոյնութիւնը: Երեսուներկու տարի առաջ տեղի ունեցած Իրանի Իսլ. յեղափոխութիւնը ոչ միայն Իրանը, այլեւ ամբողջ տարածաշրջանը իմաստաւորեց եւ լիցքաւորեց նոր գաղափարախօսութեամբ եւ մէկ անգամ եւս շեշտեց կրօնի ու կրօնականի անփոխարինելի դերը՝ ժողովուրդների կեանքի զարգացման ընթացքի մէջ: Հանգուցեալ Էմամ Խոմէյնին փոքր տարիքից լիցքաւորւած կրօնական առողջ ոգով եւ դաստիարակութեամբ՝ առաջնորդեց իր ժողովրդին՝ նրան առաւել եւս մօտեցնելով յաւիտենական ճշմարտութիւնների: Իրանի Իսլ. յեղափոխութեան ներքին ու յատկապէս արտաքին թշնամիները փորձեցին խափանել այդ նւիրական յեղափոխութիւնը եւ երբ չկարողացան, այս անգամ տարածաշրջանը պարտադիր պատերազմով բռնկեցրին: Իրաքում ամերիկեան ու արեւմտեան կայսերապաշտութեան գործակալ Սադդամ Հուսէյնին քաջալերեցին եւ մոլորեցրին, որպէսզի Իրանի Իսլ. յեղափոխութեամբ հետզհետէ առաւել եւս աճող ու զարգացող ժողովրդին մղեն պարտադիր պատերազմի՝ կասեցնելու եւ կամ վերացնելու Իրանում այլեւս ամրագրւած Իսլամական յեղափոխութիւնը: Սակայն, պատիւ Իրանի ողջ ժողովրդին, որ առանց սեռի ու տարիքի, կրօնի եւ գաղափարական խտրութեան՝ մէկ մարդու նման՝ կուրծք տւեց թշնամուն՝ ի պահպանութիւն եւ պաշտպանութիւն իր երկրի տարածքային ամբողջականութեան ու խաղաղութեան պահպանման: Ութ երկար տարիներ Իրանի Իսլ. Հանրապետութեան հաւատաւոր ու հաւատացեալ քաղաքացին կռւեց ու պաշտպանեց իր հայրենիքը, եւ ի վերջոյ կարողացաւ տէր կանգնել թէ՛ իր յեղափոխութեանը, եւ թէ՛ յեղափոխութեամբ կերպարանափոխւած իր երկրին: Պատմութեան վկայութեամբ ու հաստատումով՝ իրանահայ հաւատաւոր քաղաքացին իր հոգեւոր առաջնորդների եւ ղեկավարների հետ միասին, իր իրանցի եղբայրների եւ քոյրերի կողքին, կանգնեց թէ՛ խաղաղութեան, եւ թէ՛ պատերազմի ողջ տեւողութեան եւ իր արեամբ առաւել եւս նւիրականացրեց իր հայրենի հողը: Հայ ժողովուրդը իր ողջ պատմութեան ընթացքում միշտ հաւատացած է եղել յեղափոխութեանն ու յեղափոխութեամբ իրականացւող եւ նւիրագործւող արժէքներին ու ճշմարտութիւնների: 22 Բահմանը մնալու է որպէս պայծառ ու սերունդներին ներշնչող լուսաշող թւական: Այս առիթով մէկ անգամ եւս ոգեկոչում ենք յիշատակը յեղափոխութեան առաջնորդի՝ Էմամ Խոմէյնիի եւ յանուն յեղափոխութեան նահատակւած տասնեակ, այլեւ հարիւրհազարաւոր նահատակների: Ողջունում ենք Իրանի Իսլ. յեղ. հոգեւոր առաջնորդ այաթ. Խամենէիին, հանրապետութեան վսեմաշուք նախագահին ու մեր երկրի քաջարի բանակին եւ ողջ ժողովրդին ու բոլորին յայտնում նաեւ մեր եւ մեր ժողովրդի շնորհաւորանքներն ու սրտագին բարեմաղթանքները՝ վստահեցնելով բոլորին, որ իրանահայ համայնքը իր ողջ էութեամբ զօրավիգ է յեղափոխութեանը, հայրենիքի պաշտպանութեան եւ նրա քաղաքակրթական ու մշակութային կեանքի առաւել զարգացման եւ աճման ի խնդիր տարւող աշխատանքների: Փառք Իրանի Իսլ. յեղափոխութիւնը կերտող հանգուցեալ Էմամ Խոմէյնիին եւ իր բոլոր գաղափարակից հանգուցեալ գործակիցներին: Փառք մեր բիւրաւոր նահատակներին եւ հազար փառք ու պատիւ մեր ժողովրդի բոլոր զաւակներին, Իրանի Իսլ. Հանրապետութեան բանակին, որ ամէն վայրկեան զգաստ եւ արթուն ու քաջակորով ոգով պաշտպանում է իր հայրենիքը: ՍԵՊՈՒՀ ԱՐՔ. ՍԱՐԳՍԵԱՆ ԱՌԱՋՆՈՐԴ ԹԵՀՐԱՆԻ ՀԱՅՈՑ ԹԵՄԻ

---