Արդիականացւում է Չայկովսկու անուան դպրոցի ձայնադարանը
21-01-2011 15:38:00 | Հայաստան | Հասարակութիւն
ԵՐԵՎԱՆ, 21 ՅՈՒՆՎԱՐԻ, ՆՈՅԵԱՆ ՏԱՊԱՆ: «Հայաստան» համահայկական
հիմնադրամի Շվեյցարիայի տեղական մարմնի նախաձեռնութեամբ ու
հովանաւորութեամբ հիմնանորոգւում ու արդիականացւում է Երեւանի
Չայկովսկու անուան հանրակրթական երաժշտական դպրոցի ձայանադարանը
(աուդիո-վիզուալ լաբորատորիան): «Հայաստան» համահայկական
հիմնադրամի մամլոյ հաղորդագրութեան, այն կհամալրուի ժամանակակից
սարքավորումներով ու երաժշտական գործիքներով, այդ թւում` 7 ջութակ,
2 գալարափող, 2 ալտ, 1 թավջութակ եւ 2 հոբոյ:
«Մինչ այսօր փորձել ենք բաւարարուել խորհրդային տարիներին ձեռք
բերուած գործիքներով եւ անչափ ուրախ ենք, որ մեր սփիւռքահայ
բարեկամների շնորհիւ դրանք համալրվեցին նորերով, իսկ 20-ամեայ
դադարից յետոյ կվերաբացուի նաեւ մեր գալարափողի դասարանը»,- ասել է
դպրոցի տնօրէն Մարտուն Կոստանդեանը:
Հաստատութիւնը գործում է 1939 թուականից եւ միակ երաժշտական
դպրոցն է Հայաստանում, որը համատեղում է մասնագիտական ու
հանրակրթական ուսուցումը: Դպրոցի տնօրէնի խօսքով, այսօր դպրոցում
ուսանում է աւելի քան 530 աշակերտ, եւ որպէս կանոն, Երեւանի
Կոմիտասի անուան պետական կոնսերուատորիայի ուսանողների շուրջ 80%-ը
Չայկովսկու անուան դպրոցի շրջանաւարտներն են լինում:
«Հիմնադրամի Շվեյցարիայի տեղական մարմնի ստանձնած այս
ծրագիրը, ինչ խօսք, կարեւոր է, քանի որ մեր պատանի երաժիշտների
համար պարապմունքների պատշաճ պայմաններ են ստեղծւում, ինչը, վստահ
եմ, ի վերջոյ կտանի նրանց դէպի մեծ բեմեր ու յաղթանակներ»,- նշել է
«Հայաստան» համահայկական հիմնադրամի գործադիր տնօրէն Արա
Վարդանեանը: