Հայաստանի տաղաւարը լաւագոյնն է ճանաչուել Բելառուսում
անցկացուած Ազգային մշակոյթների հանրապետական 8-րդ փառատոնում
10-06-2010 13:26:00 | Հայաստան | Քաղաքական
ԳՐՈԴՆՈ, 10 ՅՈՒՆԻՍԻ, ՆՈՅԵԱՆ ՏԱՊԱՆ: Յունիսի 4-6-ին Բելառուսի
Գրոդնո քաղաքում անցկացուած Ազգային մշակոյթների հանրապետական 8-րդ
փառատօնին մասնակցել են Բելառուսում բնակուող 34 ազգութիւնների
ներկայացուցիչներ, այդ թւում Բելառուսի 6 մարզերի եւ մայրաքաղաք
Մինսկի հայ համայնքների ներկայացուցիչները:
Ըստ ՀՀ ԱԳՆ Մամուլի եւ տեղեկատուութեան վարչութեան
հաղորդագրութեան, փառատոնում ամենաբարձր գնահատականի են արժանացել
հայկական պարի, կենցաղի ներկայացումները, խոհանոցը, ինչի շնորհիւ
էլ հայկական տաղաւարը ճանաչուել է լաւագոյնը:
Փառատոնի հանդիսաւոր բացմանը մասնակցել է աշխատանքային
այցելութեամբ Գրոդնոյի մարզ ժամանած Բելառուսում ՀՀ դեսպան Արմէն
Խաչատրեանը: Գրոդնոյի մարզպետ Սեմիոն Շապիրոյի հետ ունեցած
հանդիպման ընթացքում նա բարձր է գնահատել Բելառուսում բնակուող
ազգութիւնների համերաշխ գոյակցմանը նպատակաուղղուած Բելառուսի
պետական քաղաքականութիւնը, երկրի իշխանութիւնների կողմից
բելառուսահայության նկատմամբ ցուցաբերուող ջերմ եւ ուշադիր
վերաբերմունքը:
ՀՀ դեսպանը եւ մարզպետը քննարկել են նաեւ հայ-բելառուսական
ապակենտրոնացուած, մասնաւորապէս` ՀՀ Շիրակի մարզի եւ Բելառուսի
Գրոդնոյի մարզի միջեւ փոխշահավետ համագործակցութեան յետագայ
զարգացման հետ կապուած հարցեր:
Գրոդնոյի հայ համայնքի հետ հանդիպմանը Ա.Խաչատրեանը
տեղեկացրել է ՀՀ ներքաղաքական կարեւոր իրադարձութիւնների, արտաքին
քաղաքականութեան ասպարէզում ծառացած խնդիրների եւ դրանց լուծմանն
ուղղուած քայլերի մասին: ՀՀ դեսպանը կարեւորել է Հայաստան-Սփիռք
կապերի առաւել ընդլայնման եւ խորացման գործընթացի շրջանակներում
բելառուսահայ համայնքի ներգրավվածության եւ Հայաստանի հետ
գործակցութեան զարգացման անհրաժեշտութիւնը: