Յունիսի 11-ին Մայր Աթոռ Ս. Էջմիածնում գումարուած «Ճգնաժամը Սիրիայում. մարտահրաւէրներ հաւատքի համայնքների համար» թեմայով միջազգային խորհրդակցութիւնն իր աշխատանքները շարունակեց նաեւ յունիսի 12-ին:
Նոյն օրը խորհրդակցութեան մասնակիցները, ուղեկցութեամբ Դամասկոսի հայոց թեմի առաջնորդ Տ. Արմաշ եպիսկոպոս Նալբանդեանի եւ Մայր Աթոռի Միջեկեղեցական յարաբերութիւնների բաժնի տնօրէն Տ. Յովակիմ եպիսկոպոս Մանուկեանի, այցելեցին Ծիծեռնակաբերդի յուշահամալիր` յարգանքի տուրք մատուցելու Հայոց Ցեղասպանութեան նահատակների յիշատակին: Յուշահամալիրում կատարուեց նաեւ Հոգեհանգստեան կարգ:
Երեկոյեան` խորհրդակցութեան ամփոփիչ նիստից յետոյ, Ս. Գայանէ վանքում, նախագահութեամբ Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի եւ մասնակցութեամբ Մայր Աթոռի միաբանների ու խորհրդակցութեան մասնակիցների, կատարուեց խաղաղութեան աղօթք Սիրիայի համար:
Արարողութիւնից առաջ Տ. Յովակիմ եպիսկոպոս Մանուկեանը աղօթակից ժողովրդին ներկայացրեց Մայր Աթոռում գումարուած խորհրդակցութեան նպատակն ու արդիւնքները` հրաւիրելով նաեւ Սիրիայում խաղաղութեան հաստատմանն ուղղուած ջանքերին շաղախելու աղօթք:
Արարողութեան ընթացքում տարբեր Քրիստոնէական Եկեղեցիների ներկայացուցիչներ իրենց առանձնական աղօթքով հայցեցին, որ Բարձրեալի օգնականութեամբ խաղաղութիւնն ու համերաշխութիւնը վերահաստատուեն Սիրիայում, եւ Սիրիայի աստուածասէր ժողովուրդը վերագտնի իր ապահով ու բնականոն կեանքի ընթացքը:
ԴԱՍ. ՀԱՅԵՐԵՆ 
Հայերեն
Русский
English
French
