Տրանսպորտի եւ կապի նախարարութիւնում Վերահսկիչ պալատի
կատարուված ստուգումների արդիւնքները հիասթափեցնող են
30-03-2010 19:38:00 | Հայաստան | Տնտեսութիւն
ԵՐԵՎԱՆ, 30 ՄԱՐՏԻ, ՆՈՅԵԱՆ ՏԱՊԱՆ: Հայաստանի Վերահսկիչ պալատի
խորհուրդը մարտի 30-ի նիստում հաստատեց ՀՀ Տրանսպորտի եւ կապի
նախարարութեանը պետական նշանակութեան աւտոճանապարհների պահպանում
եւ շահագործում, տրանսպորտային օբյեկտների հիմնանորոգում ծրագրերով
պետական բիւջէից 2007-2008թթ.-ին յատկացուած միջոցների օգտագործման
նկատմամբ իրականացուած վերահսկողութեան արդիւնքների վերաբերեալ
ընթացիկ հաշուէտւութիւնը: Ինչպէս նիստին յաջորդած ասուլիսում
յայտնեց ՎՊ-ի նախագահ Իշխան Զաքարյանը, «արդիւնքները հիասթափեցնող
են»:
Ըստ նրա, մասնաւորապէս, պետական նշանակութեան
աւտոճանապարհների հիմնանորոգման համար յատկացուած միջոցների
նկատմամբ վերահսկողութիւնն իրականացուել է հիմնականում
փաստաթղթային ստուգումների, որոշ դէպքերում` նաեւ հսկիչ
չափագրումների միջոցով: Ստուգուել են 16 կապալառու
կազմակերպութիւններ: Ծրագրով նախատեսուած աշխատանքների իրականացման
համար յատկացուած 5 մլրդ 31 մլն դրամի ընդհանուր ծաւալից հսկիչ
չափագրման է ենթարկուել 972 մլն 41 հազար դրամը: Արդիւնքում,
յայտնաբերուել է 201 մլն դրամի ծավալագնային յաւելագրում, որը
միանշանակ պէտք է վերադարձուի պետբիւջէ, 123 մլն դրամի
նախահաշուային թանկացում, 1 մլն 635 հազար դրամի անորակ
աշխատանքներ, 19 մլն 801 հազար դրամի անարդիւնաւէտ ծախս: Նա
յաւելեց նաեւ, որ բազմաթիւ անգամներ խօսուել է նախահաշուային եւ
գների արհեստական թանկացումների մասին, «սակայն սառոյցը տեղից չի
շարժւում»:
ՎՊ-ի նախագահը նշեց նաեւ, որ նախարարութիւնը, ըստ էութեան,
ձեւական մօտեցում է ցուցաբերել կատարուված աշխատանքների ընդունման
հարցում: Մասնաւորապէս, ընդունման ակտերի ուսումնասիրութեամբ
պարզուել է, որ դրանք ստորագրուել են նախարարութեան 2-3
աշխատակիցների կողմից, ընդ որում` առանց որեւէ խախտման
արձանագրման: Ըստ Ի.Զաքարյանի, ակտերը ստորագրելուց առաջ նրանք
պէտք է տեղում ուսումնասիրած լինէին կատարած աշխատանքների որակը,
մինչդեռ` այդ դէպքում նրանք մէկ ամսում 3 հազարից աւելի կմ
երկարությամբ ճանապարհային հատուածները ստուգելու համար օրական պէտք
է ուսումնասիրած լինէին առնուազն 117 կմ երկարությամբ
ճանապարհահատուած, ինչն անհնար է:
Ի.Զաքարյանը գոհունակութեամբ յայտնեց, որ տրանսպորտի եւ կապի
նորանշանակ նախարար Մանուկ Վարդանեանի հետ ի յայտ եկած խնդիրների
համատեղ քննարկումից յետոյ եղել է նախարարի «բաւականին խիստ
արձագանքը», ինչը համոզմունք է ներշնչում, որ յետագայ ստուգումներն
այլեւս նման արդիւնքներ չեն արձանագրի: Նշուեց նաեւ, որ ստուգուած
16 կազմակերպութիւններն արդէն ներկայացրել են ՎՊ-ի կողմից
արձանագրուած ֆինանսական խախտումների վերականգման յստակ
ժամանակացույց: