Գիւղատնտեսութեան նախարարը չի պատրաստւում հրաժարական տալ
16-03-2010 15:06:00 | Հայաստան | Տնտեսութիւն
ԵՐԵՎԱՆ, 16 ՄԱՐՏԻ, ՆՈՅԵԱՆ ՏԱՊԱՆ: «Ես չեմ պատրաստւում
հրաժարական տալ, եւ իմ կուսակցութիւնը գոհ է իմ աշխատանքից»:
Մարտի 16-ի ասուլիսում Հայաստանի գիւղատնտեսութեան նախարար
Գերասիմ Ալավերդեանն այսպէս պատասխանեց այն հարցին, թէ ինչպե՞ս է,
որ «Օրինաց երկիր» կուսակցութեան միւս նախարարների պաշտօնից
հեռացվելուց յետոյ ինքը դեռ շարունակում է աշխատել, այն էլ` ՀՀ
կառավարութեան նիստում վարչապետի կողմից նկատողութիւն ստանալուց
յետոյ: Նկատողութիւն ստանալու փաստը Գ.Ալավերդեանը որակեց որպէս
«աշխատանքային գործընթաց», միաժամանակ նշելով, որ վարչապետի հետ
ունի շատ լաւ աշխատանքային յարաբերութիւններ:
Յիշեցնենք, որ ՀՀ վարչապետի վերահսկողական ծառայութեան կողմից
կատարուված ուսումնասիրությունների արդիւնքում
Գյուղնախարարությունում յայտնաբերուել են մի շարք լուրջ
բացթողումներ, եւ վարչապետի յանձնարարութեամբ աշխատանքից ազատելու
համար ծառայողական քննություն է անցկացուելու նախարարութեան երկու
քաղծառայողի նկատմամբ:
Ըստ Գ.Ալավերդեանի, այսուհետ գիւղատնտեսութեան նախարարութեան
գնումների մրցոյթներն անցկացուելու են լրագրողների ներկայութեամբ:
Նա միաժամանակ նշեց, որ պետական գնումերի գործընթացում
յայտնաբերուած թերութիւնների պատճառով բիւջէին վնաս չի հասցուել,
քանի որ 2010թ.-ին դեռ պատուաստանիւթ ձեռք չի բերուել:
Գ.Ալավերդեանը նաեւ բացառեց այդ ոլորտում մենաշնորհի
առկայութիւնը: «Եթէ մենաշնորհային կազմակերպութիւն լինի, գոնէ
ես` որպէս գիւղատնտեսութեան նախարար, պէտք է իմանամ, թէ ոչ: Ես
կազմակերպութեան տնօրենին առաջին անգամ տեսել եմ մրցոյթից
անմիջապէս յետոյ»,- ասաց Գ.Ալավերդեանը, լրագրողների պնդումներից
յետոյ նշելով, որ այդ կազմակերպութիւնը «Բիոունիվերսալ ՍՊԸ-ն է,
իսկ տնօրէնը` Տիգրան Սահակեանը»: