Մարսելում տեղի է ունեցել ցեղասպանութիւնների ժխտման
քաղաքականութեան հակազդման վերաբերեալ միջոցառում
09-03-2010 22:20:00 | Հայաստան | Քաղաքական
ՍՏԵՓԱՆԱԿԵՐՏ, 9 ՄԱՐՏԻ, ՆՈՅԵԱՆ ՏԱՊԱՆ: Ֆրանսիական Մարսել
քաղաքում օրերս տեղի է ունեցել Amnesie Internationale
կազմակերպութեան հինգերորդ միջոցառումը, որը նուիրուած էր 20-րդ դարի
ցեղասպանութիւնների ժխտմանը հակազդելու քաղաքականութեանը: Ըստ ԼՂՀ
ԱԳՆ-ի մամուլի ծառայութեան, մտաւորականութեան եւ արուեստի մի շարք
ներկայացուցիչների հետ մէկտեղ միջոցառմանը մասնակցել է Ֆրանսիայում
ԼՂՀ-ի մշտական ներկայացուցիչ Յովհաննէս Գեւորգեանը:
Ելոյթ ունենալով կայացած կլոր սեղանի ընթացքում,
Հ.Գեւորգեանը կանգ է առել 1988թ.-ի ադրբեջանական Սումգայիթ
քաղաքում հայերի զանգվածային ջարդերի վրայ եւ նշել, որ խորհրդային
իշխանութիւնների եւ միջազգային հանրութեան կողմից պատշաճ
գնահատական չստանալով` նմանատիպ վայրագություններ կազմակերպուեցին
Ադրբեջանի հայաբնակ քաղաքներում, իսկ այնուհետեւ վերածուեցին
Լեռնային Ղարաբաղի դէմ լայնամասշտաբ պատերազմի: Միաժամանակ նա նշել
է, որ ցեղասպանութիւնների եւ զանգվածային ջարդերի քաղաքական
մակարդակով դատապարտումը կանխելու է նոր ողբերգությունները: