Մայր Աթոռ Սուրբ Էջմիածնում տեղի ունեցաւ շքանշանների յանձնման արարողութիւն
27-02-2015 12:34:56 | | Հասարակութիւն
Փետրուարի 26-ին Մայր Աթոռ Սուրբ Էջմիածնում` Գեւորգեան հոգեւոր ճեմարանի հանդիսութիւնների դահլիճում, Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի բարձր նախագահութեամբ տեղի ունեցաւ շքանշանների յանձնման հանդիսաւոր արարողութիւն:
Հայրենանուէր ու ազգօգուտ ծառայութեան, ինչպէս նաեւ արուեստի, առողջապահութեան եւ գիտութեան ոլորտներում ունեցած պատկառելի վաստակի համար Հայաստանեայց Առաքելական Սուրբ Եկեղեցու «Սուրբ Սահակ-Սուրբ Մեսրոպ» պատուոյ բարձր շքանշաններ յանձնուեցին ՀՀ արուեստի վաստակաւոր գործիչ, արուեստաբան տիար Շահէն Խաչատրեանին, ՀՀ գլխաւոր վիրաբոյժ, «Էրեբունի» եւ «Նաիրի» բժշկական կենտրոնների վիրաբուժական կլինիկաների ղեկավար, ՀՀ ՊՆ եւ ՆԳՆ գլխաւոր խորհրդատու պրոֆ. Յովհաննէս Սարուխանեանին ու ՀՀ ԱՆ գլխաւոր մանկաբարձ-գինեկոլոգ, Պերինատոլոգիայի, մանկաբարձութեան եւ գինեկոլոգիայի ինստիտուտի տնօրէն, ՀՀ ԳԱԱ թղթակից անդամ պրոֆ. Ռազմիկ Աբրահամեանին:
Արարողութիւնը բացուեց միասնական Տէրունական աղօթքով, ապա ողջոյնի խօսքով հանդէս եկաւ Մայր Աթոռի դիւանապետ Գերաշնորհ Տ. Արշակ եպիսկոպոս Խաչատրեանը: Սրբազանն ուրախութիւն յայտնեց, որ վաստակաշատ նուիրեալ հայորդիներն արժանացել են Ամենայն Հայոց Կաթողիկոսի գնահատանքին եւ օրհնութեանը:
Մեծարեալների կեանքին ու ազգանուէր գործունէութեանն անդրադարձան Մայր Աթոռի Արխիւի եւ թանգարանների տնօրէն Տ. Ասողիկ քահանայ Կարապետեանը, բժշկական գիտութիւնների դոկտոր-պրոֆէսոր Մուշեղ Միրիջանեանը, ՀՀ ԳԱԱ բնական գիտութիւնների բաժանմունքի ակադեմիկոս-քարտուղար Վիլեն Յակոբեանը:
Այնուհետեւ «Էջ Միածինն ի Հօրէ» շարականի երգեցողութեան ներքոյ բերուեցին Հայրապետական երեք սրբատառ կոնդակները:
Մայր Աթոռի Վարչատնտեսական բաժնի տնօրէն Տ. Մուշեղ եպիսկոպոս Բաբայեանն ընթերցեց տիար Շահէն Խաչատրեանին ուղղուած Հայրապետական կոնդակը, որում մասնաւորապէս նշուած է. «…Մեծարգոյ պրն. Խաչատրեան, անձնապէս ճանաչում ենք Ձեզ եւ քաջածանօթ ենք արուեստի հանդէպ հաւատաւոր հայորդուդ անսահման սիրուն: Այսօր ուրախ առիթ ունենք բարձրօրէն գնահատելու Ձեր վաստակը ի նպաստ հայ գեղանկարչութեան զարգացման, որին ամբողջանուէր սիրով ի սպաս էք բերել Ձեր ջանքերն ու կարողութիւնները կեանքի ողջ ընթացքին:
Տակաւին երիտասարդ տարիքում հայ գեղանկարչութեան տաղանդաշատ, մեծանուն երախտաւորի` Մարտիրոս Սարեանի հրաւէրով Դուք պաշտօնավարման կոչուեցիք նկարչի նորաստեղծ թանգարանում եւ երկար տարիներ Վարպետի բծախնդիր հայեացքի ներքոյ վարեցիք տնօրէնի պատասխանատու պաշտօնը: Հայաստանի անկախութեան տարիներին ղեկավարեցիք նաեւ Պետական պատկերասրահը` դժուարին այդ օրերին նուիրեալ ջանքեր բերելով ի խնդիր հայ գեղարուեստի մեծագոյն կենտրոնի արդիւնաւոր գործունէութեան:
Որպէս հմուտ արուեստաբան եւ թանգարանային գործի գիտակ` Դուք հեղինակեցիք մասնագիտական հարուստ գրականութիւն, կազմակերպեցիք ցուցադրութիւններ բազմաթիւ երկրներում` հետամուտ լինելով մեր ժողովրդի ստեղծած ու սրբութեամբ պահպանած մշակութային ժառանգութիւնն աշխարհում ճանաչելի դարձնելու ազգանուէր գործին: Տասնեակ տարիներ աննուազ նախանձախնդրութեամբ փնտրեցիք եւ աշխարհի տարբեր երկրներից հայրենի թանգարաններ վերադարձրեցիք հայ մեծանուն վարպետների վրձնած բազմաթիւ բարձրաճաշակ ստեղծագործութիւններ:
Այսօր առանձնակի գոհունակութիւն է Մեզ համար անդրադառնալ, որ Մեր հրաւէրին ընդառաջ, Դուք սիրով յանձն առաք Ձեր հարուստ գիտելիքներն ու կարողութիւնները ի սպաս բերել Մայր Աթոռ Սուրբ Էջմիածնի թանգարանների գործունէութեանը: Ամենօրեայ Ձեր աշխատանքի մէջ Մենք ականատես ենք մեր Եկեղեցու եւ Մայր Աթոռ Սուրբ Էջմիածնի հանդէպ գեղարուեստի անխոնջ նուիրեալիդ որդիական անկեղծ սիրուն ու նախանձախնդրութեանը, որով զարադարում էք Ձեր կեանքի ընթացքը»:
Մայր Աթոռի լուսարարապետ Տ. Հովնան եպիսկոպոս Յակոբեանը ներկայացրեց տիար Յովհաննէս Սարուխանեանին ուղղուած Հայրապետական կոնդակը, որում նշուած է. «Ամենայն Հայոց Մայր Աթոռ Սուրբ Էջմիածնից Հայրապետական Մեր օրհնութիւնն ու բարեմաղթանքներն ենք բերում Ձեզ` Առաքելական մեր Սուրբ Եկեղեցու հաւատաւոր ու նուիրեալ զաւակիդ:
Յարգարժան պրն. Սարուխանեան, Դուք աւելի քան կէս դար` իբրեւ առողջապահութեան ու կրթական գործի նուիրեալ մշակ, արդիւնաւորութեամբ ծառայում էք հաւատաւոր մեր ժողովրդին:
Երիտասարդ տարիքից Դուք բազմաթիւ պատասխանատու պաշտօններ ստանձնեցիք մեր երկրի բժշկական հաստատութիւններում` Ձեր գիտելիքներն ու ազնիւ ջանքերը ներդնելով ի նպաստ մեր ժողովրդի բարօրութեան: Բարձրակարգ բժշկի հարուստ փորձառութեամբ Դուք օգնել էք առողջական խնդիրների առջեւ յայտնուած բազմաթիւ հայորդիների` նրանց հոգիներին պարգեւելով յոյս ու լաւատեսութիւն: Ձեր երկարամեայ վաստակը արժանիօրէն գնահատուած է պետական ու հասարակական բազմաթիւ պարգեւներով ու կոչումներով:
Ուրախ ենք անդրադառնալու նաեւ, որ ղեկավարելով Մ. Հերացու անուան Երեւանի Բժշկական համալսարանի Վիրաբուժութեան ամբիոնը` Դուք աննուազ եռանդով ներդնում էք Ձեր կարողութիւնները, որպէսզի հաստատութիւնը կրթի ու պատրաստի գիտակ ու կարող մասնագէտներ: Այսօր Ձեր բազմաթիւ սաներ շարունակողն են Ձեր երախտարժան գործի:
Բեղմնաւոր է նաեւ Ձեր գիտական գործունէութիւնը: Ձեր հարիւրաւոր աշխատութիւնները, գրքերն ու յօդուածները նպաստել են բժշկական գիտութեան զարգացմանը` ճանաչում բերելով շնորհաշատ հայորդուդ նաեւ մեր երկրի սահմաններից դուրս»:
Մայր Աթոռի Քրիստոնէական դաստիարակութեան կենտրոնի տնօրէն Տ. Վարդան եպիսկոպոս Նաւասարդեանն ընթերցեց տիար Ռազմիկ Աբրահամեանին ուղղուած Հայրապետական կոնդակը, որում ասուած է. «Մեծարգոյ պրն. Աբրահամեան, Մայր Աթոռ Սուրբ Էջմիածնից բերում ենք Ձեզ Հայրապետական Մեր օրհնութիւնն ու բարեմաղթանքները:
Ճանաչում ենք Ձեզ անձնապէս եւ քաջատեղեակ ենք Ձեր բեղմնաւոր գործունէութեանը: Գոհունակութեամբ ենք անդրադառնում, որ Դուք տասնեակ տարիներ գնահատարժան վաստակ էք բերում Հայրենի մեր երկրում առողջապահութեան ոլորտի, յատկապէս ծննդօգնութեան զարգացման կարեւոր գործին: Ձեր անունը քաջածանօթ է մեր ժողովրդին եւ երախտագիտութեամբ է յիշւում շատերի շուրթերին, որոնց ծառայել էք սիրով ու հոգատարութեամբ եւ ի սպաս բերել շնորհաշատ բժշկի Ձեր հարուստ փորձառութիւնն ու գիտելիքները, որպէսզի մանկան ծնունդով օրհնուեն հայ օջախները, լցուեն բերկրանքով ու խնդութեամբ:
Այսօր Դուք ձեռնահասօրէն ղեկավարում էք մեր երկրի առաջատար բժշկական հաստատութիւններից Վերարտադրողական առողջութեան, Պերինատոլոգիայի, Մանկաբարձութեան եւ Գինեկոլոգիայի Հանրապետական ինստիտուտը, ջանքեր բերելով, որպէսզի Հայաստանում արդիւնաւէտօրէն կիրառուեն ժամանակակից գիտական ու տեխնոլոգիական ձեռքբերումները:
Գովարժան է նաեւ Ձեր գիտայ-կրթական վաստակը: Դուք երկար տարիներ ղեկավարում էք Մխիթար Հերացու անուան պետական բժկական համալսարանի Մանկաբարձութեան եւ գինեկոլոգիայի ամբիոնը` հոգու ողջ նուիրումով Ձեր կարելին ի սպաս դնելով բժիշկների նոր սերնդի պատրաստութեան գործին: Դուք հեղինակել էք նաեւ բազմաթիւ գիտական յօդուածներ, դասագրքեր ու ուսումնասիրութիւններ, որոնք արժանապէս գնահատուած են բժշկագիտութեան ասպարէզում»:
Կոնդակների ընթերցումից յետոյ Ամենայն Հայոց Կաթողիկոսը Հայ Եկեղեցու «Սուրբ Սահակ-Սուրբ Մեսրոպ» շքանշաններով զարդարեց մեծարեալների կուրծքը` ի գնահատութիւն ազգային եւ հասարակական կեանքում նրանց բերած մեծ աւանդի:
Պարգեւաբաշխութեան առիթով իրենց սրտի խօսքն ասացին նաեւ ցերեկոյթի երեք մեծարեալները` Հայ Եկեղեցու կողմից իրենց ընծայուած բարձր պատուի ու պարգեւի համար երախտագիտութիւն յայտնելով Հայոց Հայրապետին:
Այնուհետեւ երաժշտական կատարումներով հանդէս եկան «Նոր անուններ» ծրագրի մասնակից պատանի երաժիշտ-կատարողները` ղեկավարութեամբ Սիլուայ Մեքինեանի:
Հանդիսութիւնն ամփոփուեց Ամենայն Հայոց Կաթողիկոսի օրհնութեան խօսքով: Նորին Սրբութիւնը մասնաւորապէս ընդգծեց, որ անձնապէս հաղորդ է եղել շնորհընկալների նուիրեալ գործունէութեանը, տեսել է, թէ պատասխանատուութեան ինչպիսի բարձր զգացումով են իրենց մասնագիտական կարողութիւնները ծառայեցնում ժողովրդին: Բարձրօրէն գնահատելով Հայ Եկեղեցու շքանշանակիրների վաստակն ու ծառայութիւնը ազգին եւ Հայրենիքին` Վեհափառ Հայրապետը մաղթեց, որ իրենց կեանքը շարունակեն ապրել Աստծու օրհնութեան մէջ եւ ժողովրդի սէրն անպակաս լինի նրանցից:
Հանդիսութեանը ներկայ էին Գերագոյն հոգեւոր խորհրդի անդամները, մեծարեալների գործընկերները, առողջապահութեան ոլորտի ներկայացուցիչներ եւ մշակոյթի գործիչներ:
ԴԱՍ. ՀԱՅԵՐԵՆ 
Հայերեն
Русский
English
French
