Արամ Ա. Կաթողիկոս ընդունեց Պէյրութի մարոնիթ Արքեպիսկոպոս Մաթարին
10-01-2011 17:51:22 | | Մամլո հաղորդագրություն
ԱՆԹԻԼԻԱՍ - Երկուշաբթի 10 Յունուար 2011-ի առաւօտուն, Արամ Ա. Կաթողիկոս Վեհարանի իր գրասենեակին մէջ ընդունեց այցելութիւնը Պէյրութի մարոնիթ Արքեպիսկոպոս Մաթարին: Յայտնենք, որ Մաթար միաժամանակ կաթոլիկ եկեղեցիները կը ներկայացնէ որպէս նախագահ Միջին Արեւելքի Եկեղեցիներու Խորհուրդէն ներս:
Սոյն աշխատանքային հանդիպման ընթացքին քննարկուեցան Միջին Արեւելքի Եկեղեցիներու Խորհուրդը դիմագրաւող մտահոգութիւնները ու յատկապէս՝ Միջին Արեւելքի Եկեղեցիներու Խորհուրդը աւելի կազմակերպելու կարելիութիւնները: Այս ծիրէն ներս, Վեհափառ Հայրապետը եւ Մաթար Արքեպիսկոպոս յարմար նկատեցին, որ Միջին Արեւելքի Եկեղեցիներու Խորհուրդի Գործադիր վարչութիւնը բացառիկ նիստ մը ունենայ յառաջիկայ Փետրուարին Անթիլիասի Մայրավանքին մէջ՝ քննարկելու համար Խորհուրդը ու ընդհանրապէս եկեղեցիները յուզող հարցերը: Ապա անոնք կապ հաստատեցին Ուղղափառ եկեղեցիներու ընտանիքը ներկայացնող որպէս նախագահ Երուսաղէմի յոյն Պատրիարք Թէոֆիլոս Բ.-ին հետ եւ Միջին Արեւելքի Բողոքական եկեղեցիներու ընտանիքը ներկայացնող որպէս նախագահ Մունիպ Եունան Եպիսկոպոսին հետ:
ԴԱՍ. ՀԱՅԵՐԵՆ 
Հայերեն
Русский
English
French