ԵՐԵՒԱՆ, 11 ԴԵԿՏԵՄԲԵՐԻ, ՆՈՅԵԱՆ ՏԱՊԱՆ: Դեկտեմբերի 10-ին տեղի ունեցաւ «Մարդու իրաւունքների եւրոպական դատարանի վճիռների դերն ու նշանակութիւնը ՀՀ իրաւական համակարգում» թեմայով իրաւաբան ուսանողների հանրապետական գիտաժողովի եզրափակիչ փուլը: Հայաստանի երիտասարդ իրաւաբանների ասոցիացիայի եւ Հոլանդական Ստրիչտինգ Օքսֆամ Նովիբ հիմնադրամի կազմակերպած գիտաժողովը նուիրուած էր «Մարդու իրաւունքների եւ հիմնարար ազատութիւնների պաշտպանութեան մասին» եւրոպական կոնուենցիայի ընդունման 60 ամեակին: Գիտաժողովը բաղկացած էր 2 փուլից՝ գրաւոր եւ բանաւոր: Գիտաժողովին մասնակցելու յայտ էին ներկայացրել 14 ուսանողներ՝ Երեւանից եւ ՀՀ մարզերի իրաւաբանական բուհերից եւ բուհերի իրաւաբանական ֆակուլտետներից: Գրաւոր փուլին մասնակցեցին սահմանուած ժամկէտներում կազմակերպիչներին իրենց զեկոյցները ներկայացրած 8 իրաւաբան ուսանողներ: Ներկայացուած հինգ լաւագոյն աշխատանքների հեղինակներն իրաւունք ստացան մասնակցելու բանաւոր փուլին: Նրանք զեկոյցներում անդրադարձել էին Մարդու իրաւունքների եւրոպական դատարանի նախադէպային իրաւունքին, ընդդէմ Հայաստանի Հանրապետութեան կայացրած Միեդ-ի վճիռներին եւ դրանց կատարման գործընթացին: Գիտաժողովի բանաւոր փուլի յաղթող եւ լաւագոյն հռետոր ճանաչուեց Եւրոպական կրթական տարածաշրջանային ակադեմիայի 3-րդ կուրսի ուսանողուհի Շուշանիկ Թադեւոսեանը եւ արժանացաւ գիտաժողովի երրորդ մրցանակին: «Լաւագոյն գրաւոր զեկոյց» մրցանակին արժանացաւ Երեւանի պետական համալսարանի մագիստրատուրայի 1-ին կուրսի ուսանողուհի Անահիտ Յարութիւնեանը եւ արժանացաւ գիտաժողովի երկրորդ մրցանակին: Իսկ գիտաժողովի յաղթող ճանաչուեց ՀՀ գիտութիւնների ազգային ակադեմիայի Գիտակրթական միջազգային կենտրոնի մագիստրատուրայի երկրորդ կուրսի ուսանող Գէորգ Յակոբեանը: Ըստ Հայաստանի երիտասարդ իրաւաբանների ասոցիացիայի տարածած հաղորդագրութեան, գիտաժողովի յաղթողները ստացան արժէքաւոր մրցանակներ եւ համապատասխան հաւաստագրեր: Գրաւոր փուլի միւս մասնակիցները եւս արժանացան մասնակցութեան հաւաստագրերի եւ մրցանակների:

---