ՀՀ կառավարութեան մայիսի 5-ի նիստում ընդունած մօտ մէկ տասնեակ որոշումներով կանոնակարգուել է կենսաթոշակների նշանակմանը, վերահաշուարկմանը, վճարմանն առնչուող յարաբերութիւնները` դրանով իսկ կատարելով 2011թ. յունուարի 1-ին ուժի մէջ մտած «Պետական կենսաթոշակների մասին» ՀՀ օրէնքի պահանջները եւ սահմանելով կենսաթոշակի նշանակման, աշխատանքային ստաժի հաշուարկման եւ բազմաթիւ այլ կարգեր եւ ցանկեր: Գործադիրը նաեւ որոշել է Արեւմտեան Հայաստանում եւ Օսմանեան Թուրքիայի այլ վայրերում մինչեւ 1915 թուականը (ներառեալ) ծնուած եւ Հայոց ցեղասպանութիւնը վերապրած հայերին տալ 25 հազար դրամ ամենամսեայ դրամական օգնութիւն` այն վճարելով իւրաքանչիւր ամսուայ կենսաթոշակի հետ ընդհանուր գումարով: Որոշումներից մէկով սահմանուել է, որ կենսաթոշակի վճարման ցուցակները 5 տարուայ փոխարէն պէտք է պահպանուեն 10 տարի, ինչը հնարաւորութիւն կը տայ կենսաթոշակի վճարման առնչութեամբ ծագած խնդիրները կարգաւորել նաեւ այդ ցուցակների օգնութեամբ:

---