Արարողութեանը ներկայ էին կենտրոնի բարերարներ տէր եւ տիկին Հայկ եւ Էլզա Տիտիզեանները, Տիտիզեան ընտանիքի անդամներ, ՀՀ վարչապետ Հովիկ Աբրահամեանը, թեմակալ առաջնորդներ, Մայր Աթոռի բարերարներ եւ այլ հիւրեր:

Այս առիթով, մինչեւ կենտրոնի բացումը, երջանկայիշատակ Գարեգին Ա Ամենայն Հայոց Կաթողիկոսի շիրիմի առջեւ կատարուեց հոգեհանգստեան կարգ:

«Գարեգին Ա» կրթական կենտրոնի առջեւ հիւրերին ողջունեց Մայր Աթոռի հոգեւոր-կրթական հաստատութիւնների վերատէուչ Գերաշնորհ Տ. Գեւորգ եպիսկոպոս Սարոյեանը, ով «Գարեգին Ա» կենտրոնի ստեղծումը վերջին տասնամեակում Մայր Աթոռի կրթական գործունէութեան ոլորտում գրանցուած լաւագոյն ձեռքբերումներից մէկը դիտարկեց: 

«Այս կենտրոնի ստեղծումը դարձեալ վկայում է, որ Մայր Աթոռը սրբօրէն պահում է սեփական առաքելութեանը բնորոշ աւանդոյթները, որն իր դարաւոր գոյութեան ընթացքում հաւատն ու գիտութիւնը երբեք իրար հակառակ չի դիտել, այլ միմեանց փոխլրացնող, ամբողջացնող: Վեհափառ Տէր, Ձեր հովուապետութեան ընթացքում այն գաղափարն արմատաւորեցիք , որ Հայոց Եկեղեցու բարեկարգումը հնարաւոր է միայն հոգեւոր կրթութիւնը համապատասխան որակի բարձրացնելու պայմանով: Այս լոյսի ներքոյ սոյն կենտրոնի հիմնումը նաեւ գնահատանքի եւ յարգանքի տուրք է Ձեր նախորդի՝ Գարեգին Ա Կաթողիկոսի յիշատակին. մարդու, ում մտապատկերում հոգեւորականն ու գիտնականը նոյն նպատակին են ծառայում», - նշեց Սրբազանը:

Այնուհետեւ Վեհափառ Հայրապետը եւ բարերաներ Հայկ եւ Էլզա Տիտիզեանները կտրեցին «Գարեգին Ա» կրթական կենտրոնի մուտքի ժապաւէնը, որով պաշտօնապէս ազդարարուեց կենտրոնի բացումը: 

Կրթական կենտրոնի դահլիճում արարողութեան մասնակիցները դիտեցին Գարեգին Ա Հայրապետին նուիրուած ֆիլմը, ապա, հանդիսապետութեամբ Ամենայն Հայոց Հայրապետի, կատարուեց նորաբաց կենտրոնի օրհնութեան կարգը: 

Արարողութեան աւարտին Նորին Սրբութիւնն իր օրհնութիւնն ու պատգամը փոխանցեց ներկաներին:

«Ուրախութեամբ եւ սիրով ողջունում ենք ամէնքիդ ներկայութիւնը հայոց հոգեւոր կենտրոնում` Մայր Աթոռ Սուրբ Էջմիածնում: Յիրաւի, պատմական օրեր ենք ապրում Լուսաւորչահիմն Մայր Աթոռում: Երեկ Ամենախնամ Տիրոջ բարեսէր կամքով կատարեցինք Սրբալոյս Միւռոնի օրհնութեան արարողութիւնը, եւ տակաւին թարմ են հոգեպարար այն զգացումները, որ համակել էին ամէնքիս սրտերը: Այսօր եւս տօնական նոյն ոգին է թեւածում Մայր Աթոռում. առիթը Մեր սիրելի բարերարներ տէր եւ տիկին Հայկ եւ Էլզա Տիտիզեանների ազնիւ յանձնառութեամբ կեանքի կոչուող «Գարեգին Ա» կրթական կենտրոնի կառոյցն է, որի շինարարական աշխատանքները, կամօքն Աստուծոյ, իրենց բարեյաջող աւարտին պիտի հասնեն առաջիկային: Փառք ու բարեբանութիւն Երկնաւոր Տիրոջը, որ աստուածասէր մեր ժողովրդին պարգեւել է ազնուասիրտ բարերար զաւակներ, ովքեր իրենց եռանդն ու կարողութիւնները սիրայօժար կերպով ծառայեցնում են ի բարօրութիւն մեր Հայրէնքի եւ ի պայծառութիւն Առաքելական Մեր Սուրբ Եկեղեցու:

Երջանկայիշատակ Գարեգին Ա Հայրապետի անունը կրող այս կենտրոնը մեր Եկեղեցու հոգեւոր-կրթական ասպարէզում կարեւոր առաքելութիւն է ստանձնելու: Կենտրոնի հարկից ներս իրենց գիտելիքները պիտի հարստացնեն եւ կատարելագործեն մեր Եկեղեցու հոգեւոր սպասաւորները, ուսուցիչներն ու կրթութեան ոլորտի այլ ներկայացուցիչներ: Կրթական կենտրոնում նպաստաւոր պայմաններ են ստեղծւում  նաեւ հայագիտական ու աստուածաբանական հարցերի շուրջ գիտաժողովներ կազմակերպելու համար:

Դարեր շարունակ հայ հոգեւորականն ու հայ ուսուցիչն են կրթել մեր ժողովրդին կերտել հոգեւոր-բարոյական նկարագիրը, որով ազգս ապրել է, ստեղծել հարուստ դպրութիւն ու մշակոյթ, յաղթահարել փորձութիւններ եւ հաւատով նայել գալիքին։ Հոգելոյս Գարեգին Ա Հայրապետն էլ՝ իբրեւ հոգեւորական եւ ուսուցիչ, իր գրական եւ աստուածաբանական ծաւալուն ժառանգութեան մէջ մշտապէս եղաւ մեր հաւատքի, մեր լեզուի, մշակոյթի, մեր հայրենիքի ջատագովն ու պաշտպանը:

«Գարեգին Ա» կրթական կենտրոնը մշտավառ է պահելու յիշատակը լուսահոգի Հայրապետի, նրա անձը եւ կեանքի անցած ուղին օրինակ ու խրախոյս դարձնելով եւ ոգեշնչելով ու նոր լիցքեր հաղորդելով երիտասարդ հոգեւորականներին եւ ուսուցիչներին:

Սիրելի Հայկ եւ Էլզա, կրթական այս կենտրոնի կառուցման աստուածահաճոյ նախաձեռնութիւնն իր մէջ խտացնում է հոգելոյս Հայրապետի հանդէպ ունեցած Ձեր ազնիւ ու ջերմ զգացումները, Ձեր մեծ սէրն ու նուիրումը: Յիրաւի, այդ բացառիկ զգացումների արգասիքն ու վկայութիւններն են Գարեգին Ա Հայրապետի յիշատակը յաւէրժացնող արժանաւոր Ձեր գործերը: Երանաշնորհ Հայրապետի սրտում փայփայած ու կեանքի վերջին օրերին ձեզ փոխանցած տեսլական իղձն է հայագիտութեան ու աստուածաբանութեան կենտրոնի կառուցումը, որն այսօր իրական դարձած` նպաստ է բերելու մեր ժողովրդի հոգեւոր, գիտակրթական ու մշակութային կեանքի առաջընթացին: Երջանկայիշատակ Հայոց Հայրապետի հանդէպ տածած Ձեր խորին յարգանքի եւ նրա լուսաւոր յիշատակի առջեւ խոնարհումի դրսեւորումն է նաեւ նրա գրական ժառանգութեան եւ անտիպ էջերի հրատարակութեան նախաձեռնութիւնը, որ տակաւին շարունակում էք՝ նոր կեանք ու նոր շունչ տալով Գարեգին Ա Հայրապետի հոգեմտաւոր ճառագայթումներին: Այս պահին, սիրելի բարերարներ, հոգելոյս Հայրապետը երկնքից օրհնում է Ձեզ եւ Ձեր աստուածահաճոյ բարի իրագործումները», - ասաց Հայոց Հայրապետը:

Նորին Սրբութիւնը վերստին իր բարձր գնահատանքը բերեց Տիտիզեան ընտանիքին` մաղթելով նորանոր ձեռքբերումներ եւ ազգասէր ու եկեղեցաշէն գործոց յաջողութիւններ:

Վեհափառ Հայրապետը նաեւ իր օրհնութիւնը բերեց կառոյցի ճարտարապետներ Արտաւազդ Նազարէթեանին ու Արամ Սահակեանին եւ շինարար Ստեփան Ախոյեանին:

Վերջում Գարեգին Բ Հայրապետը մաղթեց, որ Գարեգին Ա լուսահոգի Հայրապետի սերմանած յունդերը շարունակեն նոր ծիլեր արձակել եւ առատ, բարի պտուղներ պարգեւեն մեր ժողովրդին, եւ օրհնեալ ճանապարհ ցանկացաւ «Գարեգին Ա» կրթական կենտրոնի առաքելութեանը: