Կառավարութեան կողմից խորհրդարան ներկայացուած առաջարկը նուազագոյն աշխատավարձի վերաբերեալ որեւէ կերպ չի ապահովելու քաղաքացիների նուազագոյն պահանջների բաւարարումը, այն բաւականին հեռու է կենսապահովման նուազագոյն զամբիւղից։ Ազգային ժողովի խմբակցութիւնների հոկտեմբերի 29-ի ճեպազրոյցում այս մասին նշեց «Ժառանգութիւն» խմբակցութեան անդամ Արմէն Մարտիրոսեանը, ընդգծելով, որ ըստ փորձագիտական գնահատականների, կենսապահովման նուազագոյն զամբիւղը կազմում է մօտ 45 հազար դրամ։ Պատգամաւորը նշեց, որ կառավարութիւնը չի իրականացնում քաղաքականութիւն՝ ուղղուած նուազագոյն աշխատավարձի, հանրային ծառայողների աշխատավարձի եւ թոշակների բարձրացմանը, թէեւ ունի հնարաւորութիւն բիւջէն համալրել համապատասխան գումարներով։ Ըստ նրա, հարկեր-հնայ յարաբերակցութիւնը 2011թ. բիւջէում նախատեսուած է ընդամէնը 17,3 տոկոս, մինչդեռ բոլոր հարեւան պետութիւնները առնուազն 25 տոկոս հարկեր-հնայ յարաբերակցութիւն էն ապահովում։ «Աւտոմեքենաների պարտադիր ապահովագրութեան գործընթացով մի քանի տնտեսվարողի գրպան հսկայածաւալ գումարներ էն մտնելու՝ մօտ 20 մլրդ դրամ։ Եթէ իշխանութիւնները ցանկանան նմանատիպ գործիքներ կիրառել պետութեան համար, գումարներ միշտ էլ կարելի գտնել»,- ասաց Արմէն Մարտիրոսեանը։ Պանրի շուրջ 20 տոկոսանոց աճը մթերման գներով պայմանաւորելու Տնտեսական մրցակցութեան պաշտպանութեան յանձնաժողովի պատճառաբանութիւնը, պատգամաւորի գնահատմամբ, հերթական անգամ փորձ է «որոշ խաղացողների պաշտպանել» եւ անհիմն է։

---