ԵՐԵՎԱՆ, 8 ԱՊՐԻԼԻ, ՆՈՅԵԱՆ ՏԱՊԱՆ: Ապրիլի 8-ին Հայաստանի
Ազգային Ժողովի Հասարակայնութեան եւ լրատւութեան միջոցների հետ
կապերի վարչութիւնը հանդէս է եկել հետեւեալ պարզաբանմամբ.
«Հայաստանի Հանրապետութիւնը յայտարարել է, որ կողմ է
հայ-թուրքական յարաբերութիւնների կարգաւորմանը եւ
արձանագրութիւնների վավերացմանն առանց նախապայմանների: ՀՀ նախագահ
Սերժ Սարգսեանը բազմիցս ներկայացրել է Հայաստանի դիրքորոշումը, որը
մնում է անփոփոխ: «Հիւրիեթ»-ի եւ միւս լրատվամիջոցների կողմից ՀՀ
ԱԺ նախագահ Հովիկ Աբրահամեանին վերագրւող յայտարարութիւնը չի
համապատասխանում իրականութեանը, ինչը խորհրդարանի նախագահը մէկ
անգամ եւս վերահաստատեց Ազգային ժողովի ապրիլի 8-ի նիստում»:
Թուրքական պարբերականը եւ որոշ այլ լրատվամիջոցներ,
մասնաւորապէս, յայտնել էին, որ ԱԺ-ի նախագահը ապրիլի 6-ին
մեկնարկած հերթական լիագումար նիստում, օրակարգի հաստատման
ժամանակ, իբր ասել էր, թէ օրակարգում ընդգրկուած հայ-թուրքական
արձանագրութիւնները կքննարկուեն ապրիլի 6-8-ի նիստերում:
Մինչդեռ, ինչպէս «ՆՏ»-ն տեղեկացրել էր դեռեւս ապրիլի 6-ին,
Հ.Աբրահամեանը` ի պատասխան ընդդիմադիր «Ժառանգութիւն»
խմբակցութեան ղեկավար Ստյոպա Սաֆարեանի հարցին, յայտնել էր, որ
հարցն օրակարգից հանելու վերաբերեալ գործադիր իշխանութեան կողմից
առաջարկութիւն չի ներկայացուել: Հարցն օրակարգում է, «քանի որ
ռեսուրսներ դեռ կան քննարկելու Հայաստանի եւ Թուրքիայի միջեւ
ստորագրուած արձանագրութիւնների վաւերացման հարցը»,- ասել էր ԱԺ-ի
նախագահը: