Յուլիսի 6-ին, նախագահութեամբ Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի, Գեւորգեան հոգեւոր ճեմարանի հանդիսութիւնների դահլիճում կատարուեց ճեմարանի` 2015-2016 ուսումնական տարուայ փակման հանդիսութիւնը: 

 

Արարողութիւնը բացուեց միասնական Տէրունական աղօթքով, հնչեցին ՀՀ եւ Գեւորգեան հոգեւոր ճեմարանի օրհներգերը: Ապա խօսք ասաց Գեւորգեան հոգեւոր ճեմարանի տեսուչ Հոգեշնորհ Տ. Գարեգին վարդապետ Համբարձումեանը:

«Իւրաքանչիւր ուսումնական տարուայ աւարտ իր հետ խառը զգացումներ է բերում ճեմարանական մեր ընտանիքի կեանքում: Հիմնականում այդ զգացումները շաղախուած են ուսումնական ու հոգեւոր ձեռքբերումների բերկրանքով, ինչպէս նաեւ բացթողածը, թերացածը լրացնելու, շտկելու միտումով:

Այսօր Գեւորգեան հոգեւոր ճեմարանը փակում է 2015-2016 ուսումնական տարուայ իր մէկամեայ պատմութեան գիրքը` այն նորովի, նոր սպասումներով վերաբացելու խանդավառ ակնկալիքով:

Անցած տարուայ ընթացքին, միանալով այս հաստատութեան տեսչութեան առաքելութեանը` ինձ համար վերաբացայայտեցի, որ Սբ. Գեւորգեան տեսիլքով հիմնուած այս ճեմարանը` որպէս դարբնոց ոգու եւ մտքի, իր անվարան նաւարկութիւնն է կատարում Տիրոջ անդաստանում, ուր իւրաքանչիւրս` որպէս յաւէրժի ճամփորդ, պատմութեան մի հատուածում մասնակից ենք դառնում այս մեծ տեսիլքին», - նշեց Հայր Սուրբ իր խօսքում:

Ճեմարանի տեսուչն անդրադարձաւ ուսումնական հաստատութեան շարժող հիմնական ուժի` դասախօսական կազմի` կրթական գործընթացին բերած ներդրմանը` երախտագիտութիւն յայտնելով դասախօսական ողջ անձնակազմին ուսումնական տարուայ ընթացքում սրտացաւ ու նուիրեալ գործունէութեան, ինչպէս նաեւ տեսչութեան հետ համագործակցութեան համար: 

Հայր Գարեգինը տեսչական ու դասախօսական կազմի եւ ճեմարանականների անունից ճեմարանի եւ քահանայից պատրաստութեան լսարանի շրջանաւարտ սաներին մաղթեց իրենց անձերի յարանորոգ այլակերպութեան յոյսով առաջիկայ իրենց կեանքն ու ծառայութիւնը ուղենշել Ս. Գրքով եւ զօրացնել աղօթքով ու Տիրոջ հետ անբեկան հաղորդութեամբ:

Այնուհետեւ ճեմարանի տեսուչն անդրադարձաւ ուսումնական տարում արձանագրուած ձեռքբերումներին, որոնց թւում են «Գեւորգեան ճեմարան» էլ. պարբերականի թաղարկումը, Նիւ  Եօրքի Ս. Վլադիմիր Ուղղափառ ճեմարանի հետ համագործակցութեան համաձայնագրի ստորագրութիւնը եւ ուսանողների փոխանակման ծրագրերի մշակումը, Ճեմարանի տարեգրքի խմբագրումն ու տպագրութիւնը, արտադասարանային տարբեր դասախօսութիւնների ու միջոցառումների կազմակերպումը` Օքսֆորդի, Ստրասբուրգի եւ միջազգային հեղինակաւոր այլ հաստատութիւնների, ինչպէս նաեւ Հայաստանի տարբեր բուհերի հիւր դասախօսների մասնակցութեամբ, «Շողակաթ» հեռուստաընկերութեան հետ համատեղ «Դասախօսութիւններ ճեմարանում» խորագրի ներքոյ տեսագրուած եւ յատուկ ձեւաւորուած դասախօսութիւնների շարքի պատրաստումը, ճեմարանցիների այցելութիւնները միջազգային ու հայաստանեան բարեսիրական մի շարք կազմակերպութիւններ, ինչպէս նաեւ սոցիալական ծառայութիւնը էջմիածնի ու շրջանների կարիքաւոր ընտանիքներին եւ այլն:

Այնուհետեւ երաժշտական կատարումներով հանդէս եկան Գեւորգեան հոգեւոր ճեմարանի երգչախումբը` ղեկավարութեամբ ՀՀ արուեստի վաստակաւոր գործիչ Յարութիւն Թօփիկեանի եւ «Էջմիածին» երգչախումբը` ղեկավարութեամբ բարեշնորհ Արթուր սարկաւագ Վարդանեանի: Ուսանողութեան անունից խօսք ասաց աւարտական 6-րդ լսարանի սան Բարեշնորհ Մանաւազդ սարկաւագ Մկրտչեանը, իսկ Թովմաս Առաքելեանը (1-ին լսարան)  ասմունքեց Պ. Սեւակի «Քիչ ենք, բայց հայ ենք» բանաստեղծութիւնը:

Հանդիսութեան ընթացքում տեղի ունեցաւ նաեւ նուիրաբաշխութիւն. ձեռամբ Ամենայն Հայոց Կաթողիկոսի ուսման մէջ բարձր առաջադիմութեան, կարգապահութեան եւ այլ արժանիքների համար պարգեւների արժանացան տարբեր ուսանողներ:

Հանդիսութիւնն ամփոփուեց Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի հայրապետական պատգամի ու օրհնութեան խօսքով:

Գոհունակութեամբ անդրադառնալով անցնող տարում ճեմարանում իրականացուած արդիւնաւոր աշխատանքին` Վեհափառ Հայրապետն իր գնահատանքը յայտնեց Մայր Աթոռի հոգեւոր-կրթական հաստատութիւնների վերատեսուչ Գերաշնորհ Տ. Գեւորգ եպիսկոպոս Սարոյեանին եւ տեսուչ Հայր Սուրբին` իրենց նախանձախնդիր ու նուիրեալ աշխատանքի համար, տեսչական անձնակազմի ներկայացուցիչներին, դասախօսական կազմին եւ յատկապէս ճեմարանականներին, որ այս ուսումնական տարեշրջանը փորձեցին լաւագոյնս ծառայեցնել իրենց անձերի ծառայութեանը, գիտելիքի ամբարմանը:

«Մենք փառք ենք տալիս Աստծուն, որ տարէցտարի առաջադիմութիւն ենք տեսնում, տենում ենք, որ ճեմարանի հարկի ներքոյ աճում, հասակ են առնում եւ ձեւաւորւում գիտակից երիտասարդներ, ովքեր, հաւատքի ապրումն իրենց մէջ կրելով, ծառայանուիրումի բարձր գիտակցութեամբ գալիս են իրենց անձն ընծայաբերելու մեր ժողովրդի սպասաւորութեանը: Եւ գոհունակութիւն է Հայրապետիս համար հաստատել, որ շնորհիւ մեր եկեղեցական սպասաւորների ջանադիր, նուիրեալ, հաւատաւոր ծառայութեան, աստիճանաբար վերականգնւում է Հայոց Եկեղեցու վարկը մեր ժողովրդի կեանքում, նաեւ գիտելեաց պաշարի հետ միասին խորանում է հաւատքը մեր հաւատաւոր զաւակներ կեանքում», - ընդգծեց Նորին Սրբութիւնը:

Հայոց Հովուապետը յորդորեց ճեմարանականներին ուսումնառութեան ժամանակաշրջանը լաւագոյնս օգտագործել. ոչ միայն գիտելիքներ ամբարել, այլեւ աղօթքի մէջ կերտել իրենց գործերը, զօրացնել իրենց հաւատքի ապրումն ու զգացումը, որպէսզի այդ հաւատքի բոյրով յագենա ժողովրդի կեանքը, այդ հաւատքով շէնանայ Հայրենիքը ու պայծառանայ Ս. Եկեղեցին: 

Գարեգին Բ Կաթողիկոսը, խօսելով եկեղեցականների ծանր ու պատասխանատու կոչման եւ հաւատքի կարեւորութեան մասին, նշեց, որ կրթական հաստատութեան հարկի ներքոյ ընտրեալներ են պատրաստւում` ծառայութեան կոչուելու Եկեղեցու առաքելութեան ասպարէզում: «Եկեղեցականը պէտք է կարողանայ ոչ միայն Կենաց Բանի քարոզիչը լինել, ոչ միայն հոգեւոր-բարոյական դաստիարակը լինել, այլ նա պէտք է կարողանայ հաւատքի կերտողը լինել անհատի, անձի հոգում, որպէսզի այս հաւատքը հրաշագործի մարդու էութեան մէջ, կարողանայ կեանքը ապրումի ու գործի վերածել եւ գեղեցիկ իրագործումներով զարդարել մարդկային կեանքը: 

Այս հաստատութեան ներքոյ այս հաւատքի մարդիկ են, որ պէտք է կերտուեն, որովհետեւ եթէ այս հաստատութեան մէջ ուսում առնող եւ շրջանաւարտ դարձող անձը հաւատքը չկրի իր մէջ, չի կարող այն սերմանել իրեն վստահուած հաւատացեալ հոգիներում: Եթէ այդ հաւատքի կերտումն ու սերմանումը` իբրեւ ձեռնհաս, բարի ու նախանձախնդիր հովիւ, չկարողացաւ իրագործել, պիտի մարդկային կեանքում պակասեն այդ հաւատքից բխած գործերը, եւ մարդկային կեանքը պիտի օրհնութիւններից զրկուած եւ դժգոյն դառնայ: Հաւատքն է, որ զգեստաւորում է կեանքը գեղեցիկ արարումներով, հարստացնում աստուածահաճոյ գործերով եւ այն դարձնում հաճելի, ինչպէս հասարակութեան իւրաքանչիւր անդամի, այպես եւ Երկնաւոր մեր Տիրոջ համար», - ասաց Հայոց Հայրապետը:

Վերջում Ամենայն Հայոց Հայրապետը հայցեց Երկնաւորի մշտական օրհնութիւնը երկրի, հայոց ազգի եւ մասնաւորապէս Հայոց Եկեղեցու կրթական հաստատութեան` եկեղեցականների մտքի եւ հոգու դարբնոցի համար: Նորին Սրբութիւնը նաեւ մաղթեց, որ Տէրն Իր շնորհներն առատօրէն հեղի ճեմարանի սաների եւ դասախօսների վրայ, որպէսզի հաստատութեան մէջ դաստիարակուի ժողովրդի ակնկալած սերունդը` իր նուիրեալ ծառայութեամբ շարունակելու մեր հայրերի փառաւոր ուղին:

Ցերեկոյթը եզրափակուեց հայրապետական «Պահպանիչ» աղօթքով:

Ճեմարանն անցնող տարում ունեցել է 104 ուսանող, հաստատութիւնում դասաւանդել է 71 դասախօս, որոնցից 45-ը` աշխարհական եւ 26-ը` հոգեւորական:

2015-2016 ուսումնական տարում ճեմարանն աւարտեց 18 սան:

 

  -   Մամլո հաղորդագրություն