Գերագոյն հոգեւոր խորհուրդը հանդէս է եկել յայտարարութեամբ
10-03-2017 16:47:49 | | Մամլո հաղորդագրություն
Մարտի 7-9-ը, նախագահութեամբ Ն.Ս.Օ.Տ.Տ. Գարեգին Բ Ծայրագոյն Պատրիարք եւ Ամենայն Հայոց Կաթողիկոսի, Մայր Աթոռ Ս. Էջմիածնում գումարուած Գերագոյն հոգեւոր խորհուրդը նիստերի ընթացքում անդրադարձ կատարեց ազգային կեանքին վերաբերող տարբեր հարցերի, այդ թւում նաեւ առաջիկայ խորհրդարանական ընտրութիւններին:
Վերջինիս առնչութեամբ Գերագոյն հոգեւոր խորհուրդը հանդէս եկաւ հետեւեալ յայտարարութեամբ.
«Հայաստանեայց Առաքելական Ս. Եկեղեցու տօնակարգով Մեծ պահքի խորհրդաշատ եւ աղօթական օրեր է ապրում աշխարհասփիւռ մեր ժողովուրդը, ինքնաքննութեան, զղջումի եւ ապաշխարութեան մի շրջան: Պահոց այս շրջանի ընթացքում` ապրիլի 2-ին, որը նաեւ նուիրական օր է մեր ժողովրդի համար ապրիլեան քառօրեայ պատերազմի մեր նահատակ զաւակների լոյս յիշատակով, տեղի են ունենալու ՀՀ Ազգային ժողովի հերթական ընտրութիւնները. կարեւոր իրադարձութիւն ազգային մեր կեանքում, շրջադարձային հանգրուան հայոց պետականաշինութեան մէջ: Առաջիկայ ընտրութիւններն առանձնակի նշանակութիւն ունեն մեր հայրենիքի համար` հունաւորելով անցումը նոր, խորհրդարանական կառավարման ձեւին եւ պայմանաւորելով նաեւ Մայր Հայաստանի յետագայ զարգացումը:
Գերագոյն հոգեւոր խորհուրդը դիմում է մեր Եկեղեցու զաւակներին եւ ՀՀ բոլոր քաղաքացիներին` մասնակցելու ընտրութիւններին հայրենիքի եւ մեր ժողովրդի ապագայի նկատմամբ պատասխանատուութեամբ ու նախանձախնդրութեամբ: Կոչ ենք անում քուէարկել խղճի մտօք, առկայ քաղաքական տարակարծութիւնների մէջ տեղի չտալ յուզումների, առաւել եւս` անհանդուրժողականութեան եւ հակառակութիւնների:
Յորդորում ենք բոլոր քաղաքական ուժերին եւ առաջադրուած թեկնածուներին նախընտրական եւ ընտրական գործընթացներում դրսեւորել խոհեմութեան, զսպուածութեան եւ փոխադարձ յարգանքի ոգի` բարի աւարտի հասցնելու ԱԺ ընտրութիւնները եւ մեր հայրենական կեանքը միասնաբար առաջնորդելու հայրենաշեն աստուածահաճոյ ճանապարհներով: Հայաստանեայց Առաքելական Ս. Եկեղեցին ողջունում է բոլոր այն ազնիւ ազգանուէր նախաձեռնութիւններն ու ձգտումները, որոնք ուղղուած են մեր ժողովրդի բարօրութեանն ու առաջընթացին, հայրենիքի խաղաղութեանը, զօրացմանն ու ապահովութեանը:
Աղօթքով առ Բարձրեալն Աստուած հայցում ենք Երկնաւորի օրհնութիւնը եւ Ամենախնամ Ս. Աջի հովանին մեր Հայրենիքին եւ աշխարհասփիւռ ժողովրդին»:
ԴԱՍ. ՀԱՅԵՐԵՆ 
Հայերեն
Русский
English
French