ՀՀ յատուկ քննչական ծառայութիւնում ոստիկանութեան աշխատակիցների կողմից պաշտօնէական դիրքի չարաշահման փաստով յարուցուած քրէական գործի նախաքննութիւնն աւարտուել է: Մեղադրանք է առաջադրուել 5 ոստիկանի:

 

Այսպէս, նախաքննութեամբ հիմնաւորուել է, որ ՀՀ ոստիկանութեան ճանապարհային ոստիկանութիւնծառայութեան տեսուչ Ռադիկ Ներսիսեանը, տեղեկանալով, որ 11.07.2016թ.-ին Լոռու մարզի Ագարակ գիւղում տեղի ունեցած վիճաբանութեան մասնակիցներից երկուսին դանակահարութեան հետեւանքով ծանր եւ միջին ծանրութեան մարմնական վնասուածքներ պատճառած անձն իր ազգական Միհրան Ներսիսեանն է, փորձել է վերջինիս ազատել քրէական պատասխանատուութիւնից: Այդ նպատակով ոստիկանը Մ. Ներսիսեանի ընկերոջը` դէպքին ականատես Վահագն Գեւորգեանին համոզել է ոստիկանութիւնում յայտնել, թէ, իբր, նշուած յանցագործութիւնը նա է կատարել` փոխարէնը երաշխաւորելով, որ ձերբակալումից յետոյ իր միջամտութեամբ ազատ կ'արձակուի: Վ. Գեւորգեանը, վստահելով Ռ. Ներսիսեանին, իրեն է վերագրել կատարուած յանցագործութիւնը եւ ձերբակալուել: Այնուհետեւ, վերջինիս տեսակցելու եւ իրականութիւնը թաքցնելու պայմանաւորուածութեան շուրջ կրկին խօսելու նպատակով, յիշեալ ոստիկանը մեկնել է Տաշիրի բաժնի ձերբակալուածներին պահելու վայր եւ առանց օրինական հիմքերի Վ. Գեւորգեանի հետ տեսակցութեան թոյլտուութիւններ ստացել: Մասնաւորապէս, Ռ. Ներսիսեանը ոստիկանութեան Տաշիրի բաժնի հերթապահ մասի հերթապահներ Արթուր Զաքարեանին եւ Վարդան Սուքիասեանին համոզել, դրդել է չարաշահել պաշտօնէական լիազօրութիւնները եւ ՀՀ կառավարութեան որոշմամբ հաստատուած ընթացակարգը խախտելով` առանց ոստիկանութեան ստորաբաժանման պետին համապատասխան դիմում, անձը հաստատող փաստաթուղթ ներկայացնելու եւ օրինական միւս հիմքերի թոյլատրել մուտք գործել Տաշիրի բաժնի ձերբակալուած անձանց պահելու վայր ու տեսակցել ծանր յանցագործութիւն կատարելու կասկածանքով ձերբակալուածին: Վերջիններս, գործընկերոջ խնդրանքը չմերժելու անձնական այլ շահագրգռուածութիւնից ելնելով, չարաշահել են իրենց պաշտօնէական դիրքը եւ յիշեալ կանոնակարգի դրոյթների խախտմամբ հնարաւորութիւն ընձեռել Ռ. Ներսիսեանին` ձերբակալուածին շարունակել համոզել նախաքննական մարմնից թաքցնել յանցագործութիւնն իրականում այլ անձի կողմից կատարուած լինելու հանգամանքը, որով էական վնաս է հասցուել պետութեան օրինական շահերին: Յետագայում` կալանաւորուելուց յետոյ, Վահագն Գեւորգեանը յիշեալ հանգամանքների վերաբերեալ Յատուկ քննչական ծառայութեանը տուել է գրաւոր հաղորդում, որի հիման վրայ էլ յարուցուել էր յիշեալ քրէական գործը: Կատարուած լրիւ, բազմակողմանի եւ օբյեկտիւ նախաքննութեան արդիւնքում բացայայտուել է ճշմարտութիւնն ու յանցագործութեան կատարման բոլոր հանգամանքները: Նշուած յանցաւոր արարքների կատարման համար Ռ. Ներսիսեանին մեղադրանք է առաջադրուել ՀՀ քրէական օրէնսգրքի 38-308- րդ յօդուածի, իսկ ԱՅ. Զաքարեանին եւ Վ. Սուքիասեանին` 308-րդ յօդուածի 1-ին մասերով: Բացի այդ, նոյն յօդուածով մեղադրանք է առաջադրուել ոստիկանութեան Տաշիրի բաժնի հերթապահ մասի եւս երկու տեսուչի, սակայն նրանց նկատմամբ քրէական հետապնդումը դադարեցուել է` գործուն զղջալու հիմքով. վերջիններս աջակցել են յանցագործութեան բացայայտմանը: Քրէական գործի նախաքննութիւնն աւարտուել է: Գործը մեղադրական եզրակացութեամբ յանձնուել է դատավարական հսկողութիւն իրականացնող դատախազին` այն հաստատելու եւ դատարան ուղարկելու համար: Ծանուցում. ենթադրեալ յանցանքի մէջ կասկածուողը կամ մեղադրուողը համարւում է անմեղ, քանի դեռ նրա մեղաւորութիւնն ապացուցուած չէ ՀՀ քրէական դատավարութեան օրէնսգրքով սահմանուած կարգով` դատարանի` օրինական ուժի մէջ մտած դատավճռով: © shamshyan.com http://shamshyan.com/hy/article/2017/03/21/1062165/

  -   Մարդու իրաւունքներ