Սամուէլ Բաբայեան. «Առանց ղարաբաղեան հիմնահարցի լուծման
Թուրքիան սահմանը չի բացի»
09-10-2009 21:00:00 | Հայաստան | Քաղաքական
ԵՐԵՎԱՆ, 9 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: «ԼՂ-ի հարցում մենք չենք
կարող փոխզիջման գնալ` թեկուզ մեր գլխից ատոմային ռումբ կախեն»,-
նման համոզմունք յայտնեց հոկտեմբերի 9-ի ասուլիսում ԼՂՀ-ի
պաշտպանութեան բանակի նախկին հրամանատար Սամուէլ Բաբայեանը: Ըստ նրա,
հայ-թուրքական նախաստորագրուած արձանագրություններում Ղարաբաղի
հարցի մասին ոչ թէ թաքնված, այլ պարզ ձեւով է ներկայացուած:
Ս.Բաբայեանի ունեցած տեղեկութիւնների համաձայն, առանց
ղարաբաղեան հիմնահարցի լուծման Թուրքիան սահմանը չի բացի: «Մենք
պէտք է զգոն լինենք եւ ամբողջ ուշադրութեամբ հետեւենք Ղարաբաղի
խնդրի խաղաղ կարգաւորման բանակցութիւններին»,- ասաց նա`
յաւելելով, որ ոչ ոք չի կարող Ղարաբաղի տարածքներից փոխզիջել.
կարող են այդ մասին խօսել, սակայն չեն կարող այն իրականացնել: «Ով
ուզում է լինի` Սերժ Սարգսեանը, թէ ես, կամ մէկ ուրիշը, չի կարող
դա անել: Թոյլ չեն տայ նրանք, ովքեր պատերազմել են Ադրբեջանի դէմ
եւ ազգատարել այդ հողերը»,- նշեց Ս.Բաբայեանը: Արցախի ժողովրդի
համար դա կեանքի եւ մահուան խնդիր է, եւ նրանք այլ բան չեն կարող
անել: «Նրանք պարզապէս պէտք է ճիշտ կազմակերպեն եւ պաշտպանեն այն
ինչ-որ ունեն: Պաշտպանեն նրանցից, ովքեր գնում են նման
փոխզիջումների` լինի դա հայ, թէ թուրք` տարբերութիւն չկայ»,-
յայտարարեց Ս.Բաբայեանը:
Նրա կարծիքով, սփիւռքեան հանդիպումներից ՀՀ նախագահը պէտք է
հետեւություններ անի եւ փորձի կամ փաստաթղթերում փոփոխութիւն
կատարել, կամ էլ վիժեցնել այդ գործընթացը: Հակառակ դէպքում,
Ս.Բաբայեանի խօսքերով, «հայ ազգը կպառակտուի թէ' ներսում, թէ'
դրսում»:
Ս.Բաբայեանի համոզմամբ, Հայաստանի կողմից արձանագրութիւնները
նախաստորագրուել են առանց արտաքին ուժերի ճնշման. Հայաստանը կամաւոր
է գնացել այդ քայլին: Նա նշեց նաեւ, որ ՀՅԴ-ն այլընտրանք չունի եւ
պարտաւոր է պայքարել այդ արձանագրութիւնների վաւերացման դէմ:
«Բոլորս պէտք է օգնենք Դաշնակցութեանը յաջողութեան հասնելու
համար»,- ասաց նա, յաւելելով, որ պատրաստ է անգամ պահանջել ՀՀ
նախագահի հրաժարականը: