Կայասցավ Իրան-Հայաստան երկաթուղու կառուցման ծրագրի
աշխատանքային խմբի եռակողմ երկրորդ հանդիպումը
27-01-2010 17:28:00 | Հայաստան | Տնտեսութիւն
ԵՐԵՎԱՆ, 27 ՅՈՒՆՎԱՐԻ, ՆՈՅԵԱՆ ՏԱՊԱՆ: Երեւանում յունվարի 27-ին
տեղի է ունեցել Իրան-Հայաստան երկաթուղու կառուցման ծրագրի
աշխատանքային խմբի եռակողմ` Հայաստան, Ռուսաստան, Իրան, երկրորդ
հանդիպումը: Ինչպէս «ՆՏ»-ի թղթակցին յայտնեց ՀՀ տրանսպորտի եւ կապի
նախարարի մամուլի քարտուղար Սուսաննա Տոնոյանը, հայկական կողմից
աշխատանքային հանդիպմանը մասնակցել են տրանսպորտի եւ կապի նախարարի
առաջին տեղակալ Հրանտ Բեգլարեանը, ռուսականից` ՌԴ տրանսպորտի
նախարարութեան Երկաթուղային տրանսպորտի պետական քաղաքականութեան
դեպարտամենտի տնօրէն Սերգեյ Տուգարինովը, «Ռուսական երկաթուղիներ»
ընկերութեան ներկայացուցիչները, իսկ իրանական կողմից` ԻԻՀ
ճանապարհների եւ տրանսպորտային հաղորդակցութեան փոխնախարար Մաջիդ
Ասադիի գլխաւորած պատուիրակութիւնը:
Հանդիպման ընթացքում Հ.Բեգլարեանը տեղեկացրել է, որ Ասիական
զարգացման բանկը երկաթուղու նախագծի տեխնիկատնտեսական հիմնավորման
աշխատանքների համար արդէն տրամադրել է 1 մլն ԱՄՆ դոլարի
դրամաշնորհ: Ըստ նրա, ապրիլին կյայտարարուի այդ աշխատանքներն
իրականացնող ընկերութեան ընտրութեան միջազգային մրցոյթ: Մրցոյթի
արդիւնքների ամփոփումից յետոյ կսկսուեն տեխնիկատնտեսական
հիմնավորման աշխատանքները: Նշուվել է նաեւ, որ ավստիրական ilF
ընկերութիւնն արդէն կատարել է Իրան-Հայաստան երկաթգծի
տեխնիկատնտեսական ուսումնասիրման նախնական աշխատանքները:
Անդրադառնալով ծրագրի ֆինանսաւորմանը, Հ.Բեգլարեանը յայտնել է, որ
ներկայումս բանակցութիւններ են վարւում Ասիական զարգացման բանկի
եւ Համաշխարհային բանկի հետ:
Մ.Ասադին նշել է, որ իրենք արդէն աւարտել են Իրան-Հայաստան
երկաթգծի Իրանի տարածքում մօտ 60 կմ կառուցուելիք հատուածի
տեխնիկատնտեսական հիմնավորման աշխատանքները: Ըստ նախարարի,
Իրան-Հայաստան երկաթգծի կառուցման դէպքում, իրանական կողմը պատրաստ
է իր միջոցներով կառուցել իրանական հատուածը:
Ս.Տուգարինովն անդրադարձել է կառուցուելիք երկաթուղու
տեխնիկական չափորոշիչներին, ինչպէս նաեւ տարանցիկության
հնարաւորութիւններին, այս ծրագրի ինտեգրացմանը` գործող միջազգային
տրանսպորտային միջանցքներին: Ս.Տուգարինովը նշել է նաեւ, որ
ռուսական կողմն իր գնահատականը ծրագրին կարող է տալ միայն
տեխնիկատնտեսական հիմնավորման աւարտից յետոյ:
Աշխատանքային խմբի յաջորդ հանդիպումը կկայանայ Իրան-Հայաստան
երկաթուղու տեխնիկատնտեսական հիմնավորման աշխատանքների աւարտից
յետոյ` Երեւանում: