ՀՀ մարդու իրաւունքների պաշտպան Կարէն Անդրէասեանը վերահաստատել է իր պատրաստակամութիւնը ցանկացած ժամանակ հանդէս գալ որպէս միջնորդ պետութեան եւ հասարակութեան տարբեր խմբերի միջեւ` ի շահ մարդու իրաւունքների պաշտպանութեան։ Պաշտպանի ապրիլի 29-ի յայտարարութիւնում ասուած է. «Հաշուի առնելով Հայ ազգային կոնգրէսի ու իշխանութիւնների միջեւ ձեւաւորուող քաղաքական երկխօսութեան ներկայիս զարգացումները, Շարունակելով հաւատալ, որ այդ երկխօսութիւնը կարող է յանգեցնել 2008 թուականի մարտի ցաւալի իրադարձութիւնների հետեւանքով մի շարք մարդկանց խախտուած իրաւունքների պաշտպանութեանը, Հաւաստելով, որ Մարդու իրաւունքների պաշտպանը պատրաստ է միջամտել քաղաքական գործընթացներին միայն ծայրայեղ անհրաժեշտութեան դէպքերում, այն էլ բացառապէս մարդկանց իրաւունքների պաշտպանութեան նպատակով, Ընդունելով Հայ ազգային կոնգրէսի եւ իշխանութիւնների պնդումները` միջնորդի կարիք չունենալու մասին եւ ներկայ իրավիճակում նպատակայարմար չհամարելով կողմերին ներկայացնել գրաւոր առաջարկներ, Վերահաստատելով իմ պատրաստակամութիւնը ցանկացած ժամանակ հանդէս գալ որպէս միջնորդ պետութեան եւ հասարակութեան տարբեր խմբերի միջեւ` ի շահ մարդու իրաւունքների պաշտպանութեան, Դիմելով յատկապէս մեր այն համաքաղաքացիներին, ովքեր գտնում են, որ 2008 թուականի մարտի ցաւալի իրադարձութիւնների հետեւանքով դեռեւս վերականգնուած չեն իրենց խախտուած իրաւունքները` Յայտնում եմ, որ Մարդու իրաւունքների պաշտպանի աշխատակազմը կը շարունակի նշուած խնդիրների լուծմանն ուղղուած իրավիճակի իր դիտորդական գործառոյթը, ինչպէս նաեւ պատրաստ է ընդունել անհատական դիմումներ այս եւ այլ խնդիրների առնչութեամբ»:

---