Ըստ Հրանտ Բագրատեանի, սահմանի բացման դէպքում Հայաստանի
օլիգարխացված տնտեսութիւնը բախուելու է թուրքական ոչ կենտրոնացուած
եւ դինամիկ մասնաւոր սեկտորին
09-10-2009 20:00:00 | Հայաստան | Տնտեսութիւն
ԵՐԵՎԱՆ, 9 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Հայ-թուրքական սահմանի
բացուելու դէպքում, ընդհանուր առմամբ, առեւտուրը թոյլ կտայ
էժանացնել արտադրութիւնը Հայաստանում: Սակայն, ինչպէս հոկտեմբերի
9-ի ասուլիսում նշեց ՀՀ նախկին վարչապետ Հրանտ Բագրատեանը, «տեղի է
ունենալու մի հետաքրքիր երեւոյթ, որը կարող է ամէն ինչ խառնել
իրար»:
Նրա խօսքերով, Հայաստանի կենտրոնացուած օլիգարխացված
տնտեսութիւնը բախուելու է թուրքական ոչ կենտրոնացուած, ոչ
օլիգարխացված, դինամիկ մասնաւոր սեկտորին: «Մենք չունենք մասնաւոր
ձեռներեց, որը կարող է Թուրքիայի հետ քյալա տալ: Սկզբում թուրքական
կապիտալը կբախվի Հայաստանի օլիգարխների հետ: Բայց թուրքերն այնքան
հիմար չեն, որ գան Հայաստանում մասնաւոր ձեռներեցներին զարգացնեն:
Շուտ-ուշ թուրքերը կսկսեն աշխատել այդ օլիգարխների միջոցով` լաւ
հասկանալով, որ ինչքան օլիգարխների ուժը մեծ է, այնքան Հայաստանը
չի զարգանա»,- ասաց Հ.Բագրատեանը:
Ըստ նրա, թուրքական միջին ձեռներեցը շատ աւելի դինամիկ է, շատ
աւելի գրագէտ եւ շատ աւելի զարգացած, քան հայաստանեանը: Այդ իսկ
պատճառով պէտք է պատրաստուել տնտեսական յարաբերութիւններին: «Մենք
առաջին անգամ ենք շփուելու թուրքերի հետ պատմութեան հազարամեայ շփման
ընթացքում, երբ որ թուրքերը մեզանից զարգացած են բոլոր
առումներով»,- նշեց Հ.Բագրատեանը: