ԵՐԵՎԱՆ, 12 ՕԳՈՍՏՈՍԻ, ՆՈՅԵԱՆ ՏԱՊԱՆ: Օգոստոսի 28-ին Սեւանում կմեկնարկի «Երաժիշտները յանուն խաղաղութեան» միջազգային երաժշտական առաջին փառատոնը, որին կմասնակցեն ռոք եւ բլիւզ ժանրերում ստեղծագործող երգիչներ եւ խմբեր Հայաստանից, Վրաստանից եւ Անգլիայից` այդ թւում «Ռե մինոր», «Ռեինկարնացիա», «Դորիանս», «Բամբիռ», «Սթրինգ», «Բաքուր», «Սմայլ», «Վովա Մագիլաձե», «Ամրիտա» խմբերը: Փառատոնի կազմակերպիչը «Ֆորշ ընդ ֆրենդս» ընկերութիւնն է, իսկ յովանաւորներն ու աջակիցները ՀՀ Էկոնոմիկայի, Տրանսպորտի եւ կապի, Մշակոյթի եւ Սփիւռքի նախարարութիւնները: Ինչպէս օգոստոսի 12-ի ասուլիսում յայտնեց Էկոնոմիկայի նախարարութեան Զբօսաշրջութեան եւ տարածքային տնտեսական զարգացման վարչութեան պետ Մեխակ Ապրեսեանը, նմանատիպ միջոցառումների օգնութեամբ է պէտք խթանել զբօսաշրջութեան զարգացումը Հայաստանում: Նա հոյս յայտնեց, որ փառատոնը կդառնայ աւանդական: Երգիչ Ֆորշը նշեց, որ փառատոնի նպատակն է ակտիւացնել հայ երաժիշտների համագործակցութիւնը միջազգային երաժշտական կազմակերպութիւնների եւ խմբերի հետ, Հայաստանը միջազգային հանրութեանն ու համաշխարհային զբոսաշրջային շուկային ժամանակակից ժամանցային ռեսուրսներով եւ հարուստ մշակոյթային աւանդոյթներով ներկայացնելը:

---