ԵՐԵՒԱՆ, 5 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Հոկտեմբերի 5-ին Հայաստանի Ազգային ժողովը քննարկեց «Ժառանգութիւն» խմբակցութեան հեղինակած «Լեռնային Ղարաբաղի Հանրապետութիւնը ճանաչելու մասին» օրէնքի նախագիծը: Այն գլխադասային` Արտաքին յարաբերութիւնների մշտական յանձնաժողովի դրական եզրակացութեան չէր արժանացել, սակայն հեղինակների կողմից ճանաչուել էր արտահերթ, ուստի ԱԺ կանոնակարգ-օրէնքի համաձայն, առանց քուէարկութեան ներառուել էր ԱԺ նստաշրջանի օրակարգ եւ քննարկուեց արտահերթ կարգով: Հիմնական զեկուցողի` «Ժառանգութիւն» կուսակցութեան առաջնորդ եւ Աժ-ի նոյնանուն խմբակցութեան անդամ Րաֆֆի Յովհաննիսեանի առաջարկութեամբ, օրինագծի քուէարկութիւնը յետաձգուեց մինչեւ յաջորդ հերթական քառօրեայ: Քննարկման ընթացքում բոլոր ելոյթ ունեցողներն ընդգծում էին, որ անհնար է գտնել գէթ մէկ հայի, ով դէմ կը լինի Լղհ-ի ճանաչմանը: Սակայն` ի տարբերութիւն «Ժառանգութեան», որի կարծիքով Հայաստանի կողմից ճանաչումը վերջին քսանամեակում նոյնիսկ ուշացած քայլ է, Աժ-ի քաղաքական մեծամասնութիւնը պնդում էր, թէ հաշուի առնելով, որ հակամարտութեան կարգաւորումն ընթանում է Էահկ-ի Մինսկի խմբի եռանախագահողների շրջանակներում, եւ այդ ձեւաչափում խնդրի լուծումը սպառուած չէ, պէտք չէ վնասել գործընթացին: Արտգործնախարարի տեղակալ Շաւարշ Քոչարեանն եւս յայտնեց, որ կառավարութիւնը ներկայ փուլում նախագծի ընդունումը համարում է աննպատակայարմար: Ընդդիմադիր «ՀՅԴ» խմբակցութեան անունից վերջինի ղեկավար Վահան Յովհաննէսեանը յայտարարեց, որ իրենք եւս դէմ են եղել այս պահին հարցի քննարկմանը` բազմիցս նշելով, որ սա այն հարցը չէ, որին քննարկուելուց յետոյ կարելի է չքուէարկել կամ «դէմ» ու «ձեռնպահ» քուէարկել, սա այն հարցն է, որ պէտք է ընդունուի միաձայն, ընդ որում` քուէարկութեանը բոլոր 131 պատգամաւորների մասնակցութեամբ: «Եթէ երկու կողմերի` մեր ընդդիմադիր գործընկերների եւ իշխանութեան, յամառութեան եւ կոմպրոմիս գտնելու անընդունակութեան պատճառով, ի վերջոյ, հարցը հասաւ քննարկման եւ, եթէ պիտի քուէարկութիւն լինի, ես յայտարարում եմ, որ «ՀՅԴ» խմբակցութիւնն ամբողջութեամբ «կողմ» է քուէարկելու»,-յայտնեց նա: Միեւնոյն ժամանակ նա նշեց, որ ընդդիմութիւնը պէտք է գիտակցի, որ չի կարող բացարձակապէս հաշուի չնստել իշխանութեան վարած քաղաքական կուրսի, տեսակէտի հետ, իսկ իշխանութիւնն էլ իր հերթին չպէտք է անտեսի ընդդիմութեան տեսակէտը: «Սարսափելի բան չէր լինի, եթէ հարցը բոլորիս ստորագրութեամբ մտնէր նստաշրջանի օրակարգ, եւ քննարկումը պահուէր որպէս վերջին միջոց յետագայի համար»,-ասաց Վ.Յովհաննէսեանը` յաւելելով, որ աննպատակայարմարութեան վերաբերեալ իշխանութիւններից «կարգին բացատրութիւն» էլ չլսուեց: Եզրափակիչ ելոյթում Ր.Յովհաննիսեանը կարծիք յայտնեց, որ «մեր կողմից քաղաքական, իրաւական որոշման, կարգավիճակի ընդունումը որեւէ ձեւով բացասաբար չի ազդելու բանակցային գործընթացի վրայ»: «Մենք մեր գործերը պէտք է կատարենք համախոհաբար, բայց ժամանակին»,-ասաց նա` յաւելելով, որ հայցում է քաղաքական ուժերի զօրակցութիւնը, որ «սա դառնա համազգային նախագիծ, համապետականօրէն քննարկուած բոլոր ուժերի կողմից, համախոհաբար մտնի օրակարգ, եւ մենք միասին քննենք, թէ երբ է թե'բովանդակութեան, թե' ընթացակարգային, թե' ժամանակային առումով ճշգրիտ պահը, բայց ոչ 19 տարի յետոյ»: Նա առաջարկեց այդ նպատակն իրացնելու համար քուէարկութիւնը յետաձգել: Նիստից յետոյ` պատասխանելով լրագրողների հարցերին, Աժ-ի նախագահ Յովիկ Աբրահամեանը կարծիք յայտնեց, որ քուէարկութիւնը յետաձգելը ճիշտ էր: «Մենք կը փորձենք մէկ անգամ եւս բանակցել ընդդիմութեան հետ եւ այդ քուէարկութիւնը յետաձգել ոչ թէ 15 օրով, այլ օրակարգից հարցը հետ կանչել, այնուհետ անդրադառնալ այդ հարցին»,-ասաց Աժ-ի նախագահը:

---