ՄԱՐՄԱՐԱ Յառաջիկայ 14 Հոկտեմբերին Լուվր թանգարանի մէջ պիտի բացուի »ռուս նկարիչներ« ցուցահանդէսը՝ Ֆրանսայի մէջ Ռուսաստանի օրերու շրջագծով։ Նախապէս յայտարարուած էր որ պիտի ցուցադրուէին նաեւ հայազգի արուեստագէտ Ավտէյ Տէր Օհանեանի աշխատանքները, սակայն Ռուսաստանի Մշակոյթի Նախարարութիւնը արգիլեց անոր մասնակցութիւնը։ Պնդուեցաւ որ Տէր Օհանեանի »ծայրայեղ վերացականութիւն« շարքի նկարները »Ռուսաստանի մէջ սահմանադրական կարգը բռնի ուժով փոխելու կոչ կը պարունակեն, ինչպէս նաեւ կը հրահրեն միջ-կրօնական ատելութիւն եւ թշնամութիւն«։ Ռուսաստանի պետական մարմինները իրենց որոշումը համաձայնեցուցած են Ռուսաստանի մօտ Ֆրանսայի դեսպանի եւ Լուվրի թանգարանի տնօրէնի հետ, որոնք նկատի առած են Ռուսաստանի պատճառաբանութիւնները։ Ավտէյ Տէր Օհանեան գայթակղալից նկարչի փառքի արժանացած է 1998ին, »Երիտասարդ անաստուած« քարոզարշաւի շնորհիւ, որու ժամանակ ան կացինով ջարդած էր սրբապատկերներու ստուարաթուղթէ կրկնօրինակները՝ ի նշան հոգեւորականութեան առեւտրականացման դէմ բողոքի։ Իր դէմ քննութիւն բացուած էր՝ կրօնական թշնամութիւն հրահրելու մեղադրանքով, իսկ յետոյ ան Լեհաստան գաղթած էր։ Ռուսաստանի Փէրմ քաղաքի ժամանակակից արուեստի թանգարանի տնօրէն Մարատ Կէլման ըսաւ որ այս զարգացումներու լոյսին տակ, եօթը ռուս նկարիչներ հրաժարած են մասնակցելէ ցուցահանդէսին։

---