Սեպտեմբերի 13-ին Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսը Մայր Աթոռ Սուրբ Էջմիածնում հիւրընկալեց հայոց մեծ բանաստեղծ Յովհաննէս Թումանեանի ժառանգերին՝ ուղեկցութեամբ  բ. գ. դ., պրոֆ. Սերգօ Երիցեանի:

Պարոն Երիցեանը, Նորին Սրբութեանը ներկայացնելով բանաստեղծի ժառանգներին, տեղեկացրեց, որ Հայաստան են ժամանել մասնակցելու Յովհաննէս Թումանեանի ծննդեան 150-ամեակի միջոցառումներին:

 

Այնուհետեւ Վեհափառ Հայրապետն իր հայրական օրհնութիւնը բերեց հիւրերին՝ ուրախութիւն յայտնելով հայրենիքում բանաստեղծի ժառանգներին միասնական եւ համախմբուած տեսնելու առիթով: Քաղցրութեամբ յիշելով բանաստեղծի զաւակների հետ Մոսկուայում իր հանդիպումներն ու զրոյցները` Նորին Սրբութիւնն ընդգծեց, որ Թումանեանի թողած ժառանգութիւնը համամարդկային է եւ անգնահատելի է նրա վաստակը հայ ժողովրդի կեանքում` հավելելով, որ նրա ստեղծագործութիւնները սիրելի եւ ուսանելի են յուրաքանչիւր հայորդու համար: Վեհափառ Հայրապետը նշեց, որ առաջիկայում Մայր Աթոռ Սուրբ Էջմիածնում եւս տօնախմբուելու են մեր ժողովրդի երկու մեծերի` Կոմիտաս վարդապետի եւ Յովհաննէս Թումանեանի յոբելեանները: 

 

Զրոյցի ընթացքում Ամենայն Հայոց Կաթողիկոսը հետաքրքրուեց Թումանեանի ժառանգներից իւրաքանչիւրի գործունէութեամբ, ծանօթացաւ վերջին յոբելեանական հրատարակութիւններին, ապա մաղթեց, որ մշտապէս նախանձախնդիր լինեն բանաստեղծի թողած ժառանգութեան հանդէպ:

 

  -   Մամլո հաղորդագրություն