Սեպտեմբերի 27-ին, Սուրբ Գէորգ զօրավարի տօնի նախօրէին, Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց կաթողիկոսի օրհնութեամբ, տեղի ունեցաւ Մայր Աթոռ Սուրբ Էջմիածնի Գեւորգեան հոգեւոր ճեմարանի (Աստուածաբանական համալսարան) 2019-2020 թթ. ուսումնական տարուայ բացումը: 

 

Հանդիսութիւնը բացուեց Տէրունական աղօթքով, որից յետոյ հնչեցին Հայաստանի Հանրապետութեան եւ ճեմարանի օրհներգերը: Այնուհետեւ կատարուեց ուսանողների օրհնութեան կարգ եւ ուսումնական տարեմուտի աղօթք, որից յետոյ ներկաներին ողջունեց ճեմարանի տեսուչ Հոգեշնորհ Տ. Գարեգին վարդապետ Համբարձումեանը: Հայր Սուրբը, ողջունելով ներկաներին ուսումնական տարուայ մեկնարկի կապակցութեամբ, տեղեկացրեց, որ Գեւորգեան հոգեւոր ճեմարանը 2019-2020 թթ. ուսումնական տարին սկսում է 91 սանով, ասպիրանտուրայի 9 ուսանողով: Այս տարի ճեմարան է ընդունուել 15 սան, ճեմարանն ունի 32 աշխարհական եւ 17 հոգեւորական դասախօս: 

 

Դիմելով ճեմարականներին` Հայր Գարեգինը մասնաւորապէս ընդգծեց. «Մի առաքելութիւն, որ չափազանց դիւրին է, չի կարող արդիւնաւորուել ու առատ պտուղներ տալ: Անցեալ տարիներին փորձել ենք ﬕասին ﬔր առջեւ վառ ունենալ հոգեւոր ու մտաւոր զարթօնքի այն տեսիլքը, որը դեռեւս Վաղարշապատի մաշտոցահիմն դպրոցից դարեր ի վեր աւանդուել է ﬔր նախնիներին ու մեզ: Ձեր կրթութեան այս վեցամեայ ընթացքում ոչ միայն դուք էք ուսանում, այլեւ ﬔնք շատ բաներ սովորում ենք ձեզանից: Չեմ դադարի ասել, որ բաբախող սրտին աւիւն է տալիս ժիր ուսանողը, մշտապէս իր մէջ հարցեր ունեցող ու պրպտող ուսանողը, ոչ պարտադիր կերպով ամէն բանի հետ համաձայնող, բայց հեզ ուսանողը: Այսպիսի որակներ առկայ են ձեր մէջ: Մաղթանքս է, որ աղօթքի, ուսման ու ծառայասիրութեան բովով թրծուած ձեր անձերը ﬕշտ յայտնուեն այն վայրում ու այն մարդկանց կողքին, ովքեր դրա կարիքն ունեն առաւել քան որեւէ այլ բան»: Տեսուչ Հայր Սուրբը նաեւ իր խորին շնորհակալութիւնը յայտնեց Ամենայն Հայոց Կաթողիկոսին ճեմարանի հանդէպ մշտապէս ուշադիր եւ հոգատար վերաբերմունք դրսեւորելու համար:

 

Ցերեկոյթին հոգեւոր, ժողովրդական եւ աշուղական երգերի կատարումներով հանդէս եկան Գեւորգեան հոգեւոր ճեմարանի երգչախումբը (ղեկավարութեամբ Արտաշէս Բաբուրեանի), Մայր Աթոռի սարկաւագաց երգչախումբը (ղեկավարութեամբ Շահէ Քեշիշեանի) եւ «Նարեկացի» համոյթը (գեղարուեստական ղեկավար, թառահար եւ կոմպոզիտոր Արտէմ Խաչատուր): 

 

Ուսումնական տարուայ բացման առիթով դասախօսական անձակազմի անունից ողջոյնի խօսք ասաց Գեւորգեան հոգեւոր ճեմարանի դասախօս Ալվարդ Բարխուդարեանը: 

 

Հանդիսութեան ընթացքում տեղի ունեցաւ նաեւ շրջանաւարտ ճեմերանականների դիպլոմների յանձնման արարողութիւնը: 2018-2019 թթ. ուսումնական տարուայ 16 շրջանաւարտ սարկաւագներ ձեռամբ Մայր Աթոռի Արտաքին յարաբերութիւնների եւ արարողակարգի բաժնի տնօրէն Գերաշնորհ Տ. Նաթան արքեպիսկոպոս Յովհաննիսեանի ստացան իրենց աւարատական դիպլոմները: Շրջանաւարտների անունից երախտագիտութեան խօսքով հանդէս եկաւ Բարեշնորհ Սեւակ սարկաւագ Գրիգորեանը:

 

Վերջում Ամենայն Հայոց Կաթողիկոսի հայրական օրհնութիւնն ու պատգամը ներկաներին փոխանցեց Նաթան արքեպիսկոպոսը:

«Այս տարին յատկանշական է հոգեւոր մեր այս կրթօջախի հիմնադրութեան 145-ամեակով: Շուրջ մէկ եւ կէս դար առաջ երանաշնորհ Գեւորգ Դ Ամենայն Հայոց Հայրապետի կողմից հիմնադրուած նուիրական այս հարկի ներքոյ հասակ առան ու կրթուեցին բազում հոգեւորականներ: Խորհրդանշական է, որ բացման հանդիսութիւնը կատարում ենք Սուրբ Գեւորգ զօրավարի տօնի նախօրէին, որը ոգեշնչում է նրա հոգեւոր սխրանքի եւ զօրեղ հաւատքի օրինակով, մեր լուսամիտ հայրերի առաքելաշաւիղ ճանապարհով ընթանալու, ապրելու ու գործելու: 

«Պարտ է միշտ կրթել զանձն յուսումն եւ եաստուածապաշտութիւն»: Այս խրատն է մեզ տալիս մեր Սուրբ Եկեղեցու եռամեծ վարդապետ Սուրբ Գրիգոր Տաթեւացին` մշտապէս նախանձախնդիր լինելու ուսմանն ու կրթութեանը եւ աստուածապաշտութեանը: Տաթեւացու այս պատգամը ուսուցանող խրատ է ճեմարանի սաների համար, որպէսզի գիտելիքների ամբարումով, Սուրբ Գրքի իմացութեան մէջ վարժուելով, բայց նաեւ Աստծոյ հետ հաղորդակցութեան մէջ յարատեւելով կարողանան լաւագոյնս պատրաստուել հոգեւոր առաքելութեան՝ ուսումնառութիւնից յետոյ բարի սպասաւորութեամբ իրականացնելու հաւատաւոր ժողովրդի հոգեւոր խնամքը:

 

Գեւորգեան հոգեւոր ճեմարանը կոչուած է եկեղեցականների նոր սերունդ կրթելու եւ պատրաստելու՝ շարունակելով մեր Սուրբ Եկեղեցու երանեալ Հայրերի աւանդները կրթութեան, դպրութեան ու գիտութեան: 145-ամեայ Ճեմարանը աւանդների կրողն է մեր նշանաւոր վանական համալսարանների, մեր հոգեւոր յայտնի կենտրոններում հաստատուած կրթութեան օջախների, որոնք դարեր շարունակ լուսավառ պահեցին հայ միտքը, նուաճումներ աւելացրեցին հայոց ոսկեդարի գոհարներին, զարգացրեցին մշակոյթն ու արուեստը: Մեր դպրութիւնը դարձաւ այն ուժը, որը պատմութեան հոլովոյթներում մեր ժողովրդին պատուհասած փորձութիւնների մէջ անպարտելի պահեց հայոց հաւատքը, ինքնութիւնն ու ոգին: Այսօր էլ մեր հայրերից մեզ ժառանգութիւն փոխանցուած այդ արժէքներով պիտի խմորենք մեր կեանքը, դրանցով ամրացնենք մեր ժողովրդին 21-րդ դարում յառնած կործանարար նոր գաղափարախօսութիւնների եւ մարտահրաւէրների առջեւ՝ պահպանելու ազգային ինքնագիտակցութիւնը, նուիրումն ու հաւատարմութիւնը առ Աստուած, հայրենին եւ Սուրբ Եկեղեցին: 

 

Գեւորգեան հոգեւոր ճեմարանի գործունէութիւնը արդիւնաւորւում է հոգածու տեսչութեան եւ հոգեւորական ու աշխարհական նուիրեալ դասախօսների գովելի ջանքերով: Սիրելի դասախօսներ, ձեր մատուցած գիտելիքներով, ինչպէս նաեւ ձեր անձնական օրինակի եւ աստուածասիրութեան ու եկեղեցասիրութեան կնիքը կրելով է թրծւում ապագայ հոգեւոր սպասաւորը: Դուք էք այսօր Սուրբ Սահակի ու Սուրբ Մեսրոպի, հռչակաւոր համալսարաններ հիմնած եւ այնտեղ դասաւանդած մեր մեծ վարդապետների կրթական առաքելութեան շարունակողները: Դուք այս հաստատութիւնից ներս հոգեւորականներ պատրաստած ու դաստիարակած նշանաւոր հայրապետների, եկեղեցականների, գիտնականների գործի հետեւողն ու իրականացնողն էք: Մենք բարձր ենք գնահատում ձեր գովարժան ծառայութիւնը, որ արդիւնաւորում էք ջանադրութեամբ, մեր Սուրբ Եկեղեցու պայծառութեան, մեր հոգեւոր-ազգային կեանքի շինութեան ու բարօրութեան նախանձախնդրութեամբ: 

 

Սիրելի սաներ Գեւորգեան հոգեւոր ճեմարանի, հայրական սիրով եւ օրհնութեամբ Մեր խօսքն ուղղում ենք նաեւ ձեզ՝ պատգամելով, որ մտապահէք եւ իրագործէք Սուրբ Գրիգոր Տաթեւացու յորդորը. «Պարտ է միշտ կրթել զանձն յուսումն եւ եաստուածապաշտութիւն»: Գիտելիքն ու գործերը բազմապատիկ կարող են պտղաբերել աստուածապաշտութեան, աղօթական կեանքի հետ միաւորուելով միայն: Միշտ նախանձախնդիր եղէք ուսման եւ իմացութեան, նաեւ մնացէք Աստծոյ հետ որդիական ջերմ հաղորդակցութեան, Քրիստոսապատուէր սիրոյ մէջ:

 

…Վերստին Մեր գնահատանք ենք բերում Գեւորգեան հոգեւոր ճեմարանի տեսչական եւ դասախօսական կազմին՝ մաղթելով նորանոր յաջողութիւններ հոգեւոր-կրթական առաքելութեան մէջ: Մեր առանձնակի գնահատանքն ենք բերում Հոգեշնորհ Տ. Գարեգին վարդապետ Համբարձումեանին հոգեւորականաց պատրաստութեան, ճեմարանի միջոցառումների ու ծրագրերի արդիւնաւէտ իրագործման համար», - ասուած է Վեհափառ Հայրապետի խօսքում: 

 

Նաթան արքեպիսկոպոսը ներկաներին փոխանցեց նաեւ այն, որ օրհնութեամբ Վեհափառ Հայրապետի տեսուչ Հայր Սուրբն առաջիկայում կոչուելու է այլ ծառայութեան եւ այս ուսումնական տարում ճեմարանում որպէս նոր տեսուչ աշխատանքի է հրաւիրուել Հոգեշնորհ Տ. Մեսրոպ վարդապետ Պարսամեանը: Վերջինս շրջանաւարտ է Սեւանի Վազգէնեան հոգեւոր դպրանոցի, Գեւորգեան հոգեւոր ճեմարանի, իր ուսումնառութիւնը կատարելագործել է Ստրասբուրգի Մարկ Բլոկ համալսարանի կաթոլիկ աստուածաբանութեան ֆակուլտետում, հոգեւոր սպասաւորութիւնն արդիւնաւորել Ֆրանսիայի, Շուեյցարիայի, ԱՄՆ Հայոց Արեւելեան թեմերում: 

 

Ուսումնական տարուայ բացման հանդիսութիւնը փակուեց «Պահպանիչ» աղօթքով:

 

  -   Հասարակութիւն