Մայր Աթոռ Սուրբ Էջմիածնում կատարուեց կրթութեան մշակների օրհնութեան կարգ

11-09-2020 13:45:29   |   |  Մամլո հաղորդագրություն



Սեպտեմբերի 11-ին, 2020-2021 թթ. ուսումնական նոր տարեշրջանի մեկնարկի առիթով
Մայր Աթոռ Սուրբ Էջմիածնում՝ Սուրբ Տրդատ արքայի բաց խորանին, նախագահութեամբ Ն.Ս.Օ.Տ.Տ. Գարեգին Երկրորդ Ծայրագոյն Պատրիարք եւ Ամենայն Հայոց Կաթողիկոսի, կատարուեց կրթութեան մշակների աւանդական օրհնութեան կարգ: 
 
Արարողութեանը մասնակցում էին կրթական պետական կառոյցների ներկայացուցիչներ, ԲՈՒՀ-երի ռեկտորներ եւ ՀՀ մի շարք դպրոցների մանկավարժներ: 
 
Օրհնութեան արարողութեան աւարտին Ամենայն Հայոց Կաթողիկոսն իր հայրապետական օրհնութիւնն ու պատգամը բերեց կրթութեան նուիրեալներին։
 
«Յարգելի ռեկտորներ,
Սիրելի մանկավարժներ, 
Կրթութեան ոլորտի պատուարժան պատասխանատուներ,
Ուրախ ենք վերստին ընդունելու ձեզ Մայր Աթոռ Սուրբ Էջմիածնում։ Ուսումնական նոր տարուայ սկզբին բարի աւանդոյթով դուք ուխտաւորաբար ձեր քայլերն էք ուղղել Մայր Աթոռ՝ զօրանալու ձեր հաւատքի ու կոչման մէջ եւ գովելի եռանդով ու անմնացորդ սիրով շարունակելու նոր սերնդին կրթելու ձեր նուիրական առաքելութիւնը։
Գոհունակ սրտով կատարեցինք կրթութեան մշակներիդ օրհնութեան կարգը՝ հայցելով Տիրոջ շնորհները, զօրակցութիւնն ու առաջնորդութիւնը ձեզ։ Մեր ժողովուրդը մշտապէս բարձրագոյն պատուի է արժանացրել կրթութեան մշակներին՝ միջնադարեան վարդապետներից մինչեւ մերօրեայ ուսուցիչներ, խոնարհուել նրանց առաքելութեան առջեւ, քանզի գիտակցել է ուսման եւ լուսաւորութեան արժէքը կեանքում եւ դերակատարութիւնը ազգի ապագայի կերտման գործում։ Այս տարի, սիրելիներ, առանձնակի իրավիճակում ենք հանդիպում միմեանց։ Համաւարակի առաջ բերած խնդիրները յուզում են մեր կեանքը, դժուարութիւններ են յառնած նաեւ կրթութեան կազմակերպման բնագաւառում։ Մենք հաւատում ենք, որ բոլոր դժուարութիւններով հանդերձ, դուք՝ կրթութեան գործի նուիրեալներդ, ջանք ու եռանդ չէք խնայելու, որպէսզի գիտելիք եւ իմացութիւն փոխանցէք եւ կրթէք մեր զաւակներին։ Ձեր անդուլ աշխատանքով է, որ ուսումնական տարին պիտի լինի յաջողուած՝ գոհունակութիւն պարգեւելով ինչպէս
ձեզ, այնպէս եւ՝ սովորողներին, նրանց ծնողներին եւ մեզ բոլորիս։ Ձեր հաղորդած գիտելիքները, սերմանած հոգեւոր արժէքները ուժ եւ զօրութիւն են մեր հայրենիքի ու մեր ժողովրդի համար։ Դուք միտք ու հոգի կրթողներ էք, այդ պատճառով ձեր առաքելութիւնը իրականացնում էք ինչպէս մասնագիտական կարողութիւններով, այնպէս եւ՝ ձեր հեղինակութեամբ, ձեր դաւանած արժէքներով, ձեր սիրով առ հայրենին եւ ձեր հաւատքով առ Աստուած։ Ձեր աշակերտները կրում են կնիքը ոչ միայն ձեր մատուցած գիտելիքների, այլեւ՝ ձեր հոգու եւ ներաշխարհի, ձեր ազգասիրութեան ու հայրենանուիրումի։ 
Գիտելիքն ու ուսումը միշտ էլ առաջնահերթութիւն են եղել մեր Եկեղեցու առաքելութեան ծիրում։ Սահակ-Մեսրոպեան դպրոցը ժամանակին համահունչ կրթութիւն ապահովելու իր դարաւոր աւանդներով դարձել է գրաւականը մեր ազգային-քրիստոնէական ինքնութեան եւ մեր ժողովրդի գոյատեւման ու յարատեւութեան։ Այսօր նոյնպէս մեր Եկեղեցին իր պարտքն է նկատում հայրենի պետութեանը աջակցել՝ կրթելու մեր ժողովրդի արժանաւոր զաւակներ եւ մեր երկրի գիտակից քաղաքացիներ, զարգացած, նպատակասլաց եւ պատասխանատուութեան բարձր զգացումով սերունդ, որը պատրաստ կը լինի դիմագրաւելու ժամանակի մարտահրաւէրներին, տէր լինելու մեր երկրի ու ժողովրդի ապագային։ 
Այսօր Մենք կ'ուզենայինք անդրադառնալ նաեւ կրթութեան բնագաւառում ձեռնարկուող փոփոխութիւններին, որոնք, մասնաւորապէս հայագիտական առարկաներին վերաբերող դիքորոշումներում մտահոգութիւն, անհանգստութիւն եւ յուզում են առաջացրել մեր ժողովրդի, յատկապէս՝ մտաւորականութեան շրջանում։ Մասնաւոր մտահոգութիւն է Մեզ համար նաեւ «Հայոց Եկեղեցու պատմութիւն» առարկայի զեղչումը այլ առարկաների մէջ տարրալուծման ճանապարհով։ Գիտակրթական հաստատութիւնների, ինչպէս եւ մասնագիտական շրջանակների հնչեցրած տեսակէտներն ու առաջարկները ամենայն լրջութեամբ նկատի առնելը, բարձրաձայնուած խնդիրները համակողմանի քննարկելը պիտի նպաստեն կրթական բարեփոխումների ընթացքին։ Ցաւում ենք նաեւ, որ Կրթութեան եւ գիտութեան նախարարութեան կողմից տակաւին չեն իրականացուել քայլեր՝ խորհրդակցելու եւ համագործակցելու Մայր Աթոռի կրթական հարցերով ենթախմբի հետ։ Մեր համոզումն է, որ «Հայոց Եկեղեցու պատմութիւնը» պիտի դասաւանդուի որպէս առանձին առարկայ, իբրեւ վկայութիւն մեր կեանքում Հայոց Եկեղեցու հարամնայ առաքելութեան եւ սխրանքների արժեւորման, երեխաներին ծանօթացնելով ոչ միայն մեր Եկեղեցու պատմութեանը, այլեւ՝ Աստուածաշնչի պատգամներին, քրիստոնէութեան հիմունքներին ու արժէքներին, մեր Եկեղեցու խորհուրդներին ու ծէսերին, բարեպաշտական սովորութիւններին։ Իբրեւ ժողովուրդ՝ մենք մեզ քրիստոնեայ գիտենք։ Ուրեմն, պիտի ճանաչենք մեր Եկեղեցին, գնահատենք նրա առաքելութիւնը, որպէսզի մեր զաւակները մանկուց ջերմանան ու լցուեն հաւատքով, լինեն Աստծոյ սուրբ ներկայութեան բնակարան, բարիքի ձգտող, մարդասէր, ազնիւ, օրինապահ ու արդարամիտ։ Սաղմոսերգուի շուրթերով անտեղի չի ասուած՝ «Երանի այն ազգին, որի օգնականը տէր Աստուած է» (Սաղմ. ԼԲ 12)։ Ինքնաճանաչ, քրիստոնէական արժէքները կարեւորող, Աստուածասէր եւ հայրենասէր սերունդ կրթելով` մենք պիտի զօրանանք, զարգանանք ու առաջադիմենք եւ ընթանանք դէպի մեր նուիրական նպատակների իրագործումը։ 
Սիրելի ռեկտորներ, մանկավարժներ, կրթութեան ոլորտի պատասխանատուներ, ուսումնական նոր տարուայ առիթով Հայրապետական Մեր սէրն ու օրհնութիւնն ենք վերստին բերում ձեզ։ Մաղթում ենք, որ երկնային բարիքները մշտապէս հեղուեն ձեր ընտանեկան հարկերից ներս, եւ Աստուած Սուրբ Հոգու շնորհներով զարդարի ձեզ եւ ձեր սաներին, նորանոր յաջողութիւններ ու ձեռքբերումներ պարգեւի գիտութեան ու կրթութեան շաւիղներում ձեր եռանդագին ու շնորհակալ առաքելութեան ճանապարհին։ 
Թող Տէրը խաղաղութեան մէջ պահի Հայաստան եւ Արցախ հայրենի մեր երկիրը, աշխարհասփիւռ մեր ողջ ժողովրդին եւ պահպանի Իր Սուրբ Աջի ամենախնամ հովանու ներքոյ այսօր եւ միշտ. ամէն», - ասաց Հայոց Հայրապետը:
Ի պատիւ արարողութեան մասնակիցների տեղի ունեցաւ նաեւ ընդունելութիւն, որի ընթացքում Մայր Աթոռ Սուրբ Էջմիածնի Քրիստոնէական դաստիարակութեան կենտրոնի տնօրէն Հոգեշնորհ Տ․ Զաքարիա ծայրագոյն վարդապետ Բաղումեանը, եւս մէկ անգամ ներկաներին բարի գալուստ մաղթելով համայն հայութեան հոգեւոր կենտրոն, անդրադարձաւ ազգային ինքնութեան եւ նկարագրի կերտման գործում ուսուցչի կարեւոր առաքելութեանը՝ մաղթելով բեղուն եւ արգասաբեր ուսումնական նոր տարի։
Հրաւիրեալներն առիթ ունեցան նաեւ շրջելու Մայր Աթոռի թանգարաններով։ 
 
  -   Մամլո հաղորդագրություն
Լուրեր Հայաստանից եւ Սփիւռքից - Նոյեան Տապան


Կարդացել են 60 անգամ
Noyan Tapan - Նոյյան տապան
Facebook Group · 3 365 անդամ
Միանալ խմբին