Ամենայն Հայոց Կաթողիկոսի ուղերձը Անկախության տոնի առիթով

21-09-2020 11:13:06   |   |  Մամլո հաղորդագրություն



Մայր Աթոռ Սուրբ Էջմիածնից Հայրապետական Մեր սէրն ու օրհնութիւնն ենք բերում բարեպաշտ մեր ժողովրդին ի հայրենիս եւ ի սփիւռս եւ շնորհաւորում Անկախութեան տօնի բերկրալի առիթով։
 
Շուրջ երեք տասնամեակ առաջ մեր ժողովուրդը Տիրոջ օրհնութեամբ կեանքի կոչեց անկախ պետականութիւնը վերահաստատելու իր դարաւոր իղձը եւ յուսավառ սրտով նուիրուեց իր ազատ, նոր կեանքի կերտմանը։ Միշտ պարծանքով պիտի յիշուեն այս տարիներին համայն հայութեան միասնական զոհողութիւններն ու յանձնառութիւնները, որոնցով հայրենաշեն բազում ծրագրեր ու նախաձեռնութիւններ իրագործուեցին՝
վկայելով, որ մեր հաւաքականութեամբ ու միասնութեամբ են մեր կեանքում արձանագրւում յաջողութիւններ ու յաղթանակներ։ Անկախութեան օրուայ լուսաւոր խորհուրդը հրաւէր է ազգիս զաւակներին վերարժեւորելու անցած դժուարին ուղին, մնալու հաստատուն՝ ազատ ապրելու եւ արարելու, մեր պետականութիւնը շէնացնելու ձգտումի ու նուիրումի մէջ։
 
Այսօր, սիրելիներ, հակառակ բոլոր դժուարութիւնների, մեզ զօրացնում են անկախութեան տարիների ձեռքբերումներն ու նուաճումները եւ հայրենիքի հանդէպ դրսեւորած սէրը մեր ժողովրդի, որը սխրանք դարձաւ մեր սահմաններում, նուիրում՝ կրթօջախներում, արգասաւոր ջանքեր՝ արուեստի, գիտութեան բնագաւառներում։ Յիրաւի, ողջ հասարակութեան յանձնառութեամբ ու նախանձախնդրութեամբ է ամրանում պետականութիւնը, առաջադիմում իւրաքանչիւրի ջանք ու աւանդով։ Ամուր պահենք միաբան ու նուիրեալ մեր ընթացքը՝ քաջ գիտակցելով, որ «միաբանութիւնն է մայրը բարի գործերի» (Եղիշէ)։   
 
Աղօթք բարձրացնենք առ Բարերարն Աստուած, որ խաղաղ ու ապահով պահի հայրենի մեր երկիրը եւ զօրացեալ՝
մեր ժողովրդի սէրն ու պատասխանատուութիւնը մեր պետականութեան հանդէպ, որպէսզի մեր հայրենիքը շէնանայ ու պայծառանայ, եւ մեր զաւակները սերնդեսերունդ շարունակեն արժեւորել Անկախութեան օրուայ պանծալի խորհուրդը։
 
Թող մեր Տիրոջ՝ Յիսուս Քրիստոսի սէրը, ողորմութիւնը եւ շնորհները լինեն մեզ հետ եւ բոլորի այսօր եւ միշտ. ամէն։

 
  -   Մամլո հաղորդագրություն
Լուրեր Հայաստանից եւ Սփիւռքից - Նոյեան Տապան


Կարդացել են 34 անգամ
Noyan Tapan - Նոյյան տապան
Facebook Group · 3 365 անդամ
Միանալ խմբին