Ըստ «Ֆիթչ» վարկանիշային գործակալութեան, ԱՄՀ-ի Հայաստանին
աջակցութեան վերջին ծրագիրը կնպաստի երկրի սուվերեն վարկանիշի
բարձրացմանը
05-03-2009 22:00:00 | Հայաստան | Տնտեսութիւն
ԵՐԵՎԱՆ, 5 ՄԱՐՏԻ, ՆՈՅԵԱՆ ՏԱՊԱՆ: 2009թ.-ի մարտի 5-ին «Ֆիթչ»
վարկանիշային կազմակերպութիւնը իր մամլոյ հաղորդագրութեան մէջ նշել
է, որ Արժոյթի միջազգային հիմնադրամի (ԱՄՀ) 540 մլն ԱՄՆ դոլար
կազմող վարկային մեխանիզմը կնպաստի գլոբալ եւ տարածաշրջանային
ցնցումների նկատմամբ Հայաստանի տնտեսութեան դիմադրողականության
աւելացմանը` դրանով իսկ բարելաւելով երկրի սուվերեն վարկանիշի
հեռանկարը: Ներկայումս, Հայաստանի սուվերեն վարկանիշը արտարժոյթով
եւ ազգային արժոյթով երկարաժամկէտ պարտաւորութիւնների գծով «BB»
է` «Կայուն» հեռանկարով: Երկրի առաստաղային վարկանիշը «BB+» է, իսկ
կարճաժամկէտ վարկանիշը` «B»:
Ըստ ՀՀ ԿԲ-ի Հասարակայնութեան հետ կապերի ծառայութեան,
«Ֆիթչ»-ի սուվերեն վարկանիշների գծով վերլուծական խմբի տնօրէն
Էնդրյու Կոլխաունը նշում է, որ փոքր եւ համեմատաբար փակ
տնտեսութիւն ունեցող Հայաստանը չի ֆ գլոբալ վարկային
ճգնաժամից, քանի որ Ռուսաստանի տնտեսական անկման արդիւնքում
զգալիօրէն նուազել է դրամական փոխանցումների եւ ներդրումների
ներհոսքը: Սակայն Հայաստանի` ԱՄՀ-ի աջակցութեանը դիմելու եւ
ազգային արժոյթի առաւել ազատ լողացող ռեժիմ թոյլ տալու
որոշումները ներկայիս դժուարութիւնները յաղթահարելու
իշխանութիւնների զգուշաւոր մօտեցման ողջունելի ազդանշան են:
ԱՄՀ-ի կառավարիչ-տնօրէն Դոմինիկ Ստրոս-Կանը ԱՄՀ-ի Խորհրդի
մարտի 6-ին անցկացուելիք նիստում կոչ կանի հաւանութիւն տալ
Հայաստանին 540 մլն դոլար 28-ամսեայ «Stand By» վարկ տրամադրելու
որոշմանը, որը կազմելու է ԱՄՀ-ում Հայաստանի քվոտայի 400%-ը:
Երկիրը դիմել էր ԱՄՀ-ի օգնությանը, երբ պաշտօնական պահուստները
նուազել էին 24%-ով եւ 2009թ.-ի յունվարի վերջի դրութեամբ կազմել
1,26 մլրդ դոլար` 2007թ.-ի վերջի 1,66 մլրդ դոլարի համեմատ:
ՀՀ Կենտրոնական բանկը 2008թ.-ի ընթացքում ծախսել էր շուրջ 360
մլն դոլար ՀՀ դրամի փոխարժեքը ԱՄՆ դոլարի նկատմամբ 305 մակարդակի
վրայ պահելու եւ դրանով մասնակիօրէն դոլարացված ֆինանսական
համակարգի նկատմամբ վստահութիւնը դժուարին պայմաններում պահպանելու
համար: ԿԲ-ն ներկայումս թոյլ է տալու փոխարժէքի աւելի մեծ
տատանողականություն, եւ, սպասւում է, որ 1 ԱՄՆ դոլարի փոխարժեքը
կտատանվի 370 դրամ մակարդակի շուրջ:
Սակայն ՀՀ ԿԲ-ն պաշտօնապէս չի հաւաստիացրել, որ դրամի
փոխարժեքը գտնուելու է որոշակի մակարդակի կամ որեւէ միջակայքի
սահմաններում:
ԱՄՀ-ի վարկային ծրագիրը ներառում է աջակցութիւն բանկերին`
հնարաւորութիւն տալով նրանց չեզոքացնել դրամի արժեզրկման
հետեւանքները` բանկային համակարգի վարկերի ընդհանուր ծաւալում
արտարժութային վարկերի 38% բաժնի պայմաններում: Քանի որ մասնաւոր
հատուածին տրամադրուած բանկային վարկերը 2008թ.-ի վերջի դրութեամբ
կազմել են ՀՆԱ-ի միայն 17%-ը, ցանկացած պրոբլեմ դեռեւս բաւականին
լաւ կապիտալիզացված բանկային յատուածում կլինի առաւել կառավարելի,
քան նոյն տարածաշրջանում «BB» սուվերեն վարկանիշ ունեցող երկրների
մեծ մասում:
Հայաստանի ՀՆԱ-ի աճը 2008 թ.-ին դանդաղել է եւ կազմել 6,8%`
2007թ.-ի 13,8%-ի համեմատ: 2008թ.-ի չորրորդ եռամսյակում գրանցուել
է 0,2 % տնտեսական անկում, որը հիմնականում պայմանաւորուած էր
շինարարութեան աճի տեմպերի շուրջ 11% նուազմամբ: 2008թ.-ի չորրորդ
եռամսյակում Ռուսաստանի տնտեսութեան կտրուկ անկումը ազդել է
ստացւող դրամական փոխանցումների ծաւալի վրայ, որը արտարժոյթի եւ
պահանջարկի ձեւաւորման կարեւորագոյն աղբիւր է: Համաձայն ԱՄՀ-ի
կանխատեսումների, 2009թ.-ին Հայաստանի ՀՆԱ-ի ծաւալը նախորդ տարուայ
համեմատ կկրճատուի 1,5%-ով, սակայն երկրի իշխանութիւններն սպասում
են շուրջ 2% տնտեսական աճ` պայմանաւորուած մասամբ պաշտօնական
աղբիւրներից ֆինանսաւորւող ֆիսկալ խթաններով: Ի լրումն ԱՄՀ
վարկային ծրագրի, Հայաստանը ստանալու է 500 մլն ԱՄՆ դոլարի վարկ
Ռուսաստանից եւ առաջիկայ 3 տարիների ընթացքում մինչեւ 525 մլն ԱՄՆ
դոլարի վարկային միջոցներ Համաշխարհային բանկից` փոքր եւ միջին
ձեռնարկութիւններին ֆինանսաւորելու համար:
ԱՄՀ-ի վարկային ծրագրի հաստատումը եւ հաջողութեամբ
իրագործումը, ինչպէս նաեւ երկրում վարւող դրամավարկային եւ
հարկաբյուձետային քաղաքականութեան վարման ոլորտներում
կարգապահութեան պահպանումը կնպաստի Հայաստանի վարկանիշի
բարձրացմանը: Ըստ ԱՄՀ-ի, աշխարհաքաղաքական ռիսկը մնում է կարեւոր
գործօն անկայուն տարածաշրջանում, թէեւ Հայաստանին հարեւան
Ադրբեջանի հետ սառեցուած հակամարտութեան լուծման գործում կայ
առաջընթաց: Ներքին քաղաքական ռիսկը, թւում է, թուլացել է 2008թ.-ի
մարտի` ընտրութիւնների հետ կապուած անկայունութեան
ժամանակահատուածից յետոյ, թէեւ տնտեսութեան անկումը կարող է
յետագայում նորից անհանգստութիւնների պատճառ դառնալ: Պետական
ֆինանսները շարունակում են հանդիսանալ դրական վարկանիշային գործօն:
Այսպէս, «Ֆիթչի» գնահատականներով, Հայաստանի պետական պարտքը
2008թ.-ի վերջի դրութեամբ կազմել է ՀՆԱ-ի միայն 14%-ը: