Հայաստանը յունվարի 1-ից օգտւում է ԵՄ-ի կողմից տրամադրուած
GSP+ համակարգի առեւտրային ռեժիմից
30-01-2009 18:16:00 | Հայաստան | Տնտեսութիւն
ԵՐԵՎԱՆ, 30 ՅՈՒՆՎԱՐԻ, ՆՈՅԵԱՆ ՏԱՊԱՆ: Եւրոմիութեան հետ
ներկայումս բանակցութիւններ են ընթանում Հայաստանի կողմից
Ընդլայնուած ազատ առեւտրի համաձայնագրի կնքման շուրջ: Այս
կապակցութեամբ փետրուարի 17-18-ին Հայաստան կայցելի ԵՄ-ի փաստահավաք
առաքելուքյունը` Հայաստանի տարբեր գերատեսչութիւնների հետ
քննարկումների արդիւնքում ստորագրուելիք անհրաժեշտ փաստաթղթերի
նախապատրաստման նպատակով: Ինչպէս յունվարի 30-ի ասուլիսում յայտնեց
Հայաստանի էկոնոմիկայի փոխնախարար Մուշեղ Թումասյանը, նշուած
համաձայնագրին անդամակցութեան գործընթացն ակնկալւում է աւարտին
հասցնել 1-2 տարում: Ըստ նրա, Հայաստանը ներկայումս ազատ առեւտրի
ռեժիմի մասին ստորոգրված միջպետական համաձայնագրեր ունի մի շարք
երկրների` այդ թւում` Ռուսաստանի Դաշնութեան, ԱՄՆ-ի, Կանադայի,
Ճապոնիայի, հետ:
Ասուլիսի հիմնական թեման ընթացիկ տարուայ յունվարի 1-ից ԵՄ-ի
կողմից երեք տարի ժամկէտով Հայաստանին` ի թիւս 16 զարգացող եւ
թոյլ զարգացած երկրների, տրամադրուող GSP+ («Արտօնութիւնների
ընդհանրացված համակարգ») առեւտրային ռեժիմն էր: Ըստ այդմ,
Հայաստանը հնարաւորութիւն է ստանում սահմանուած շուրջ 6 400
ապրանքախմբեր ԵՄ անդամ երկրներ արտահանել զրոյական կամ էապէս
նուազեցուած մաքսատուրքերով` պայմանով, որ արտահանուող ապրանքն
արտադրուել է Հայաստանում:
Ըստ Մ.Թումասյանի, մինչեւ 2009թ.-ը Հայաստանը օգտւում էր GSP
համակարգից, որով մաքսատուրքի արտօնութիւնները տարածւում էին
շուրջ 2 000 ապրանքախմբերի արտահանման վրայ: Դրա արդիւնքում միայն
2007թ.-ին հայաստանցի արտահանողները շուրջ 120 մլն եւրոյի չափով
պակաս մաքսատուրք են վճարել: Փոխնախարարի համոզմամբ, նոր համակարգը
Հայաստանի արտադրողներին հնարաւորութիւն է ընձեռում ընդլայնել
ԵՄ-ի հետ տնտեսական յարաբերութիւնները` տնտեսելով զգալի
գումարներ, ինչը համաշխարհային ֆինանսատնտեսական ճգնաժամի
պայմաններում առաւել քան կարեւոր է: Նշուեց նաեւ, որ ԵՄ-ը
ներկայումս Հայաստանի ամենախոշոր առեւտրային գործընկերներից մէկն
է. ընդհանուր ապրանքաշրջանառութեան շուրջ 30 տոկոսը Հայաստանը
իրականացնում է ԵՄ-ի անդամ երկրների հետ, ընդ որում արտահանման
շուրջ 50 տոկոսը ուղղուած է դէպի ԵՄ-ի անդամ երկրներ:
Հայաստանի գործատուների հանրապետական միութեան գործադիր
տնօրէն Գագիկ Մակարեանի կարծիքով, առեւտրի տուեալ ռեժիմից օգտուելու
հնարաւորութիւնը կնպաստի ոչ միայն արտահանման եւ ներքին
արտադրութեան ծաւալների, այլեւ արտաքին շուկայում երկրի
ճանաչելիության աճին: