Հայաստանում կապի ծառայութիւններից ստացուած հասոյթը
2008թ.-ի յունուար-նոյեմբերին աճել է 13,5%-ով
14-01-2009 19:00:00 | Հայաստան | Տնտեսութիւն
ԵՐԵՎԱՆ, 14 ՅՈՒՆՎԱՐԻ, ՆՈՅԵԱՆ ՏԱՊԱՆ: 2008թ.-ի
յունուար-նոյեմբերին Հայաստանում կապի ձեռնարկութիւնների
ծառայութիւններից ստացուած հասոյթն, ընթացիկ գներով, կազմել է 154
մլրդ 367,2 մլն դրամ կամ մօտ 504,8 մլն ԱՄՆ դոլար (առանց աւելացուած
արժէքի հարկի), ինչը 2007թ.-ի յունուար-նոյեմբերի նկատմամբ,
համադրելի գներով, աճել է 13,5%-ով:
ՀՀ Ազգային վիճակագրական ծառայութեան տուեալներով, 2008թ.-ի
յունուար-նոյեմբերին Հայաստանում ընդհանուր օգտագործման տրանսպորտով
բեռնափոխադրումների ծաւալը 2007թ.-ի յունուար-նոյեմբերի նկատմամբ
նուազել է 9,1%-ով եւ կազմել 8 մլն 574,2 հազ տոննա, իսկ
բեռնաշրջանառութեան ծաւալը աճել է 6,3%-ով եւ կազմել 2 մլրդ 695,6
մլն տոննա-կմ:
Նոյն ժամանակահատուածում ընդհանուր օգտագործման տրանսպորտով
ուղեւորափոխադրումների ծաւալը 2007թ.-ի յունուար-նոյեմբերի նկատմամբ
նուազել է 2,9%-ով եւ կազմել 224 մլն 586,1 հազ մարդ, իսկ
ուղեւորաշրջանառության ծաւալը աճել է 4,1%-ով եւ կազմել 3 մլրդ
598,5 մլն ուղեւոր-կմ:
Հանրապետութիւնում 2008թ.-ի յունուար-նոյեմբերին
ճանապարհատրանսպորտային պատահարների թիւը 2007թ.-ի
յունուար-նոյեմբերի նկատմամբ աճել է 12%-ով եւ կազմել 1 994, ընդ
որում դրանց հետեւանքով զոհուել է 363 մարդ (աճը` 3,7%),
վիրաւորուել` 2 850 մարդ (աճը` 14,3%):