Մէկ տարում Հայաստանում իրաւաբանական անձանց թիւն աճել է
4,9%-ով, իսկ անհատ ձեռնարկատէրերինը` 31,29%-ով
14-01-2009 17:00:00 | Հայաստան | Տնտեսութիւն
ԵՐԵՎԱՆ, 14 ՅՈՒՆՎԱՐԻ, ՆՈՅԵԱՆ ՏԱՊԱՆ: ՀՀ Արդարադատութեան
նախարարութեան Իրաւաբանական անձանց եւ անհատ ձեռնարկատէրերի
պետական ռեգիստրի գործակալութեան տուեալներով, 2008թ.-ի
յունուար-նոյեմբերիին գրանցուել են 3 հազ. 391 առեւտրային
իրաւաբանական անձինք եւ 16 հազ. 418 անհատ ձեռնարկատէրեր, որոնց
ընդհանուր թիւը 2008թ.-ի դեկտեմբերի 1-ի դրութեամբ
համապատասխանաբար կազմել է 59 հազ. 33 եւ 65 հազ. 504:
ՀՀ Ազգային վիճակագրական ծառայութեան տուեալներով, 2007թ.-ի
դեկտեմբերի 1-ի դրութեամբ գրանցուած են եղել 56 հազ. 286
իրաւաբանական անձինք եւ 49 հազ. 893 անհատ ձեռնարկատէրեր: Մէկ
տարուայ ընթացքում իրաւաբանական անձանց թիւն աճել է 4,9%-ով, իսկ
անհատ ձեռնարկատէրերինը` 31,29%-ով:
2008թ.-ի յունուար-նոյեմբերին լուծարուել են 901 իրաւաբանական
անձինք եւ 1 հազ. 337 անհատ ձեռնարկատէրեր:
2008թ.-ի յունուար-նոյեմբերին գրանցուած 3 հազ. 391
իրաւաբանական անձինք կատարել են մօտ 17 մլրդ 510,44 մլն դրամի (մօտ
57 մլն 261,1 հազ. ԱՄՆ դոլար) ներդրումներ: Օտարերկրեայ
ներդրումներով հիմնուած 351 ձեռնարկութիւններում կատարուել են աւելի
քան 9 մլրդ 169,66 մլն դրամի ներդրումներ, որոնցից միայն
օտարերկրեայ իրաւաբանական անձանց եւ քաղաքացիների կողմից հիմնադրուած
211 ձեռնարկութիւններում` աւելի քան 7 մլրդ 107,01 մլն դրամի, իսկ
140 համատեղ ձեռնարկութիւններում` 2 մլրդ 62,64 մլն դրամի
ներդրումներ: