Հայաստանում 2008թ.-ին սպառողական գներն աճել են 5,2%-ով
08-01-2009 18:36:00 | Հայաստան | Տնտեսութիւն
ԵՐԵՎԱՆ, 8 ՅՈՒՆՎԱՐԻ, ՆՈՅԵԱՆ ՏԱՊԱՆ: Հայաստանում սպառողական
գների ինդեքսը 2008թ.-ի դեկտեմբերին 2007թ.-ի դեկտեմբերի համեմատ
կազմել է 105,2%, այդ թւում, պարենային ապրանքներինը (ներառեալ
ոգելից խմիչք եւ ծխախոտ) 103,3%, ոչ պարենային ապրանքներինը`
100,2%, իսկ ծառայութիւնների սակագներինը` 111,4%:
ՀՀ Ազգային վիճակագրական ծառայութեան տուեալներով, 2008թ.-ի
նոյեմբեր-դեկտեմբերին հանրապետութիւնում արձանագրուել է հացի,
ալիւրի, ինչպէս նաեւ բենզինի ու դիզելային վառելիքի նկատելի
գնանկում: Այդ ապրանքատեսակները սպառողական զամբյուղում ունենալով
14,23% տեսակարար կշիռ եւ 12,3% ընդհանուր գնանկում, նշուած
ժամանակահատուածում նպաստել են սպառողական գների ընդհանուր
մակարդակի նուազմանը 2,1 տոկոսային կէտով: Առանց վերը նշուած
ապրանքատեսակների գնային փոփոխութիւնների սպառողական գների
ինդեքսը 2008թ.-ի դեկտեմբերին 2007թ.-ի դեկտեմբերի նկատմամբ
105,2%-ի փոխարէն կկազմեր 106,9%:
2008թ.-ի յունուար-դեկտեմբերին սպառողական գների միջին ամսական
հավելաճը կազմել է 0,4%, ինչը նախորդ տարուայ նոյն
ժամանակահատուածում գրանցուած ցուցանիշից ցածր է 0,1 տոկոսային կէտով
(0,5%): 2008թ.-ի յունուար-դեկտեմբերին 2007թ.-ի յունուար-դեկտեմբերի
համեմատ սպառողական գների ինդեքսը կազմել է 109%, այդ թւում
պարենային ապրանքներինը (ներառեալ ոգելից խմիչք եւ ծխախոտ)` 110%,
ոչ պարենային ապրանքներինը` 105,1%, ծառայութիւնների սակագներինը`
109%:
2008թ.-ի դեկտեմբերին նոյեմբերի համեմատ ՀՀ սպառողական
շուկայում արձանագրուել է 0,1% գնաճ, ինչը հիմնականում պարենային
որոշ ապրանքատեսակների գների սեզոնային փոփոխութիւնների արդիւնք
է: Պարենային ապրանքների (ներառեալ ոգելից խմիչք եւ ծխախոտ) գները
նշուած ժամանակահատուածում աճել են 0,7%-ով: Ոչ պարենային ապրանքների
շուկայում արձանագրուել է 2,3% գնանկում, իսկ ծառայութիւնների
ոլորտում` սակագների 0,2% յավելաճ: