Խորհրդարանը առաջին ընթերցմամբ քննարկվեց «Համահայկական բանկի
մասին» օրենսդրական փաթեթը
23-12-2008 23:00:00 | Հայաստան | Տնտեսութիւն
ԵՐԵՎԱՆ, 23 ԴԵԿՏԵՄԲԵՐԻ, ՆՈՅԵԱՆ ՏԱՊԱՆ: Դեկտեմբերի 23-ին
Հայաստանի Ազգային Ժողովը առաջին ընթերցմամբ ձեռնամուխ եղավ
«Համահայկական բանկի մասին» օրինագծի եւ դրանից բխող մի շարք
գործող օրէնքներում լրացումների փաթեթի քննարկմանը:
Ինչպէս նշեց հիմնական զեկուցող, ԿԲ-ի նախագահ Արթուր
Ջաւադեանը, Համահայկական բանկի նպատակն է նպաստել ուժեղ, մրցունակ
եւ գիտելիքի վրայ հիմնուած հայկական ներուժի ձեւաւորմանը, այն ուղղել
ամբողջ հայութեան մրցունակութեան աւելացմանը համաշխարհային
շուկայում: Բանկը լինելու է բաց բաժնետիրական ընկերութիւն եւ
իրականացնելու է բանկերին բնորոշ գործառնութիւններ, բացառութեամբ
ռեզիդենտներից հրապարակային առաջարկի միջոցով միջոցներ
ներգրաւելուց: Այն ֆինանսական շուկայում երկարաժամկէտ ներդրումների
խրախուսման նպատակով մշակելու եւ իրականացնելու է կրթական
նախագծեր, ձեւաւորելու է նախագծերի առաջարկի եւ պահանջարկի
տեղեկատուական հարթակ: Բանկի գործունէութիւնը վերահսկվելու է
Կենտրոնական բանկի եւ Ազգային մրցունակութեան խորհրդի կողմից:
Բանկի ընդհանուր կապիտալի չափը պէտք է լինի ՀՀ տարածքում ստեղծւող
առեւտրային բանկի համար սահմանուած ընդհանուր կապիտալից ոչ պակաս:
Ըստ Ա.Ջաւադեանի, առաջիկայում բանկի ներկայացուելիք բիզնես ծրագրում
կանոնադրական կապիտալի չափը նախատեսւում է սահմանել 100 մլն ԱՄՆ
դոլարին համարժէք գումար կամ 30 մլրդ դրամ: Պետութեան
մասնակցութեան չափը դրանում լինելու է 6 մլրդ դրամ:
Համահայկական բանկի գործունէութեան սկզբունքներն են. բանկը
պէտք է ներդրումներ իրականացնի միայն շահութաբեր ծրագրերի մէջ եւ
չպէտք է մրցի ՀՀ տարածքում դործող առեւտրային բանկերի հետ: Այն
պէտք է գործի Համագործակցութեան եւ զարգացման եւրոպական
կազմակերպութեան (OECD) կողմից ընդունուած կորպորատիվ կառավարման
սկզբունքներին համապատասխան: Բանկը պէտք է օգտվի որոշակի հարկային
արտօնութիւններից, մասնաւորապէս, ոչ ռեզիդենտների շահաբաժինները
ազատուելու են շահութահարկից: Բանկը նաեւ ազատուելու է գրանցման եւ
լիցենզաւորման համար օրէնքով սահմանուած պետական տուրքի վճարումից:
ԿԲ-ի նախագահը տեղեկացրեց նաեւ, որ արդէն կան
պայմանավորվածություններ ֆինանսական խոշոր միջազգային
կազմակերպութիւնների եւ ազգութեամբ հայ բիզնեսմէնների հետ` բանկի
կանոնադրական կապիտալում մասնակցելու համար: Նա նշեց, որ
Համահայկական բանկի հիմնական մասնակիցները եւ արժեթղթերի
թողարկումը լինելու են Հայաստանի տարածքից դուրս: