Հայաստանի «պրոկրեդիտ Բանկ»-ը 300 մլն դրամով աւելացնում է
կապիտալը
17-12-2008 19:00:00 | Հայաստան | Տնտեսութիւն
ԵՐԵՎԱՆ, 17 ԴԵԿՏԵՄԲԵՐԻ, ՆՈՅԵԱՆ ՏԱՊԱՆ: «պրոկրեդիտ Բանկ»-ը
(www.procreditbank.am) աւելացրել է իր կապիտալը 300 մլն ՀՀ դրամով
եւ այժմ այն կազմում է 6 մլրդ 90 մլն դրամ (մօտ 20 մլն ԱՄՆ դոլար):
Ինչպէս յայտնեցին բանկից, լրացուցիչ կապիտալը թոյլ կտայ բանկին
ընդլայնվել եւ շարունակել զարգացումը յաջորդ տարի: Կապիտալի
աւելացման արդիւնքում «պրոկրեդիտ Բանկ»-ի կանոնադրական կապիտալում
«պրոկրեդիտ Հոլդինգ» բաժնետիրական ընկերութեան (ProCredit Holding
AG-www.procredit-holding.com) բաժնեմասը 67,49% է, «Վերակառուցման
եւ զարգացման եւրոպական բանկ»-ինը (EBRD)` 16,67%, գերմանական
«Զարգացման Բանկ»-ինը (KfW)` 15,84%:
Ապագայում «պրոկրեդիտ Բանկ»-ը մտադիր է մնալ հաւատարիմ իր
հիմնական ուղղութեանը` գերփոքր, փոքր եւ միջին բիզնեսի
վարկաւորմանը, յաճախորդների հետ երկարաժամկէտ համագործակցութիւն
հաստատելով: Բացի այդ, բանկը մտադիր է շարունակել Հայաստանում
խնայողութեան մշակոյթի զարգացումը` ապաւինելով այն համոզմանը, որ
խնայողութիւնները տնային տնտեսություններին հաղորդում են
երկարաժամկէտ կայունութիւն: Բանկը նպատակ ունի աւելացնել իր
յաճախորդների միջոցների մասնաբաժինը` շեշտը դնելով մասնաւոր անձանց
խնայողութիւնների վրայ:
Յիշեցնենք, որ «պրոկրեդիտ Բանկ»-ը Հայաստանում իր
գործունէութիւնն սկսել է 2008թ.-ի փետրուարի 5-ին: Այն հանդիսանում
է Հայաստանում բանկային եւ ֆինանսական ծառայութիւնների ամբողջական
փաթեթ տրամադրող, 100% օտարերկրեայ կապիտալով բանկ: Հայաստանի
«պրոկրեդիտ Բանկ»-ը հանդիսանում է «պրոկրեդիտ» խմբի անդամ, որը
բաղկացած է Արեւելյան Եվրոպայում, Աֆրիկայում եւ Լատինական
Ամերիկայում գործող 22 ֆինանսական կառոյցներից, որոնց
գործունէութիւնը ղեկավարւում եւ վերահսկւում է խմբի մայր
ընկերութեան` Ֆրանկֆուրտում (Գերմանիա) գտնուող «պրոկրեդիտ
Հոլդինգ»-ի կողմից:
Հայաստանի «պրոկրեդիտ Բանկ»-ը ներկայումս ունի աւելի քան
4 000 յաճախորդ, ներառեալ խնայողական ծառայութիւններից օգտվողները,
ինչպէս նաեւ մօտ 24 մլն ԱՄՆ դոլարին համարժէք վարկային պորտֆել եւ
մօտ 7 մլն ԱՄՆ դոլարին համարժէք աւանդային պորտֆել: