Հայաստանի կառավարութիւնը միջոցներ է ձեռնարկում
ֆինանսա-տնտեսական ճգնաժամի հետեւանքները յաղթահարելու ուղղութեամբ
04-12-2008 20:00:00 | Հայաստան | Տնտեսութիւն
ԵՐԵՎԱՆ, 4 ԴԵԿՏԵՄԲԵՐԻ, ՆՈՅԵԱՆ ՏԱՊԱՆ: Համաշխարհային
ֆինանսա-տնտեսական ճգնաժամի ազդեցութեան բացասական հետեւանքները
յաղթահարելու ուղղութեամբ տարւվող աշխատանքների շրջանակներում
յանձնարարականներ են տրուել բոլոր նախարարութիւններին,
գերատեսչութիւններին, մարզպետարաններին, ինչպէս նաեւ
խնդրանք-առաջարկ Գիտութիւնների ազգային ակադեմիային, որպէսզի
ներկայացնեն առաջարկութիւններ բիզնեսի զարգացման վերաբերեալ,
բացահայտեն առկայ տնտեսական պոտենցիալը, եւ այն ծրագրերը, որոնք
կարելի է իրականացնել կառավարութեան աջակցութեամբ: Այս մասին ՀՀ
կառավարութեան դեկտեմբերի 4-ի նիստում յայտնեց վարչապետ Տիգրան
Սարգսեանը: Այդ աշխատանքները կոորդինացնելու համար ստեղծուել է
համապատասխան յանձնաժողով վարչապետի ղեկավարութեամբ, որն աշխատելու
է օպերատիւ ռեժիմով:
Տ.Սարգսեանը նշեց, որ բոլոր գերատեսչութիւններին եւ
նախարարութիւններին յանձնարարուել է ամփոփել այն
առաջարկութիւնները, որոնք ստացուել են մասնաւոր հատուածից:
Առաջարկութիւններն ունենալու են երկու ուղղութիւն` մէկն այն է,
որ ձեռնարկութիւններն ունեն գրագէտ եւ պատրաստուած մենեջմենթ, որը
ներկայացնում է յստակ ծրագիր, որով նկարագրւում են այն
բարդութիւնները, որոնք առկայ են եւ այն առաջարկութիւնները, թէ
ինչպէս պետութիւնը կարող է օգնել տուեալ ձեռնարկութիւններին այդ
բարդութիւնները յաղթահարելու համար: Երկրորդը` եթէ
ձեռնարկութիւնները չունեն բաւարար աստիճանի կառավարման
համապատասխան մակարդակ, ու պետութիւնը պէտք է օգնի մշակելու
բիզնես ծրագրեր եւ իրականացնելու այդ բիզնես ծրագրերը: Այդ
պարագայում, ըստ վարչապետի, չի բացառւում պետութեան
մասնակցութիւնը այդպիսի ձեռնարկութիւններում, ինչի շնորհիւ
պետութիւնը որոշակի լծակներ ձեռք կբերի կառավարման համակարգում
նշուած ծրագրերն արդիւնաւէտ իրականացնելու:
«Այսինքն, այն գործիքակազմը, որ մենք առաջարկում ենք, շատ
ճկուն է եւ բազմազան: Մենք ակնկալում ենք, որ մեր մասնաւոր հատուածն
ինքը նույնպես պէտք է ջանքեր գործադրի նախապատրաստուելու բոլոր այդ
բացասական հետեւանքները յաղթահարելուն, իսկ պետութիւնն ունի
բաւարար հնարաւորութիւններ, միջոցներ, որպէսզի կարողանանք նրանց
օժանդակել»,- ասաց Տ.Սարգսեանը: