Հայաստանի ԿԲ-ն 0,5%-ով նուազեցրել է վերաֆինանսաւորման
տոկոսադրույքը` սահմանելով այն 7,25%
03-12-2008 19:00:00 | Հայաստան | Տնտեսութիւն
ԵՐԵՎԱՆ, 3 ԴԵԿՏԵՄԲԵՐԻ, ՆՈՅԵԱՆ ՏԱՊԱՆ: 2008թ.-ի դեկտեմբերի 2-ի
նիստում Հայաստանի հանրապետութեան Կենտրոնական բանկի խորհուրդը
0,5%-ով նուազեցրել է վերաֆինանսաւորման տոկոսադրույքը` սահմանելով
այն 7,25%:
Ըստ ՀՀ ԿԲ-ի Հասարակայնութեան հետ կապերի ծառայութեան,
2008թ.-ի նոյեմբերին հոկտեմբերի նկատմամբ արձանագրուել է 0,1% գնաճ,
որի պարագայում 12-ամսեայ գնաճը նուազել է շուրջ 2%-ով եւ կազմել
6,6%:
ԿԲ-ի խորհուրդը արձանագրել է, որ նոյեմբերին ներքին եւ
արտաքին միջավայրի զարգացումները հիմնականում համահունչ են եղել
չորրորդ եռամսյակի համար կանխատեսված ուղղութիւններին: Ընդ որում,
որոշակիօրէն դրսեւորվել են տնտեսական աճի տեմպերի նուազման
նախանշված ռիսկերը: Միաժամանակ, ներքին գնաճային միջավայրը,
արձագանքելով պարենային ապրանքների եւ վառելիքի միջազգային գների
վերջին ամիսների ընթացքում նկատւող շարունակական նուազման
միտումներին, էապէս թուլացել է, ինչն արտայայտուել է յատկապէս
«հացամթերք» ապրանքախմբի եւ բենզինի գների նուազմամբ:
Համաշխարհային գնաճային ճնշումների շարունակական թուլացումը
եւ այդ միտումներին համահունչ ներքին գների արձագանքումը յետագայ
12-ամսեայ հորիզոնում կհանգեցնի գնաճի ընդհանուր մակարդակի էական
նուազման: Այս պարագայում ԿԲ-ի խորհուրդը նպատակահարմար է գտնում
թուլացնել դրամավարկային պայմանները` նպաստելով տնտեսական աճի
բարձր տեմպերի պահպանմանը: