«Կենգուրույի» մրցանակակակիր հայ աշակերտները Հայաստանի
փոքրիկ դեսպաններն են Եվրոպայում
17-06-2010 20:42:00 | Հայաստան | Հասարակութիւն
ԵՐԵՎԱՆ, 17 ՅՈՒՆԻՍԻ, ՆՈՅԵԱՆ ՏԱՊԱՆ: Արդէն երկրորդ տարին
անընդմէջ Հայաստանի Կրթութեան եւ գիտութեան նախարարութեան հովանու
ներքոյ «Այբ» կրթական հիմնադրամը անցկացնում է «Կենգուրու»
միջազգային մաթեմատիկական խաղ-մրցոյթը, որի արդիւնքները յունիսի
17-ին ամփոփուել են նախարարութիւնում կայացած մամուլի ասուլիսում:
ԿԳՆ-ի Հանրակրթութեան վարչութեան պետ Նարինէ Յովհաննիսեանը,
շնորհաւորելով մրցոյթի յաղթողներին, նշել է, որ «կենգուրուն»
յուրօրինակ հնարաւորութիւն է` նորովի մտածելու, տեսնելու եւ
սիրելու «Մաթեմատիկա» առարկան, եւ այս մրցոյթի շնորհիւ
աշակերտութեան շրջանում բարձրանում է «Մաթեմատիկա» առարկայի վարկը:
«Այբ» կրթական հիմնադրամի գործադիր տնօրէն Դավիթ Սահակեանը
խօսքերով, «Կենգուրուն» տրամաբանական եւ հետաքրքրաշարժ խնդիրներից
կազմուած մրցոյթ է, որն ամէն տարի նոյն օրն անցկացւում է աշխարհի
շուրջ 50 երկրներում` արդէն մօտ 6 միլիոն դպրոցականների
մասնակցութեամբ: Դ.Սահականը նշել է նաեւ, որ անցալ տարուայ 30 հազար
մասնակիցների փոխարէն այս տարի մրցոյթին մասնակցել են շուրջ 40
հազար դպրոցականներ: Բացի այդ, մեծ ակտիւութիւն են ցուցաբերել
նաեւ դպրոցները. մրցոյթին մասնակցել են Հայաստանի 902 դպրոցեր:
«Կենգուրու» ծրագրի ղեկավար Շուշան Կարապետեանն անդրադարձել է
այս տարուայ մրցոյթի մի շարք առանձնահատություններին: Մասնաւորապէս,
այս տարի մրցոյթը բոլոր տարիքային խմբերի համար կազմակերպուել է
նաեւ ռուսերէն լեզւով: Բացի այդ, այս տարի մրցոյթի առաւելագոյն
շեմը չի յաջողուել յաղթահարել եւ ոչ մի մասնակցի, եւ յաղթողը
որոշուել է լրացուցիչ փուլում: Շ.Կարապետեանը տեղեկացրել է նաեւ, որ
մրցոյթի յաղթողներն իրենց ամառային արձակուրդները կանցկացնեն
Բուլղարիայում կազմակերպւող միջազգային ճամբարում` այլ եւրոպական
երկրներից «Կենգուրուի» յաղթողների հետ միասին` հանդիսանալով
«Հայաստանի փոքրիկ դեսպանները Եվրոպայում»:
Ըստ «ՆՏ»-ին տրամադրած մամլոյ հաղորդագրութեան, այս տարի
մրցույթն անցկացուել է նաեւ Արցախում, որին մասնակցել են
Ստեփանակերտում գործող 13 դպրոցների շուրջ 120 աշակերտներ:
Տեղեկանք. «Կենգուրույին» կարող են մասնակցել 3-11-րդ
դասարանցի բոլոր ցանկացողները` անկախ մաթեմատիկական
ունակութիւններից կամ առաջադիմությունից: Կարեւորը աշակերտի
ցանկությունն է` փորձել իր ուժերը մաթեմատիկայում, նորովի նայել
այդ առարկային: Մրցոյթի նպատակն է համընդհանուր հետաքրքրութիւն
առաջացնել մաթեմատիկայի հանդէպ եւ մաթեմատիկան առաւել գրաւիչ ու
սիրելի դարձնել երեխաների համար: