«վիվասել-ՄՏՍ»-ի ֆինանսավորմամբ Ուռուցքաբանութեան ազգային
կենտրոնը համալրուել է ախտորոշման գերժամանակակից սարքավորումներով
11-06-2010 20:26:00 | Հայաստան | Հասարակութիւն
ԵՐԵՎԱՆ, 11 ՅՈՒՆԻՍԻ, ՆՈՅԵԱՆ ՏԱՊԱՆ: Ուռուցքաբանութեան ազգային
կենտրոնը (ՈՒԱԿ) ախտորոշման գերժամանակակից սարքավորումներով
համալրելու նպատակով Հայաստանի առաջատար բջջային օպերատոր
«վիվասել-ՄՏՍ»-ը («ՄՏՍ» ԲԲԸ-ի դուստր ընկերութիւն) յատկացրել է
68,25 մլն ՀՀ դրամ:
ՈՒԱԿ-ը, որտեղ տարեկան բուժւում է ուռուցքային տարատեսակ
հիւանդութիւն ունեցող աւելի քան 10 հազար հիւանդ, համալրուել է
ժամանակակից այնպիսի սարքավորումներով, որոնք թոյլ կտան անցկացնել
ախտորոշիչ լուրջ հետազօտութիւններ, ստացուած արդիւնքները կուտակել
թուայնացուած տարբերակով, իսկ անհրաժեշտութեան դէպքում` նաեւ
խորհրդակցական կապ ապահովել արտերկրի կլինիկաների հետ:
Սարքավորումների թւում ֆոտոդինամիկ ախտորոշիչը դեռեւս եզակի է
Հայաստանում: Բուժզննման այլ եղանակով միզապարկի նոր զարգացող
ուռուցքներ յայտնաբերել հնարաւոր չէ:
Սարքավորումներից մէկը, օժտուած լինելով գերձայնային դանակով,
թոյլ է տալիս զգալիօրէն կրճատել վիրահատութեան տեւողությունը,
նուազագոյնի հասցնել ընթացքում արեան կորուստը, կարճ ժամկէտում
ապահովել հետվիրահատական ապաքինման գործընթացը եւ գրեթէ
կանխարգելել հետվիրահատական բարդութիւնները:
Ըստ «վիվասել-ՄՏՍ»-ի մամլոյ հաղորդագրութեան, նոր ձեռքբերուած
սարքավորումների ներդրումը զգալիօրէն կնպաստի չարորակ ուռուցքների
վաղաժամ հայտնաբերմանն ու հիւանդների բուժման արդիւնքների
բարելաւմանը: Ոչ մեծ չափերի շնորհիւ հնարաւոր է դառնում սարքերի
մարզեր տեղափոխելը եւ տեղում ախտորոշման կազմակերպումը:
Մասնագէտները զգալի տեղաշարժ են ակնկալում նաեւ թոքերի, կոկորդի,
ստամոքսի, միզուղիների, երիկամների եւ այլ օրգանների չարորակ
նորագոյացությունների վաղաժամ յայտնաբերման եւ բուժման գործում: