Ստյոպա Սաֆարյան. «Արցախի խնդրով Ադրբեջանի եւ Թուրքիայի
կողմից ձեռնարկւող քայլերը լուրջ վտանգներ են ստեղծում Հայաստանի
եւ Ղարաբաղի համար»
08-06-2010 20:30:00 | Հայաստան | Քաղաքական
ԵՐԵՎԱՆ, 8 ՅՈՒՆԻՍԻ, ՆՈՅԵԱՆ ՏԱՊԱՆ-ՀԱՅԵՐՆ ԱՅՍՕՐ: Վերջին մէկ
ամսուայ ընթացքում Արցախի խնդրով Ադրբեջանի եւ Թուրքիայի կողմից
ձեռնարկւող քայլերը լուրջ վտանգներ են ստեղծում Հայաստանի եւ
Լեռնային Ղարաբաղի Հանրապետութեան համար: Այս մասին Ազգային ժողովի
պատգամաւորների յունիսի 8-ի յայտարարութիւնների ժամին յայտարարեց
ԱԺ «Ժառանգութիւն» խմբակցութեան ղեկավար Ստյոպա Սաֆարեանը: Մայիսի
20-ին Եւրոպական խորհրդարանի կողմից ընդունուած «Հարաւային
Կովկասում ԵՄ ռազմավարութեան անհրաժեշտութեան մասին» թիւ 2216
բանաձեւում նշւում է, որ ԵՄ-ը «հարգում է Հարաւային Կովկասի
երկրների տարածքային ամբողջականութիւնն ու ինքնիշխանութիւնը`
նրանց հետ իր յարաբերութիւններում», Արեւելյան գործընկերութեան
նպատակներից է յռչակում «գործընկեր պետութիւնների տարածքային
ամբողջականութեան ու պետականութեան կոնսոլիդացիայի գործին շոշափելի
աջակցութիւն ցուցաբերելը», Հարաւային Կովկասում անվտանգութեան
խնդիրների, հակամարտութիւնների, այդ թւում ԼՂ խնդրի կարգաւորման
առումով «անընդունելի եւ անկենսունակ է համարում ստատուս քվոյի
պահպանումը», այն որակում է «բռնութեամբ հաստատուած եւ միջազգային
լեգիտիմությունից զուրկ», կոչ է անում հայկական ուժերը դուրս բերել
«Ադրբեջանի բոլոր գրաւեալ տարածքներից»: Ըստ բանաձեւի, ԵՄ-ն այժմ
հնարաւորութիւն ունի աջակցել Լեռնային Ղարաբաղի հակամարտութեան
լուծմանը, ուստի անխուսափելի է համարում Մինսկի խմբում ԵՄ դերի
բարձրացումը` ԵՄ մանդատ հաստատելով ֆրանսիացի համանախագահի
փոխարենղ Բանաձեւը առաջարկում է «հիմնել ինստիտուցիոնալիզացված մի
կառոյց, որը կընդունի Սեւծովեան Միութեան տեսք», առաջարկում է
հրաւիրել Հարաւային Կովկասում անվտանգութեան եւ համագործակցութեան
կոնֆերանս` ներառելով առնչուող բոլոր երկրներին եւ տարածաշրջանային
ու գլոբալ դերակատարներին` Հարաւային Կովկասի կայունութեան պակտ
մշակելու նպատակով:
Պատգամաւորը ահազանգում է նաեւ երկու նոր մարտահրավերների
մասին: Առաջին, մայիսի 28-ին ԵԽԽՎ շրջակայ միջավայրի,
գիւղատնտեսութեան եւ տարածքային ու տեղական հարցերի
յանձնաժողովում ադրբեջանցի պատգամաւոր Ռաֆայէլ Հուսեյնովին
յանձնարարուել է պատրաստել «Ռազմական հակամարտութիւններն ու շրջակայ
միջավայրը» թեմայով զեկոյց: Նա յայտարարել է, որ պատրաստւում է
զեկոյցում նկարագրել, թէ ինչ աղէտալի հետեւանքներ է ունեցել
Հայաստանի ագրեսիան Ադրբեջանի էկոլոգիայի վրայ եւ այցելելու է ԵԽ
անդամ երկրների համակամարտության գօտիներ: Եւ երկրորդ, Նմանատիպ
ցանկութիւն ունի նաեւ ՆԱՏՕ-ի Խորհրդարանական վեհաժողովում
ադրբեջանական պատուիրակութիւնը, որի ղակավար Զիյաֆեթ Ասգարովը, ըստ
Ազերթաջ գործակալութեան, Վեհաժաղովի նախագահ Ջոն Թաների հետ
հանդիպման ընթացքում առաջարկել է ԼՂ հարցը ներառել պաշտպանութեան
ու ազգային անվտանգութեան յանձնաժողովի օրակարգ` յետագայում այն
քննարկման դնելու եւ համապատասխան բանաձեւ ընդունելու նպատակով: