ՀՀ ԱԺ նախագահ Հովիկ Աբրահամեանի նամակ է յղել Եւրոպական
Խորհրդարանի նախագահ Եժի Բուզեկին
21-05-2010 21:25:00 | Հայաստան | Քաղաքական
ԵՐԵՎԱՆ, 21 ՄԱՅԻՍԻ, ՆՈՅԵԱՆ ՏԱՊԱՆ: Մայիսի 21-ին Հայաստանի
Ազգային Ժողովի նախագահ Հովիկ Աբրահամեանը նամակ է յղել Եւրոպական
Խորհրդարանի նախագահ Եժի Բուզեկին: Ըստ ՀՀ ԱԺ Հասարակայնութեան եւ
տեղեկատուութեան միջոցների հետ կապերի վարչութեան, նամակում
մասնաւորապէս նշուած է.
«Յարգելի պարոն նախագահ,
Երէկ, մայիսի 20-ին, Եւրոպական խորհրդարանն ընդունեց բանաձեւ
«Հարաւային Կովկասում Եւրոմիութեան կողմից ռազմավարութիւն
մշակելու անհրաժեշտութեան մասին», որում տեղ գտած որոշ դրոյթների
մասին մտահոգություններս ցանկանում եմ յայտնել սոյն նամակով:
Բանաձեւի Լեռնային Ղարաբաղի հակամարտութեանն առնչուող մասում
առկայ 6 կէտերից 4-ում (6,7,8,10) կան ձեւակերպումներ, որոնք
հակասում են Լեռնային Ղարաբաղի հիմնախնդրի խաղաղ կարգաւորման
բանակցային գործընթացին, ԵԱՀԿ եւ ԵՄ դիրքորոշումներին, որոնք
մանրամասնօրէն արտայայտուել են 2009թ.-ի դեկտեմբերին Աթէնքում
Լեռնային Ղարաբաղին վերաբերող համապատասխան հայտարարություններում,
ինչպէս նաեւ` հենց Եւրոպական Խորհրդարանի 1998 թուականից ի վեր
ընդունուած բանաձեւերին: Դրանք համահունչ չեն Մադրիդյան
սկզբունքներին, Մոսկուայի հռչակագրին եւ Աքվիլայի յայտարարութեանը,
որոնց մասին յիշատակւում է բանաձեւում:
Բանաձեւի հեղինակ, բուլղարացի պատգամաւոր Եվգենի Կիրիլովը
երբեւէ առնչութիւն չի ունեցել Լեռնային Ղարաբաղի խնդրին եւ
զեկոյցի պատրաստման ընթացքում չի այցելել տարածաշրջան: Նա նաեւ
հարկ չի համարել խորհրդակցել բանակցային գործընթացում միջնորդների`
ԵԱՀԿ Մինսկի խմբի համանախագահների, մասնաւորապէս ԵՄ անդամ երկիր
հանդիսացող Ֆրանսիայի ներկայացուցչի հետ, ինչը Լեռնային Ղարաբաղին
վերաբերող ձեւակերպումներում անհանդուրժելի խեղաթիւրումների
պատճառներից է: Այս կարգի մօտեցումը վնաս է հասցնում Եւրոպական
Խորհրդարանի հեղինակութեանը եւ լուրջ բացասական ազդեցութիւն կարող
է ունենալ ղարաբաղեան հիմնախնդրի կարգաւորման գործընթացի վրայ:
Մեծարգոյ պարոն նախագահ,
Հայաստանը կարեւորում է Եւրոպական Խորհրդարանի հետ
համագործակցութիւնը եւ հոյս է յայտնում, որ անաչառ եւ
հաւասարակշիռ մոտեցումներով Ձեր ղեկավարած կառոյցն իր նպաստը
կարող է բերել տարածաշրջանում կայունութեան եւ խաղաղութեան
ամրապնդմանը»: