Արգենտինան պատրաստ է օժանդակել Հայաստանին տնտեսութեան
զարգացման ծրագրերում
21-05-2010 21:25:00 | Հայաստան | Քաղաքական
ԵՐԵՎԱՆ, 21 ՄԱՅԻՍԻ, ՆՈՅԵԱՆ ՏԱՊԱՆ: Հայաստանի նախագահ Սերժ
Սարգսեանը մայիսի 21-ին ընդունել է Արգենտինեան Հանրապետութեան
արտաքին գործերի, միջազգային առեւտրի եւ պաշտամունքի նախարար Խորխե
Տայանային, ով Երեւանում է ՀՀ-ում Արգենտինայի դեսպանութեան բացման
առիթով:
Ս.Սարգսեանը շնորհաւորել է Խ.Տայանային Արգենտինայի
անկախութեան 200-ամեակի, նաեւ` Հայաստանում Արգենտինայի
դեսպանութեան բացման կապակցութեամբ: Նա գոհունակութեամբ է խօսել
հայ-արգենտինեան յարաբերութիւնների ներկայ մակարդակի մասին եւ
նշել, որ պէտք է օգտագործել դրանք առաւել ընդլայնելու
հնարաւորութիւնները:
Խ.Տայանան նշել է, որ Արգենտինան կարեւորում է բարեկամ
Հայաստանի հետ կապերի խորացումը, եւ հարաւկովկասեան տարածաշրջանի
երկրներից առաջինը Հայաստանում դեսպանութիւն բացելը պէտք է
դիտարկել հենց այդ համատեքստում:
Ըստ ՀՀ նախագահի Մամլոյ գրասենեակի հաղորդագրութեան,
հանդիպմանը կողմերը քննարկել են հայ-արգենտինեան քաղաքական
երկխօսութիւնը բոլոր մակարդակներում ակտիւօրէն շարունակելու,
տնտեսական համագործակցութիւնը խթանելու, մշակոյթի եւ սպորտի
բնագաւառներում շփումներն աշխուժացնելու վերաբերեալ հարցեր:
Խ.Տայանան յայտնել է, որ Արգենտինան պատրաստ է օժանդակել
Հայաստանին տնտեսութեան զարգացման ծրագրերում, մասնաւորապէս`
գյուղատնտեսությունում նոր տեխնոլոգիաներ ներդնելու գործում:
Ս.Սարգսեանը երախտագիտությամբ է խօսել Արգենտինայի
կառավարութեան կողմից հայ համայնքին ցուցաբերուող վերաբերմունքի
մասին` ասելով, որ այն տեղի հայերին հնարաւորութիւն է ընձեռել
լիարժէք ինքնադրսեւորվելու եւ յաջողութիւնների հասնելու:
Զրուցակիցները նշել են, որ արգենտինահայ համայնքը կապող օղակ է
երկու երկրների միջեւ, ինչի վկայութիւններից է նաեւ Հայաստանում
բազմաթիւ արգենտինացի գործարարների ներկայութիւնը:
Կողմերն անդրադարձել են նաեւ Հայոց ցեղասպանութեան միջազգային
ճանաչման եւ Լեռնային Ղարաբաղի խնդրի կարգաւորման գործընթացներին:
Արգենտինայի արտգործնախարարի խօսքով, իր երկրի դիրքորոշումը
Ցեղասպանութեան հարցում յստակ է` այն կասկածի ենթակայ չէ: Խ.Տայանան
անդրադարձել է նաեւ Ադրբեջանի ռազմատենչ յայտարարութիւններին`
ընդգծելով, որ դրանք չեն նպաստում խնդրի խաղաղ կարգաւորմանը: